Yawan Jehova witniska nani ba, Jisas mita smalki, ai apastilka nani alki daukan kristian lâka ba nina blikaia karna wark takisa. Naha ulbanka ra yawan diaura kasak luki ba tânka brima dukiara, bîla prahni ra tânka marikisa.

1.   Gâd. Yawan Gâd kumi kira, rait aihwa, Papaskra bara Karnika Sut Bri ba ra mayunisa. Ai nina ba sika Jehova (Lawana Nani 83:18 Miskitu Salmo Lawana Nani; Param Marikan 4:11). Witin ba Ebraham, Moses bara Jisas Gâdka sa (Impakan Sturka 3:6; 32:11; Jan 20:17).

2.   Baibil ba. Yawan kasak lukisa Baibil ba upla sut dukiara Gâd Bîla sa (Jan 17:17; 2 Timoti 3:16). Yawan dîa kasak luki ba 66 bukka nani ba ra ai bapanka brisa, wibia sa kaka, testament almuk bara raya wâlsut ra. Maestru kum nina Jason BeDuhn ba naha dukiara aisi win, Jehova witniska nani ba “diaura kasak luki ba, bara dîa dauki ba Baibil ra ai bapanka brisa. Witin nani ai lukanka sait ra mangki si, Baibil dîa wi ba kat alki daukisa”. a

    Baibil dîa wi ba sut ra kasak lukisa, kuna fundamentalistas apia sa. Yawan nani pain nu sa Baibil ra sturi kum kum ba maprika lilka, apia kaka tânka marikanka nani sa. Baha mita nu sa pîska kum kum ba dîa ulban ba kat tânka briaia apia sa (Param Marikan 1:1).

3.   Jisas. Jisas Kraist smalkanka bara daukanka nani nina blikisa, bara rispik lâka marikisa. Kan witin wan Swaki Sasakra bara Gâd Luhpia sa bamna (Matiu 20:28; Apastil Nani Sturka 5:31). Baha ba marikisa yawan kristian nani sa (Apastil Nani Sturka 11:26). Ban sakuna Baibil wina lan takan, Jisas ba karnika sut bri Gâdka apia sa, bara Gâd kumi ra yumhpa smalkanka ba Baibil ra bapanka briras sa (Jan 14:28).

4.   Gâd Kingka lâka ba. Baha ba gabamint kum heven ra sa; diara kum kristian nani ai kupia bilara bâra ba lika apia sa. Tasba gabamintka nani sut ra sauhki tikbia bara Tasba dukiara Gâd kupia lâka ba daukbia (Daniel 2:44; Matiu 6:9, 10). Baha ba tisku aimakbia, kan Baibil prapit nani aisanka ba wisa yawan “tnata yua nani ra” iwisa (2 Timoti 3:1-5; Matiu 24:3-14).

    Jisas ba Gâd Kingka lâka heven ra ba Kingka sa. Mani 1914 ra king aimakan (Param Marikan 11:15).

5.   Swaki sakan lâka. Jisas sakripaiska ra tingki, upla nani ba saurka lâka bara prura wina pri takaia sip sa (Matiu 20:28; Apastil Nani Sturka 4:12). Baha sakripaiska wina yamnika briaia dukiara, Jisas ra kasak lukaia sa, wan rayaka chens muni, tahbi daukan lâka briaia sa (Matiu 28:19, 20; Jan 3:16; Apastil Nani Sturka 3:19, 20). Upla kum rait pali kasak lukan lâka brisa kaka, ai daukanka nani wal marikisa (Jems 2:24, 26). Ban sakuna, swaki sakan lâka ba yawan silp wan karnika ni alkaia sip apia sa; “Gâd latwanka” ba mita alkaia sip sa (Galesha 2:16, 21).

6.   Heven ba. Jehova, Jisas Kraist bara insal kasakkira nani ba upla sip kaikras pliska ra iwi banhwisa (Lawana Nani 103:19-21; Apastil Nani Sturka 7:55). b Upla wiria baman, wibia sa kaka, upla 144.000 baman heven ra kli bubia, Gâd Kingka lâka ra Jisas wal king aimakaia dukiara (Daniel 7:27; 2 Timoti 2:12; Param Marikan 5:9, 10; 14:1, 3).

7.   Tasba ba. Gâd tasba na paskan sa upla nani ban kaia ra iwbia dukiara (Lawana Nani 104:5; 115:16; Smasmalkra 1:4). Naha tasba paradais kum daukbia taim, ya ai bîla wali nani ba siknis âpu ban kaia ra iwaia sip kabia (Lawana Nani 37:11, 34).

8.   Saurka bara pât wahwanka nani. Baibil ba tânka marikisa, insal kum Gâd mapara buan ba tâwan, saurka bara pât wahwanka nani tâ krikan (Jan 8:44). Baha insalka ra Dibil bara Sitan nina mâkisa. Witin pas maritka ra tukban aikuki Gâd mapara bubia, baha tâka mita, upla sut pât wahwi banhwisa (Blasi Sturka 3:1-6; Roman 5:12). Sitan dîa lahtuban ba wapni ra mangkaia dukiara, Gâd swin sa piua kum saurka bara pât wahwanka nani ba bâra kabia, sakuna trabilka nani sut tisku âpu daukbia.

9.   Prura ba. Upla kum pruisa taim, danh âpu takisa. (Lawana Nani 146:4; Smasmalkra 9:5, 10). Pruan nani ba hil pauta ra panis wauhras sa.

    Gâd bui upla pruan nani milian milian ra kli bukaisa (Apastil Nani Sturka 24:15). Sakuna, kli buan ningkara Gâd bîla walaia want apia nani ba ra ban kaia ra sauhki tikan kabia, witin nani kli raya kabia apia (Param Marikan 20:14, 15).

10.   Pamali. Yawan marit lâka dukiara, Gâd dîa luki ba kat alki daukisa. Marit lâka ba waitna kum wihki mairin kum wal asla prakisa, bara marit lâka sauhkan taim baman dibors takbia swisa (Matiu 19:4-9). Yawan kasak lukisa Baibil smalkanka nani ba sinskira pali sa, bara pamali nani lilia kaia hilp munisa (Epesus 5:22–6:1).

11.   Wan mayunra ba. Yawan aidul kumi ra sin mayunras, dus prihni sin baha tilara sa (Kli Smalkanka 4:15-19; 1 Jan 5:21). Wan mayunra tnatka kum kum ba naku sa:

    •   Gâd ra wan pura sunisa (Pilipai 4:6).

    •   Baibil aisi kaikisa bara stadi takisa (Lawana Nani 1:1-3).

    •   Baibil wina dîa lan taki ba ra aman luki kaikisa (Lawana Nani 77:12).

    •   Asla aidrubisa wan pura sunaia, Baibil stadi takaia, aikuki aiwanaia, wan kasakka lukan lâka marikaia, bara pana pana kupia bukaia dukiara (Kolosi 3:16; Hibru Nani 10:23-25).

    •   “King lâka sturka yamni” nani ba upla ra smalkisa (Matiu 24:14).

    •   Ya nitka bri nani ba ra hilp munisa (Jems 2:14-17).

    •   Tasba aiska ra Baibil wina lan daukaia dukiara, Asla Aidrubanka Watla bara utla tara nani mâkisa, bara main kaikisa (Lawana Nani 127:1).

    •   Tasba sauhkanka nani piua ra hilpka yabisa (Apastil Nani Sturka 11:27-30).

12.   Wan asla takanka ba. Yawan ba kangrigisan baku asla daukisa, bara kumi bani ra kangrigisan almukka nani daknika ba pura kaikisa. Witin nani ba kulkanka tara bri tâ bri waitnika nani daknika kum tilara apia sa, bara mana luha wark taki banhwisa (Matiu 10:8; 23:8). Yawan ba 10 bani wina kumi yabras bara kaliksan sin makabras sa (2 Korint 9:7). Wan warkka sut ba kupia wina prisant yabi ba wal daukisa, bara ya pali mita prisant yaban ba maisa pakras sa.

     Tasba aiska ra Jehova witniska nani warkka ba Tâ Bri Daknika mita tapahkisa. Spirit lainka ra pâwan kristian waitnika nani wiria naha daknika ra sa, bara witin nani ba Tasba Aiska Apiska Kau Tara ra banhwisa (Matiu 24:45).

13.   Wan aslika lâka. Tasba aiska ra yawan ani wina kabia kra sin, sim dukia nani ra kasak lukisa (1 Korint 1:10). Trai munisa upla mawan bâk saki kulkaia apia (Apastil Nani Sturka 10:34, 35; Jems 2:4). Jehova witniska nani ba sim lukanka brisa, kuna kumi bani diara wahbi sakaia prika lâka brisa. Baibil mita lan daukan ai kupia dara walanka ba wal silp diara nani wahbi sakisa (Roman 14:1-4; Hibru Nani 5:14).

14.   Wan daukanka. Diara sut ra latwan lâka rait aihwa marikaia trai munisa (Jan 13:34, 35). Gâd dîa saura kaiki ba daukaia apia trai munisa. Baha mita tala dukiara aisisa taim, kasak ai smalkanka nani ra lukisa, tânka kum baku, wan wîna ra tala dingkras (Apastil Nani Sturka 15:28, 29 TNM; Galesha 5:19-21). Baku sin kupia kumi lâka plikisa, bara war aiklabanka nani tâ baikras (Matiu 5:9; Aiseya 2:4). Gabamint nani ra rispik munisa, bara ai lâka nani sin Jehova smalkanka nani mapara apia sa taim, nina blikisa (Matiu 22:21; Apastil Nani Sturka 5:29).

15.   Upla wala nani wal nahki kaia ba. Jisas win: “Uplikam ra latwan kaiks, man wînam ra latwan kaikisma ba baku”. Baku sin win, kristian nani ba “naha tasba wina apia sa” (Matiu 22:39; Jan 17:16). Baha mita upla sut ra diara pain nani daukaia trai munisa, kuna pulitik bisniska tilara dimras bara rilidian wala nani wal sin asla takras (Galesha 6:10; 2 Korint 6:14). Ban sakuna upla baha dukiara dîa wahbi saki ba yawan nani rispik munisa (Roman 14:12).

 Jehova witniska nani dîa luki ba dukiara makabi walanka nani kau brisma kaka, wan Internet pliska ra kau tânka nani sâkma. Baku sin, wan apiska nani ra ulbaia sip sma, apia kaka man iwisma pliska ra Aidrubanka Watla kum ra wan aidrubanka nani dauki ba ra waia sin sip sma Bara Jehova witniska kum wal aisaia sin sip sma.