Jehovahna imung ama haibasi houdokpiba matamda, angangsingbu yengsinbagi thoudangsi mama-mapa oibasingda sinnei. (Colosiya 3:20) Mama-mapa ama oina, nahakki nachana Jehovahbu nungsiba amasung mathoudang khangba meesak ama oinaba takpi tambiba haibasi nahakki thoudangni. (2 Timothy 1:5; 3:15) Nahakki nachanupa nattraga nachanupina mathamoida kari khallibage haibadu khangnaba hotnagadabani. Tasengnamak makhoida isagi aphaba khudam utpa haibasisu yamna maru oi. Nahakki thamoida Jehovahgi waheisingsi henna hapchinjaraba matamdata, nahakki nachasingda madugi maramda phajana takpiba ngamgani.—Thagat Ishei 40:8.

BIBLENA KARI HAIRI: “Tabada thuba, ngangbada tappa... oisanu.” (Jacob 1:19) Angangsingna nangonda haraona wari sarakpadu nahakna pamgani. Aduna, makhoina hek wari sannaninglakpa matamda nahaksu tananaba sem saduna lei haibasi makhoida phaohanbiyu. Wari saba matamda makhoigi thamoida phaoribasingdu laina phongdokchaba ngamnaba ing tappa mawongda sabiyu. (Jacob 3:18) Nahakna saorakkani nattraga lalle hekta hairakkani haina khankhiba taragadi, makhoina phongdokninglibasingdu mayek sengna phongdoraktaba yai. Angangsingbu khaangheiba mawongda loinabiyu amasung nahakna makhoibu nungsi haibasi itat tattana khanghanbiyu.—Maathi 3:17; 1 Corinthiya 8:1.

NAHAKNA TOUBA YABADI:

• Angangsingna wari sannaninglakpa matamda makhoida matam pibiyu

• Makhoina khudongchadaba thengnarakpa matam khaktada nattana, atoppa matamdasu toina wari sannabiyu

BIBLENA KARI HAIRI: “Heisingna thabak touriba mahak aphaba phangjagani.” (Paorou 16:20) Karigumba matamdasu nahakki angangsingna hairakpa waheisingdu nattaba adubu makhoida tasengna phaoriba wakhallondu unaba hotnabiyu. Naha oiribasingna, makhoina hainingba wa amagi maramda henjinna haiba haibasi mahousani. “Wa tadringeida paokhum piriba mahakti, apangba matouni.” (Paorou 18:13) Aduna angangsingda asaobadu hanna utthokpiganu. —Paorou 19:11.

NAHAKNA TOUBA YABADI:

• Angangsingna hainingba wa ama hairingeida marak thatpa nattraga ka henna saogatpa uttanaba hotnabiyu

• Nahakna nachasinggi chahi matangdu oiba matamda, karamna phaokhi amasung karina khwaidagi maruoi haina khankhibage haibadu ningsingnaba hotnabiyu

BIBLENA KARI HAIRI: “Eigi ichanipa, nahakki napana takpi tambiba tao, nahakki namagi tambiba thadokkanu.” (Paorou 1:8) Jehovahna mama amasung mapada makhoigi machasinggi thoudang sinnei. Nahakki nachasingna nahakpu ikai khumnanaba amasung haiba innaba tambigadabani. (Ephisa 6:1-3) Mama mapasingna “wakhanda amata oina” leitragadi madu angangsingna laina khanggani. (1 Corinthiya 1:10) Karigumba wapham amada nakhoi anina yanadaba leirabasu, madugi maramda angangsinggi mamangda wari sabiganu, adu nattrabadi makhoida leiba mama mapagi ikai khumnabadu hantharakpa yai.

NAHAKNA TOUBA YABADI:

• Nakhoina karamna nachasingbu warak-watemgadage haibadu khannaduna warep loubiyu

• Nakhoi anigi marakta angangsingbu karamna takpi tambigani haibagi matangda mot khetnaba leiragadi, amana amagi wakhallondu khangnaba hotnabiyu

BIBLENA KARI HAIRI: “Angang amabu mahakna chatkadaba lambi tambiyu.” (Paorou 22:6) Angangsingbu mapungphana takpi tambiba haibasi irai laina hekta oiba natte. Nahakna nachasingbu takpi tambinaba phajana thourang touba darkar oi, maduda makhoibu warak watembibasu chang-ee. (Thagat Ishei 127:4; Paorou 29:17) Warak watemba haibasi phuba-cheiba adukhak natte. Makhoida karigumba amagi matangda touba yai nattraga yade haibagi maramdu sengna khanghanba chang-ee. (Paorou 28:7) Maduga loinana, Jehovahgi waheibu pamjanaba amasung maduda yaoriba niyamsing khangnaba takpiyu. (Thagat Ishei 1:2) Masina makhoida achum aran leppa ngamjanaba mateng panggani.—Hibru 5:14.

NAHAKNA TOUBA YABADI:

• Ishworsi tasengna leiba amasung makhoina thajaba yaba meesakni haibadu nachasingda mayek sengna khanghanbiyu

• Aranba lamchat sajatsing masana khangdokpa ngamnaba amasung madudagi lapna leinaba takpiyu, khudam oina Internet amasung social networkta phangbasing. Makhoina aranba lamchat chatpa meesinggi khuttagi leithokpa ngamnaba takpiyu