যেহোবানা ইমুং অমা হায়বসি হৌদোকপিবা মতমদা, অঙাংশিংবু য়েংশিনবগী থৌদাংসি মমা-মপা ওইবশিংদা শিন্নৈ। (কোলোসীয়া ৩:২০) মমা মপা অমা ওইনা, নহাক্কী নচানা যেহোবাবু নুংশিবা অমসুং মথৌদাং খঙবা মীশক অমা ওইনবা তাকপী তম্বীবা হায়বসি নহাক্কী থৌদাংনি। (২ তীমোথি ১:৫; ৩:১৫) নহাক্কী নচানুপা নত্রগা নচানুপীনা মথম্মোয়দা করি খল্লিবগে হায়বদু খঙনবা হোৎনগদবনি। তশেংনমক মখোয়দা ইশাগী অফবা খুদম উৎপা হায়বসিসু য়াম্না মরু ওই। নহাক্কী থম্মোয়দা যেহোবাগী ৱাহৈশিংসি হান্না হাপচীঞ্জরবা মতমদতা, নহাক্কী নচাশিংদা মদুগী মরমদা ফজনা তাকপীবা ঙমগনি।—থাগৎ ঈশৈ ৪০:৮

বাইবলনা করি হায়রি: “তাবদা থুবা, ঙাঙবদা তপ্পা . . .ওইসনু।” (যাকোব ১:১৯) অঙাংশিংনা নঙোন্দা হরাওনা ৱারী শারকপদু নহাক্না পামগনি। অদুনা, মখোয়না হেক ৱারী শান্ননিংলকপা মতমদা নহাকসু তাননবা শেম শাদুনা লৈ হায়বসি মখোয়দা ফাওহনবীয়ু। ৱারী শাবা মতমদা মখোয়গী থম্মোয়দা ফাওরিবশিংদু লায়না ফোঙদোকচবা ঙম্নবা ঈং তপ্পা মওংদা শাবিয়ু। (যাকোব ৩:১৮) নহাক্না শাউরক্কনি নত্রগা লাল্লে হেক্তা হায়রক্কনি হায়না খনখিবা তারগদি, মখোয়না ফোঙদোক্নীংলিবশিংদু ময়েক শেংনা ফোঙদোরক্তবা য়াই। অঙাংশিংবু খাঙহৈবা মওংদা লোয়নবীয়ু অমসুং নহাক্না মখোয়বু নুংশি হায়বসি ইতৎ তত্তনা খঙহনবীয়ু।—মাত্থি ৩:১৭; ১ কোরিন্থীয়া ৮:১

নহাক্না তৌবা য়াবদি:

• অঙাংশিংনা ৱারী শান্ননিংলকপা মতমদা মখোয়দা মতম পীবীয়ু

• মখোয়না খুদোংচাদবা থেংনরকপা মতম খক্তদা নত্তনা, অতোপ্পা মতমদসু তোয়না ৱারী শান্নবীয়ু

বাইবলনা করি হায়রি: “হৈশিংনা থবক তৌরিবা মহাক অফবা ফংজগনি।” (পাউরৌ ১৬:২০) করিগুম্বা মতমদসু নহাক্কী অঙাংশিংনা হায়রকপা ৱাহৈশিংদু নত্তবা অদুবু মখোয়দা তশেংনা ফাওরিবা ৱাখল্লোনদু উনবা হোৎনবিয়ু। নহা ওইরিবশিংনা, মখোয়না হায়নীংবা ৱা অমগী মরমদা হেঞ্জিন্না হায়বা হায়বসি মহৌশানি। “ৱা তাদ্রিঙৈদা পাউখুম পীরিবা মহাক্তি, অপঙবা মতৌনি।” (পাউরৌ ১৮:১৩) অদুনা অঙাংশিংদা অশাওবদু হান্না উৎথোকপিগনু।—পাউরৌ ১৯:১১

নহাক্না তৌবা য়াবদি:

• অঙাংশিংনা হায়নীংবা ৱা অমা হায়রিঙৈদা মরক থৎপা নত্রগা কা হেন্না শাউগৎপা উৎতনবা হোৎনবিয়ু

• নহাক্না নচাশিংগী চহী মতাংদু ওইবা মতমদা, করম্না ফাওখি অমসুং করিনা খৱাইদগী মরুওই হায়না খনখীবগে হায়বদু নীংশিংনবা হোৎনবিয়ু

বাইবলনা করি হায়রি: “ঐগী ইচা নিপা, নহাক্কী নপানা তাকপি তম্বিবা তাও, নহাক্কী নমাগী তম্বিবা থাদোক্কনু।” (পাউরৌ ১:৮) যেহোবানা মমা অমসুং মপাদা মখোয়গী মচাশিংগী থৌদাং শিন্নৈ। নহাক্কী নচাশিংনা নহাকপু ইকায় খুম্ননবা অমসুং হায়বা ইন্নবা তম্বীগদবনি। (এফিসা ৬:১-৩) মমা মপাশিংনা “ৱাখন্দা অমতা ওইনা” লৈত্রগদি মদু অঙাংশিংনা লায়না খঙগনি। (১ কোরিন্থীয়া ১:১০) করিগুম্বা ৱাফম অমদা নখোয় অনীনা য়ানদবা লৈরবসু, মদুগী মরমদা অঙাংশিংগী মমাঙদা ৱারী শাবিগনু, অদু নত্রবদি মখোয়দা লৈবা মমা মপাগী ইকায় খুম্নবদু হন্থরকপা য়াই।

নহাক্না তৌবা য়াবদি:

• নখোয়না করম্না নচাশিংবু ৱারক-ৱাতেমগদগে হায়বদু খন্নদুনা ৱারেপ লৌবীয়ু

• নখোয় অনীগী মরক্তা অঙাংশিংবু করম্না তাকপী তম্বীগনি হায়বগী মতাংদা মোৎ খেৎনবা লৈরগদি, অমনা অমগী ৱাখল্লোনদু খঙনবা হোৎনবিয়ু

বাইবলনা করি হায়রি: “অঙাং অমবু মহাক্না চৎকদবা লম্বী তম্বিয়ু।” (পাউরৌ ২২:৬) অঙাংশিংবু মপুংফানা তাকপী তম্বীবা হায়বসি ইরায় লায়না হেক্তা ওইবা নত্তে। নহাক্না নচাশিংবু তাকপী তম্বীনবা ফজনা থৌরাং তৌবা দরকার ওই, মদুদা মখোয়বু ৱারক ৱাতেম্বীবসু চঙই। (থাগৎ ঈশৈ ১২৭:৪; পাউরৌ ২৯:১৭) ৱারক ৱাতেম্বা হায়বসি ফুবা-চৈবা অদুখক নত্তে। মখোয়দা করিগুম্বা অমগী মতাংদা তৌবা য়াই নত্রগা য়াদে হায়বগী মরমদু শেংনা খঙহনবা চঙই। (পাউরৌ ২৮:৭) মদুগা লোয়ননা, যেহোবাগী ৱাহৈবু পামজনবা অমসুং মদুদা য়াওরিবা নিয়মশিং খঙনবা তাকপীয়ু। (থাগৎ ঈশৈ ১:২) মসিনা মখোয়দা অচুম অরান লেপ্পা ঙমজনবা মতেং পাংগনি।—হিব্রু ৫:১৪

নহাক্না তৌবা য়াবদি:

• ঈশ্বরসি তশেংনা লৈবা অমসুং মখোয়না থাজবা য়াবা মীশক্নি হায়বদু নচাশিংদা ময়েক শেংনা খঙহনবীয়ু

• অরানবা লমচৎ শাজৎশিং মশানা খঙদোকপা ঙম্নবা অমসুং মদুদগী লাপ্না লৈনবা তাকপীয়ু, খুদম ওইনা ইন্টরনেট অমসুং সোশেল নেটৱর্কতা ফংবশিং। মখোয়না অরান্বা লমচৎ চৎপা মীশিংগী খুৎতগী লৈথোকপা ঙম্নবা তাকপীয়ু