Колымыж деч ончычрак Иисус туге каласен: «Кугыжанышын тиде Поро Увержым тӱня мучко каласкалат, тудыжо чыла калыклан таныклымаш лиеш, вара мучаш толеш» (Матфейын 24:14). Поро уверым уло тӱня мучко ме кузе шарен кертына? Тидым ышташ Иисусын примерже полша (Лукан 8:1).

Пӧрт гыч пӧртыш коштына. Иисус тунемшыж-влакым пӧрт еда таныклен кошташ туныктен (Матфейын 10:11—13; Апост. пашашт 5:42; 20:20). Поро уверым каласкален кошташлан икымше курымышто таныклыше-влакын посна ойырымо территорийышт лийын (Матфейын 10:5, 6). Тиде семынак мемнан пашанат шот дене ышталтеш. Кажне погынымашын шке посна территорийже уло. Тыгай радам «калыклан увертараш да таныклаш» Иисусын кӱштымыжым шукташ полша (Апост. пашашт 10:42).

Чыла вере таныклаш тыршена. Чӱчкыдын Иисус поро уверым калык погынымо верлаште каласкален. Мутлан, теҥыз серыште але таве воктене (Маркын 4:1; Иоаннын 4:5—15). Тудын примерже почеш меат калык дене Библий нерген чыла вере мутланаш тыршена: паша верыште, уремыште, парклаште, эсогыл телефон денат. А йӧн лекме годым пошкудыланна, мемнан дене пырля пашам ыштыше, пырля тунемше да тыгак родо-влакланат каласаш тыршена. Тидлан кӧра миллион дене еҥ утарымаш нерген поро уверым колеш (Псалом 95:2).

Юмын Кугыжанышыже нерген поро уверым те кӧлан каласкален кертыда? Ончыкылыклан сай ӱшан нерген кӧ дене мутланен кертыда? Тиде поро уверым калык деч ида шылте. Йӧн лектеш гын, вигак каласаш тыршыза!

• Уло мланде мучко могай увер увертарыме лийшаш?

• Иегован Таныкше-влак, Иисусын примержым ончен, мом ыштат?