Jet menin letok relukkuun aorõk ippãd kõnke bõlen eo ear litok men kein ej juon eo eutiej ak bõlen juon eo me el̦ap ad kautieje. Jej bar kaorõk menin letok ko jet ejjab kõnke el̦ap on̦ãer, ak kõnke rej jãn juon eo eaorõk ippãd ilo baam̦le eo ad ak jãn eo m̦õttad me jej lõke. Eñin kar eñjake eo an Jordan kõn menin lel̦o̦k eo an Russell me kar kwal̦o̦k kake ilo katak eo l̦o̦k. Ewi wãween an men in jitõñl̦o̦k ñan menin letok eo an Anij kõn katok in mour eo an Jijej?

Kein kajuon, Baibõl̦ ej ba bwe “Anij ear jilkintok Nejin eo ej make wõt ñan lal̦, bwe jen maroñ mour kõn e.” (1 Jon 4:9, UBS) Innem kõnke menin letok in ej jãn Anij, elukkuun aorõk im jejuwaan. Im jejel̦ã bwe ejjel̦o̦k bar juon eutiejl̦o̦k jãn Anij. Juon rijeje sam ear ba men in kõn Anij: “Kwe wõt, im etam̦ Jeova, Kwe eo eutiejtata ioon aolepen lal̦ in.” (Sam 83:18) Meñe ruutiej ro remaroñ letok juon menin letok ñan kõj ak ejjab joñan an aorõk wõt menin letok eo an Anij eo Eutiejtata.

Kein karuo, Anij ej ‘Jemãd.’ (Aiseia 63:16) Ewi wãween? Eokwe, e eo ear letok mour ñan kõj. Bareinwõt, el̦ap an kaorõk kõj ãinwõt an juon jemãn l̦ap an yokwe im kaorõk ajri ro nejin. Ke Anij ear kõnono kõn jet iaan armej ro an ilo iien ko etto, ear ba: “Israel, kwõj nejũ jitõnbõro, ajri eo el̦aptata aõ yokwe.  . . Bũruõ eobrak kõn kwe; Inaaj tũriam̦okake eok.” (Jeremaia 31:20, UBS) Ãindein bar wãween an Anij watõk armej ro an ilo raan kein. Ejjab baj Rũkõm̦anm̦an eo wõt eutiej ak ej bar Jemãd im eo M̦õttad. Men in ejjab ke kaalikkar bwe menin letok ko ad jãne rel̦ap aer aorõk?

Jet menin letok relukkuun aorõk ippãd kõnke eo ear litoki ear litok kõn an yokwe kõj, im jab kõnke ear juon men ej aikuj kõm̦m̦ane. Juon eo ej lel̦o̦k menin lel̦o̦k ko jãn bũruon ejjab kõtmãne bwe armej eo en bar karo̦o̦ll̦o̦k on̦ãn jouj eo an.

Kõn an Anij yokwe kõj, ear letok Nejin bwe en mej kõn kõj. Baibõl̦ ej ba: “Wãween dein an Anij kar kwal̦o̦k yokwe eo an ñan kõj: ear jilkintok Nejin eo ej make wõt.” Etke? “Bwe jen maroñ mour kõn e.” (1 Jon 4:9, UBS) Anij ear ke aikuj kõm̦m̦ane men in? Ejjab! Katok in mour eo an Jijej ej juon wãween ej kwal̦o̦k kõn jouj eo el̦ap an Anij.​—Rom 3:24, UBS.

Etke menin letok eo an Anij ej kwal̦o̦k jouj eo an el̦ap? Baibõl̦ ej ba: “Anij ear kwal̦o̦k dettan yokwe eo an el̦ap ñan kõj; bwe ilo iien eo ke jaar pãd ilo jerawiwi Kũraij ar mej kõn kõj.” (Rom 5:8, UBS) Kõn an Anij l̦ap an yokwe, men in ear kõm̦akũti bwe en jipañ im lo̦mo̦o̦ren kõj, ro me rejerawiwi im ejjel̦o̦k aer kõjatdikdik. Ejjab tõllo̦kid bwe en kar kõm̦m̦ane men in ñan kõj, im jejjab maroñ karo̦o̦ll̦o̦k on̦ãn jouj in an. Menin letok in an ej kaalikkar yokwe eo an el̦ap, im ejjel̦o̦k juon ilo lal̦ in enañin kwal̦o̦k kain yokwe rot in ijello̦kun wõt E.

Jej bar kaorõk jet menin letok kõnke eo ear litoki ear aikuj kaarmejjeteik elõñ men ko bwe en maroñ litok men kein. Ñe juon armej ej m̦õn̦õn̦õ in ajetok juon men me el̦ap an aorõk ippãn, jenaaj lukkuun kõjparoke im kaorõke.

Anij ear “letok Nejin eo ej make wõt.” (Jon 3:16, UBS) Mel̦el̦ein bwe Jeova ear letok eo ej make wõt aorõktata ippãn. Ium̦win elõñ pilien iiõ ko ke Anij ear kõm̦anm̦an men otemjej, Jijej ear pãd iturin im jerbal ippãn im ear “jitõnbõro ippãn raan otemjej.” (Jabõn Kõnnaan 8:30) Jijej ej “eo ej make wõt” nejin Anij im ej “nemãmeen wõt Anij eo jejjab maroñ loe.” (Kolosse 1:13-15, UBS) Kõn men in, erro Jemãn lukkuun epaake doon. Ejjel̦o̦k armej ilo lal̦ in me relukkuun epaake doon ãinwõt erro.

Bõtab, Anij “ear jab dãpij Nejin eo emake wõt.” (Rom 8:32, UBS) Jeova ear letok menin letok eo em̦m̦antata ñan kõj. Im meñe emaroñ kar lukkuun pen ñane ak ear m̦õn̦õn̦õ in ajetok ñan kõj.

El̦ap ad bar kaorõk jet menin letok kõnke rejejjet ñan men ko jej aikuji, ekoba ilo iien ko jej lukkuun pãd ilo aikuj. Ñan waanjoñak, jen ba bwe ewõr juon am̦ nañinmej ekauwõtata bõtab ejjel̦o̦k am̦ maroñ ñan kõl̦l̦ãik on̦ãn am̦ taktõ kõnke el̦ap on̦ãn. Ta nãj kar eñjake n̦e am̦ el̦aññe juon armej ear m̦õn̦õn̦õ in lewaj jããn ñan kõl̦l̦ãik on̦ãn am̦ taktõ bwe kwõn maroñ mour? Alikkar bwe kwõnaaj kar lukkuun kam̦m̦oolole kõn menin lewaj in an.

“Bwe ãinwõt ilo Adam ro otemjej rej mej, ãindein bareinwõt ilo Kũraij ro otemjej renaaj mour.” (1 Korint 15:22) Ãinwõt ro nejin Adam, kõj aolep jej “mej” im kõn men in ejjel̦o̦k ad maroñ ñan kõm̦m̦an bwe jen anemkwõj jãn nañinmej im mej. Bareinwõt, jejjab maroñ make kõm̦m̦an bwe jen bar jem̦jerãik Anij im jejjab maroñ make jol̦o̦k ad jerawiwi. Im ãinwõt armej ro rettã, jejjab maroñ lo̦mo̦o̦ren kõj make ak lo̦mo̦o̦ren armej ro jet. Baibõl̦ ej kaalikkar men in ilo an ba: “Juon armej ejjab maroñ lo̦mo̦o̦ren e make; Ejjab maroñ kõl̦l̦ã ñan Anij on̦ãn mour eo an . . . joñan eo emaroñ kõl̦l̦ãiki ejãmin bwe.” (Sam 49:7, 8, UBS) Kõj armej jelukkuun aikuj jipañ kõnke jejjab maroñ kõl̦l̦ãik on̦ãn mour eo me enaaj lo̦mo̦o̦ren kõj jãn jerawiwi im mej. El̦aññe en kar ejjel̦o̦k juon ej jipañ kõj, jenaaj kar mej im ejjel̦o̦k ad kõjatdikdik.

Kõn an Jeova lukkuun yokwe kõj, ear m̦õn̦õn̦õ in kõl̦l̦ãik on̦ãn mour ko an aolep armej ikijjeen Jijej bwe armej ‘otemjej ren mour.’ Ewi wãween an katok in mour eo an Jijej kõm̦m̦ane men in? “Bõtõktõkin Jijej Nejin, ej karreoik kõj jãn jerawiwi otemjej.” Alikkar bwe ilo ad tõmak ilo katok in mour eo an Jijej, men in ej kõm̦m̦an bwe Jeova en maroñ jol̦o̦k jerawiwi ko ad im en wõr ad kõjatdikdik ñan  mour indeeo. (1 Jon 1:7; 5:13) Ta eo katok in mour eo an Jijej enaaj kõm̦m̦ane ñan ro rejitõnbõro ippãd me remej? Baibõl̦ ej ba: “Bwe ãinwõt an mej kar itok kõn juon armej, ejja ãinwõt an kar jerkakpeje itok kõn juon armej [Jijej].”​—1 Korint 15:21, UBS. * (Lale kõmel̦el̦e eo itulal̦.)

Ejjel̦o̦k bar juon menin letok el̦apl̦o̦k im eaorõkl̦o̦k jãn katok in mour eo an Jijej. Etke? Kõnke eo ear letok men in eutiejl̦o̦k jãn jabdewõt im ear letoke kõn an lukkuun yokwe kõj. Elõñ men ko Jeova Anij ear kaarmejjeteiki bwe en maroñ jipañ im lo̦mo̦o̦ren kõj. Ejjel̦o̦k juon enañin kõm̦m̦ane men in ñan kõj ijello̦kun wõt e. Bareinwõt, ejjel̦o̦k bar juon menin letok me ejejjet ñan men ko jej aikuji ijello̦kun wõt katok in mour eo an Jijej me ej kanemkwõj kõj jãn jerawiwi im mej. Alikkar bwe ejjel̦o̦k bar juon menin letok el̦apl̦o̦k jãn katok in mour eo an Jijej!