A James yeelame: “Wakat ninga, m tõe m noorã. La wakat ning me, wõnda m gomdame n pa tagsdẽ ye.

 A Marie yẽ yeelame: “Rabeem sã n tar maam, m gomdame n pa yals n tags ye. M sũurã sã n noome me, m gomda wʋsgo. Dẽnd wakat fãa la bala, m tudgda ne m goamã.”

 Biiblã yetame: “Zelemd . . . yaa bugum.” B yeelame me: “Ges-y bug-bil bal sẽn tõe n yõog we-kãsengã.” (Zak 3:5, 6) Yãmb no-goamã mi n baoo yɛl n kõ-y bɩ? Sã n yaa rẽ, sõs-kãngã na n sõng-y lame.

•  Bõe yĩng tɩ m gomd goam sẽn pa zemse?

•  F sẽn na n tõog f zɩlemd to-to

•  Kom-bɩɩs a taab sẽn yete

 Yaa tõnd sẽn pa zems zãngã. Biiblã yetame: “Tõnd fãa tudgda ne tudg buud wʋsgo. Ned sã n ka tudg ne a goamã, a yaa ned sẽn zems zãnga.” (Zak 3:2) D sẽn pa zems zãngã, pa kɩt bal tɩ d mi n lak d karg n lʋɩ ye. Mi n kɩtame me tɩ d tudg ne d no-goamã.

 A Anna yeelame: “Sẽn mik tɩ m pa zems zãngã, m sã n yeel tɩ m zɩ n tags wẽnga, bɩ n tudg ne m no-goamã, m belgda m menga.”

 Yaa tõnd sẽn mi n gomd wʋsgã. Biiblã yetame: “Sẽn gomd-a wʋsg ka tõe n ka kong ye.” (Yel-bũnã 10:19) Neb nins sẽn gomd wʋsgo, la b pa kelgd b taabã sõma wã wae n gomda goam sẽn pa zemse, n sãamd b taabã sũyã.

 A Julia yeelame: “Sõsg pʋgẽ, pa ned ning sẽn gomd wʋsgã n tar yam n yɩɩd a taabã ye. Ned pa zĩnd tẽngã zug t’a yam taa a Zeezi ye. La baa ne rẽ, a ra mi n sĩndame n pa leok gomd ye.”

 Yaalg goama. Biiblã yetame: “Ned sẽn ka gũusd goam zabda wa sʋʋg sẽn wãag neda.” (Yel-bũnã 12:18, Wẽnnaam Sebre, 1983) Ned sã n gomd n pa gũusdẽ, a goamã tõe n wa lebga yaalgo. A goamã tõe n zaba neb a taabã, la paoog-ba. Nin-kãens buudã tõe n tagsdame tɩ b gomd n deemdame bala. La goam sẽn yaand ned pa maand laad ye. Biiblã yetame tɩ d zãag d mens ne tʋya, la wẽnem buud fãa.​—Efɛɛz rãmbã 4:31.

 A Oksana yeelame: “M nong n deemda ne nebã, la m nong n maand laado. La woto mi n kɩtame tɩ m paoog nebã ne m no-goamã, n bao yɛl n kõ m menga.”

 Yɩl n tõog f zɩlemd yaa toogo, la Biiblã saglsã tõe n sõng-f lame. Ad sagls a wãna.

 “Bɩ y tags y sũurẽ, la y sĩnd y noore.”​—Yɩɩn-sõamyã 4:5.”

 Wakat ninga, f sẽn sĩnded n pa leok n são. Pag yʋʋr sẽn boond t’a Laura yeelame: “Yell ning taoore, m sũurã yikdame. La sã n yɩ bilfu, a wat n sigame. M sũurã sã n wa sigi, naoor wʋsgo m sũurã noomame m sẽn pa gom m sũ-yikrã sasa wã yĩnga.” D sã n mi n yõkd d mens baa yaa segõnd a wãn bala, tõe n sõng-d lame tɩ ra gom goam sẽn pa zems ye.

 “Tʋbr yaa goam kelgr yĩnga, wa ragsendak sẽn yaa rɩɩb deegr yĩngã.”​—Zoob 12:11.

 Nand tɩ f gome, f sã n sok f meng sogsg nins sẽn pʋgdã, f na n tõog n gila zu-loees wʋsgo:

•   Mam sẽn dat n yeelã yaa sɩd bɩ? Yaa bũmb sẽn sakd kelgr bɩ? Yaa tɩlɛ bɩ?​—Rom dãmbã 14:19.

•   Ned sã n yeel maam rẽ, na n yɩ-m-la noog bɩ?​—Matye 7:12.

•   Mam sẽn dat n yeelã wilgdame tɩ neb a taabã tagsg pak-m lame bɩ?​—Rom dãmbã 12:10.

•   Wakatã zemsa gomdã togsg yĩng bɩ?​—Koɛɛg soaba 3:7.

 “Bɩ ned kam fãa paam sik-m-meng yam n tags tɩ neb a taaba yɩɩda yẽnda.”​—Filip rãmbã 2:3.

 Sagl-kãngã na n sõng-f lame tɩ f ges neb a taabã ne manesem sõngo, tɩ rẽ kɩt tɩ f tõogd f noorã, la f tagsdẽ n yaool n gomda. Baa f sã n paam n yeela bũmb sẽn zab neda, sik-m-mengã na n sõng-f lame tɩ f kos sugr tao-tao. (Matye 5:23, 24) Maan f sẽn tõe n tõog f zɩlemdã.