লুহোংবদগীদি নহাক্কী অনৌবা ইমুং অমা ওইবা হৌরবনি। নহাকপু পোকপীবা ইমা ইপাবু নুংশিগদবনি অমসুং ইকায় খুম্নগদবনি। অদুবু হৌজিক্তি নহাক্কী নপুরোইবা নত্রগা নুপীনা নহাক্কী পুন্সিদা খৱায়দগী মরুওইবা মীশক ওইরবনি। হায়রিবা ৱাফমসি অদোমগী মরী-মতা খরনদি য়ানিংদবা ফাওবা য়াই। ইমুং-মনুংগী মীশিংগা অফবা মরী থম্বা অমসুং নৌনা ওইরক্লিবা মতৈ-মনাও অনিগী মরী চেৎশীন্নবা হোৎনবা, অনীগী মরকসিদা চপ মান্নবা মীৎয়েং থম্বা ঙম্নবা বাইবলগী নিয়মশিংনা মতেং পাংগনি।

বাইবলনা করি হায়রি: “নমা নপাবু ঈকাই খুম্নৌ।” (এফিসা ৬:২) নহাক ফনা অহল ওইরবসু, নহাকপু পোকপীরিবা ইমা ইপাবুদি মতম চুপ্পদা ইকায় খুম্নগদবনি। নহাক্কী নপুরোইবা নত্রগা নুপীসি কনাগুম্বা অমগী মচানি মরম অদুনা মহাক্না মমা মপাবু য়েংশিনবিবা দরকার ওই। “নুংশিবনা কল্লক্তে” মরম অদুনা নহাক্কী নপুরোইবনা নত্রগা নুপীনা মহাক্কী মমা মপাগা অফবা মরী থম্বদা কল্লকপা ফাওবীগনু।—১ কোরিন্থীয়া ১৩:৪; গালাতীয়া ৫:২৬

নহাক্না তৌবা য়াবদি:

• হেনজিনবা ৱাহৈশিং খুদম ওইনা “নখোয় ইমুংনা ঐবু অদুম হন্থনা য়েংই” নত্রগা “ঐনা তৌথোরকপা অমত্তা নখোয় ইমানা পামদে” হায়বগুম্বসি শীজিন্নবীগনু

• ওইরিবা ফিভম অমবু নহাক্কী নপুরোইবা নত্রগা নুপীগী মীৎয়েংদগী য়েংবা ঙম্নবা হোৎনবিয়ু

বাইবলনা করি হায়রি: “নিপানা মহাক্কী মমা মপা থাদোক্তুনা মহাক্কী নুপীদা নপশিনগনি, অদুগা মখোয় অনী হকচাং অমতা ওইগনি।” (মৈহৌরোন ২:২৪) লুহোংলবা মতুংদসু, নহাক্কী ইমা ইপানা নহাকপু য়েংশিনবা হায়বসি মখোয়গী মথৌদাংনি হায়না খনবা য়াই। মরম অসিনা মখোয়না নহাক্কী য়ুম্বান পুন্সিদা দরকার ওইবদগী হেন্না খুৎ থিংজিল্লকপা য়াই।

নখোয় অনীনা মখোয়গী ৱাশিং অসি কদায় ফাওবা তাগনি হায়বদু লেপথোক্লবা মতুংদা, হায়রিবা ৱাফমদু নুংশি হৈবা মওংদা মখোয়দা খঙহনবীয়ু। মখোয়দা অকনবা ৱাহৈ ৱাতা য়াওদনা ঈশেং শেংনা ফোঙদোকপা য়াই। (পাউরৌ ১৫:১) নোল্লুকপা, পুক্নিং তপ্পা অমসুং খাঙহৈবগী গুনশিং চেনগদবনি। হায়রিবা গুনশিং অসিনা মরী মতাশিংগা অফবা মরী থম্বদা অমসুং ‘নুংশিবদা অমনা অমবু খাঙবিবদা’ মতেং পাংগনি।—এফিসা ৪:২

নহাক্না তৌবা য়াবদি:

• নহাক্কী মরী মতাশিংনা নহাক্কী পুন্সিদা কা হেন্না খুৎ থিংজিল্লি হায়না খল্লবদি, মতাং চাবদা নহাক্কী নপুরোইবা নত্রগা নুপীগা মদুগী মরমদা ঈং তপ্না ৱারী শান্নবিয়ু

• হায়রিবশিংদুগী মরমদা করি তৌগনি হায়বদু নখোয় অনী পুন্না ৱারেপ লৌবীয়ু