Iar l̦otak ilo Mulhouse, juon jikin ilo France. Armej ro ijin rejjab lukkuun m̦weiie im elõñ rejel̦ã kake kõnke el̦ap an armej ro ie lãj. Ij keememej bwe jãn ke iar dik, ekõn l̦ap akwããl im poktak ilowaan baam̦le ko ilo bukwõn eo kõmar jokwe ie. El̦ap an baam̦le eo ammim reilal̦l̦o̦k ñan kõrã ro im elukkuun jeja an em̦m̦aan ro bõk aer l̦õmn̦ak ñe rej kõm̦m̦an pepe. Kar katakin eõ bwe ijo kõrã ro rej aikuj pãd ie ej jikin kõmat eo ilo m̦weo, im jerbal eo aer ej ñan lale aikuj ko an l̦õm̦aro im ajri ro.

Ear jab em̦m̦an men ko rar wal̦o̦k ilo mour e aõ ke iar dik im rũttol̦o̦k. Ke ear 10 aõ iiõ, jema ear mej kõn wõt an l̦ap an kõkadekdek. L̦alem iiõ tokãlik, juon iaan l̦adik ro jeiũ ear m̦an e make. Im ilo ejja iiõ eo wõt, iar lo aer m̦ane juon armej ñan mej ke ear wal̦o̦k juon poktak ikõtaan baam̦le ko ammim, im iar lukkuun bwilõñ. Ro uwaan baam̦le eo ammim rar katakin eõ kilen kõjerbal bakbõk im bu im ñan ire ilo iien ko ewõr poktak. Kõnke iar juon jo̦dikdik eo ebũraabl̦õm̦, iar jino eo̦uk aolepen ãnbwinnũ im kadek.

Ke ear 16 aõ iiõ, ikõn idaak 10 l̦o̦k ñan 15 bato in pia kajjojo raan, im ejjabto tokãlik iar jino bõk uno ko rekkajjoor. Bwe en wõr on̦ãn men kein, iar jino ko̦o̦t im iar bar wiakake kwõpej ko me rej bũki im kõm̦m̦an aen jãni. Iar jino pãd ilo kalbuuj ke ear 17 aõ iiõ. Jãn iien eo m̦aanl̦o̦k ear wõr tarrin 18 alen aõ kar kalbuuj ak keej kõn aõ kõn ko̦o̦t im ire.

Ke ear jino 20 jim̦a aõ iiõ, ear nanal̦o̦k wõt men ko iar kõm̦m̦ani. Ikõn kõbaatat 20 marijuana kajjojo raan im bõk juon kain uno ekajoor etan heroin im uno ko jet rekkajjoor. Jet ko iien ibaj wõt mej kõn an l̦e jãn joñan aõ bũki men kein. Iar jino wiakake uno ko rekkajjoor. Kõn men in, ekkã aõ ebbõk bakbõk im bu ippa. Juon iien, iar kajjioñ buuki juon em̦m̦aan bõtab em̦m̦an bwe ejab lel kõnke ear lel aen in kañũr eo an im jekadl̦o̦k! Ke ear 24 aõ iiõ, jinõ ear mej, im ear l̦apl̦o̦k aõ nana im lãj. Ñe armej rej etetal im lo aõ jãde, ekkã aer etal ñan ial̦ ko jet kõn aer mijak. Ñe ej wiikããn, ekkã aõ pãd ilo kalbuuj ak ilo aujpitõl̦ bwe ren kiiji kinej ko aõ itok wõt jãn aõ ire.

Ke ear 28 aõ iiõ, iar m̦are. Iar jab kautiej kõrã eo pãleõ. Ikõn kainepataiki im m̦ane. Kõm̦ro ejjañin kar kõm̦m̦ane jabdewõt men ippãn doon ãinwõt rippãlele. Iar l̦õmn̦ak bwe ebwe wõt ñan lel̦o̦k ñane men ko ikõn ko̦o̦ti ãinwõt m̦arm̦ar, riiñ, im men ko ãierl̦o̦kwõt. Bõtab, ewõr juon men ear wal̦o̦k me iar jab kõtmãne kake. Kõrã eo ippa ear jino katak Baibõl̦ ippãn Ri Kõnnaan ro an Jeova. Ãlikin iien eo jinointata in an kar katak, ear bõjrak an kõbaatat, m̦akoko in bar bũki jããn ko iar ko̦o̦ti, im ear karo̦o̦ltok men ko iar ko̦o̦ti. Iar lukkuun illu. Iar jum̦aiki  an katak Baibõl̦ im ikõn kõbaatat im uukukl̦o̦k baat ñan mejãn. Iar bar kõm̦m̦an kõjak kake ñan armej ro ilo bukwõn eo.

Juon boñ, kõn aõ kar lukkuun kadek, iar tile m̦weo kõmar jokwe ie. Kõrã eo ippa ear lo̦mo̦o̦ren eõ im ledik eo nejũm̦ro me 5 an iiõ bwe kõm̦ro en jab bwil. Ke ear jakol̦o̦k aõ tab, ear lukkuun nana aõ mour. Ilo bũruõ, iar l̦õmn̦ak bwe Anij elukkuun ban jol̦o̦k aõ bõd. Ij keememej an kar juon bũrij ba bwe ro renana renaaj bwil ilo hell. Joñan, taktõ eo aõ ear bar ba ñan ña: “Ejjel̦o̦k men en̦ enaaj maroñ jipañ eok! Kwõlukkuun ban oktak.”

Ãlikin an kar bwil m̦weo, kõmar em̦m̦akũt im jokwe ippãn jinen im jemãn kõrã eo ippa. Ke Ri Kõnnaan ro an Jeova rar lotok kõrã eo ippa, iar kajjitõk ippãer im ba, “Anij emaroñ ke jol̦o̦k aolep jerawiwi ko aõ?” Rar kwal̦o̦k ñan ña eoon ko ilo 1 Korint 6:9-11. Eoon kein rej kõllaajraki men ko Anij ediki, im ej wõnm̦aanl̦o̦k im ba: “Jet iaami kar ãierwõt.” Naan kein rar jipañ ña ñan tõmak bwe imaroñ oktak. Ri Kõnnaan rein an Jeova rar jipañ eõ ñan tõmak bwe Anij ej yokwe eõ ilo aer kar kwal̦o̦k kõn eoon eo ilo bokin 1 Jon 4:8. Men in ear lukkuun kõm̦akũt bũruõ im iar kajjitõk ippãer bwe ren katak Baibõl̦ ippa ruo alen ilo kajjojo wiik, im iar jino etal im kweilo̦k ippãer. Iar bareinwõt jar ñan Jeova aolep iien.

Ilowaan wõt juon allõñ, iar pepe in bõjrak jãn aõ kõjerbal uno ko rekkajjoor im idaak arkool̦. Ejjabto tokãlik, ear ãinwõt ñe ear jinoe juon tarin̦ae ilowaan ãnbwinnũ! Iar lukkuun eñtaan kõn aõ ettõn̦ak kõn ettõn̦ak ko rekaamijak, metak bõra, kankan ãnbwinnũ, im men ko ãierl̦o̦kwõt. Bõtab, ilo ejja iien eo wõt, iar eñjake an Jeova jipañ eõ. Ear ãinwõt ñe ear jibwe peiũ im kakajoor eõ. Iar bõk ejja l̦õmn̦ak eo wõt an kar rijjilõk Paul. Paul ear kwal̦o̦k kõn an kar Anij jipañe, ear ba: “Imaroñ in kõm̦m̦an men otemjej ilo Eo ej kakajoor eõ.” (Pilippai 4:13) Ejjabto tokãlik, iar maroñ bõjrak jãn aõ kõbaatat.​—2 Korint 7:1, UBS.

Baibõl̦ ear jab baj jipañ wõt eõ bwe in bõjrak jãn men ko renana, ak ear bar jipañ baam̦le eo aõ. Ear oktak wãween aõ kõm̦m̦an ñan kõrã eo pãleõ. Iar jino kal̦apl̦o̦k aõ kwal̦o̦k kautiej ñane im jino kõjerbal naan kein “jouj” im “kom̦m̦ool” ñe ij kõnnaan ñane. Bareinwõt, ear jino em̦m̦an wãween aõ lale ledik eo nejũm̦ro. Ãlikin aõ kar katak Baibõl̦ ium̦win juon iiõ, iar ajel̦o̦k mour eo aõ ñan Jeova im peptaij ãinwõt kar lio ippa.

Ij lukkuun tõmak bwe naanin kakapilõk ko ilo Baibõl̦ rar lo̦mo̦o̦ren mour e aõ. Ro uwaan baam̦le eo aõ me rejjab karejar ñan Jeova rar bar kile bwe imaroñ naaj kar mej jãn aõ bũki uno ko rekkajjoor ak mej jãn aõ ire.

Katak ko ilo Baibõl̦ rar jipañ mour in baam̦le eo aõ. Rar jipañ eõ ñan kile ta eddo ko aõ ñan lio ippa im ledik eo nejũ. (Epesõs 5:25; 6:4) Kõmar jino kõm̦m̦an iien ippãn doon ãinwõt juon baam̦le. Kiiõ, ijello̦kun aõ likũt kõrã eo ippa ilo jikin kõmat eo bwe en kõm̦m̦ani jerbal ko ie, im̦õn̦õn̦õ bwe ij rejetake ilo an kwal̦o̦k naan im tõpar 70 awa kajjojo allõñ. Im em̦õn̦õn̦õ in rejetake eddo eo aõ ãinwõt juon em̦m̦aan ej lale eklejia.

Yokwe im tũriam̦o eo an Jeova Anij rar lukkuun jipañ eõ ilo mour e aõ. Ilukkuun kõn̦aan kwal̦o̦k kõn kain Anij rot e ñan rinana ro me elõñ remaroñ l̦õmn̦ak bwe relukkuun ban oktak, ãinwõt an kar elõñ l̦õmn̦ak kõn ña. Ijel̦ã bwe Baibõl̦ emaroñ jipañ jabdewõt armej bwe en erreo mour eo an im en lo m̦õn̦õn̦õ ilo mour eo an. Baibõl̦ ear jipañ eõ bwe in yokwe im kautiej ro jet, ekitibuj em̦m̦aan im kõrã ro jim̦or. Ear bareinwõt jipañ eõ bwe in kaorõk mour e aõ.