Икымше курымын христианысе погынымашыште кугурак иза-влак лийыныт. Тиде пример почеш мемнанат опытан иза-влак улыт, нуным Юмын погынымашыжым кӱташ шогалтыме (Апост. пашашт 20:28). Но тиде пашам ыштымыштлан нунылан оксам огыт тӱлӧ. Кугурак иза-влак чын корнышто пеҥгыдын шогат да Юмын пуымо кӱтӱжым «ӧкымлыде, шке кумылын... намысле пайдам кычалын огыл, а уло кумылын тыршен» кӱтат (1 Петрын 5:1—3). Тыгай сай кумылым ончыктен, нуно погынымашым вӱдаш ямде улыт. Мыланна сай лийже манын, кугурак иза-влак могай пашам шуктат?

Нуно погынымашым аралат. Кугурак иза-влак погынымашым вӱдат да иза-ака-влаклан Юмо дене кыл кучымашым аралаш полшат. Нуно умылат: Иегова нунылан пешак кӱлешан пашам ӱшанен пуэн. Сандене нуно Юмын калыкшым кид йымалнышт огыт кучо, а мӧҥгешла, эҥгек деч аралаш тыршат да куанымашым налаш полшат (2 Коринфян-влаклан 1:24). Тыршыше кӱтӱчӧ семын, кудо кӱтӱштыжӧ кажне шорыкым пала, кугурак иза-влак погынымашыште кажне дене палыме лияш тыршат (Притчи 27:23).

Нуно Юмын эрыкшым шукташ туныктат. Кажне арнян, мемнан ӱшанымашнам пеҥгыдемдаш манын, кугурак иза-влак вашлиймашым эртарат (Апост. пашашт 15:32). Нине Юмылан ӱшанле пӧръеҥ-влак таныклымаш пашаште вӱдышӧ рольым шуктат. Нуно мемнан дене пырля таныклен коштыт: пӧрт еда, урем дене да моло семынат. Таныклыме пашам сайын шукташ туныктат.

Нуно кажне иза-ака верч тыршат. Кугурак иза-влак погынымаште кажнылан Иегова дене кылым пеҥгыдемдаш полшат. Мыланна полшаш але мемнам лыпландараш манын, нуно мӧҥгышкына толын кертыт але Вашлиймаш залыште мемнан дене мутланат. Тыгай мутланымаш годым нуно Священный Возымашым кучылтыт (Иаковын 5:14, 15).

Кугурак иза-влак коклаште шукышт ешан улыт, сандене погынымаш паша деч посна нунын моло сомылжат шуко: пашам ышташ да ешлан жапым ойыраш кӱлеш. Нине иза-влак пешак тыршат, садлан кӧра йӧратымашнам да пагалымашнам сулен налыт (1 Фессалоникысе-влаклан 5:12, 13).

• Кугурак иза-влак погынымаште могай рольым модыт?

• Кугурак иза-влак кажне иза-ака верч кузе тыршат?