1 Korint 7:1-40
7 Ak kiiõ ikijjeen men ko kom̦ kar jejetok kaki, em̦m̦anl̦o̦k ñe juon em̦m̦aan ejjab uñũr* juon kõrã.
2 Bõtab kõn wõt an l̦ap mourin l̦õñ,* kajjojo em̦m̦aan en wõr pãleen im kajjojo kõrã en wõr pãleen.
3 L̦eo en kõm̦m̦ane ijo kun̦aan ñan lio pãleen, im lio en kõm̦m̦ane ijo kun̦aan ñan l̦eo pãleen.
4 Ejjel̦o̦k an lio maroñ ioon ãnbwinnin make, bwe maroñ eo epãd ippãn l̦eo pãleen. Ejja ãindeinl̦o̦k wõt, ejjel̦o̦k an l̦eo maroñ ioon ãnbwinnin make, bwe maroñ eo epãd ippãn lio pãleen.
5 Kom̦win jab kõjekdo̦o̦n aikuj ko an doon, ijello̦kun wõt iien ko em̦õj amiro jim̦or errã kaki kõnke en wõr iien amiro jar. Bõtab ãlikin men in, komiro en kõm̦m̦an amiro iien ippãn doon bwe Setan en jab kapo kom̦ kõn ami jaje irooj ioon kõn̦aan ko ami make.
6 Ij baj kwal̦o̦k wõt ta ko kom̦ maroñ kõm̦m̦ani, ijoke ejjab kakien men kein.
7 Ilo m̦ool, ikõn̦aan bwe aolep armej ren kar ãinwõt ña. Bõtab, kajjojo ewõr aer make menin letok jãn Anij, im men kein reoktak jãn doon.
8 Ak kiiõ ñan ro ejjel̦o̦k pãleer im kõrã ro emej l̦õm̦aro pãleer, ij ba ñan er bwe em̦m̦anl̦o̦k ñe rej make iaaer ãinwõt ña.
9 Bõtab el̦aññe rejaje irooj ioon kõn̦aan ko aer make, innem ren m̦are kõnke em̦m̦anl̦o̦k ñe rej m̦are jãn ñe eurur kõn̦aan ko aer.
10 Ñan ro em̦õj aer m̦are, ij lewaj naanin kakapilõk kein, ijoke rejjab itok jãn ña bõtab rej jãn Irooj. Juon kõrã en jab etal* jãn l̦eo pãleen.
11 Ak el̦aññe lio ej etal* jãn l̦eo pãleen, en jab bar pãleek juon, ñe ejjab en jepl̦aak ñan ippãn l̦eo pãleen. Bareinwõt, juon em̦m̦aan en jab etal jãn lio pãleen.
12 Ak ñan ro jet, ij ba naan kein, aet ña im ejjab Irooj: El̦aññe jabdewõt em̦m̦aan ej juon rũttõmak bõtab kõrã eo pãleen ejjab, ijoke lio ekõn̦aan wõt mour ippãn, innem l̦eo en jab etal jãne.
13 Im el̦aññe jabdewõt kõrã ej juon rũttõmak bõtab l̦eo pãleen ejjab, ijoke l̦eo ekõn̦aan wõt mour ippãn, innem lio en jab etal jãne.
14 Unin ej kõnke l̦eo me ejjab rũttõmak eokkwõjarjar kõn wõt lio pãleen, im lio me ejjab rũttõmak eokkwõjarjar kõn wõt l̦eo pãleen. Ñe en kar jab ãindein, ajri ro nejimi reban kar kwõjarjar, bõtab renaaj kar ettoon.
15 Ijoke, el̦aññe eo ejjab rũttõmak ej pepe in etal,* innem en etal. Ñe ej wal̦o̦k wãween in, ejjab menin aikuj ñan an em̦m̦aan ak kõrã eo me ej rũttõmak pãdwõt ippãn eo pãleen. Anij ej lewaj aenõm̦m̦an ñan kom̦.
16 Kõrã ran̦, kom̦ij jab jel̦ã ke bwe kom̦ maroñ lo̦mo̦o̦ren l̦õm̦aro pãleemi? Ak l̦õm̦aran̦, kom̦ij jab jel̦ã ke bwe kom̦ maroñ lo̦mo̦o̦ren lim̦aro pãleemi?
17 Kajjojo armej en mour ekkar ñan men ko em̦õj an Jeova* lil̦o̦k ñane im ilo wãween eo ear pãd ie ke Anij ear kũri. Ij jiroñ aolep eklejia ko bwe ren l̦oore naanin tõl in.
18 Ewõr ke jabdewõt em̦m̦aan em̦õj kadede an kar m̦wijm̦wij* ke Anij ear kũri? El̦aññe aet, en jab jol̦o̦k an m̦wijm̦wij. Ewõr ke jabdewõt em̦m̦aan ejjañin kar m̦wijm̦wij ke Anij ear kũri? El̦aññe aet, en jab m̦wijm̦wij.
19 Ejjab aorõk m̦wijm̦wij im ejjab aorõk jab m̦wijm̦wij, men eo eaorõk in ej pokake kien ko an Anij.
20 Aolep ren pãdwõt ilo wãween eo rar pãd ie ke Anij ear kũr er.
21 Kwaar ke juon ri-kõm̦akoko ilo iien eo Anij ear kũr eok? Jab inepata kõn men in, bõtab el̦aññe epel̦l̦o̦k juon ial̦ ñan am̦ anemkwõj, kwõn bõke.
22 Jabdewõt ri-kal̦ooran Irooj im ear juon ri-kõm̦akoko ilo iien eo kar kũri, ej kiiõ juon eo eanemkwõj im ej an Irooj. Bareinwõt, jabdewõt eo ear anemkwõj ilo iien eo kar kũri, ej kiiõ juon ri-kõm̦akoko an Christ.
23 Em̦õj wiaik kom̦ kõn juon on̦ããn. Kom̦win bõjrak jãn ami ri-kõm̦akoko ñan armej.
24 Ro jeiũ im jatũ, aolep ren pãdwõt ilo wãween eo rar pãd ie im̦aan mejãn Anij ke kar kũr er.
25 Ak kiiõ ikijjeen ro rej bõjin,* ejjel̦o̦k kien ippa jãn Irooj, bõtab ikõn̦aan baj kwal̦o̦k wõt aõ l̦õmn̦ak. Bareinwõt, kõnke Irooj ear kwal̦o̦k tũriam̦o ñan ña, kom̦ maroñ tõmak naan kein aõ.
26 Kõn men in, ij l̦õmn̦ak em̦m̦an ñe juon en pãdwõt ilo wãween eo ej pãd ie kiiõ, kõn wõt an l̦ap apañ ilo raan kein.
27 Kwe ke juon em̦m̦aan eo ewõr pãleen? Bõjrak jãn am̦ pukot kilen am̦ etal jãn lio pãleem̦. Kwe ke juon em̦m̦aan eo ejjel̦o̦k pãleen? Bõjrak jãn am̦ kappok pãleem̦.
28 Ak el̦aññe kwõnaaj m̦are, ejjel̦o̦k jerawiwi en̦ kwõj kõm̦m̦ane, im el̦aññe juon bõjin ej m̦are, ejjel̦o̦k jerawiwi en̦ ej kõm̦m̦ane. Bõtab, ro rej m̦are renaaj iioon eñtaan ilo mour ko aer.* Kõn men in, ij kajjioñ bõbraik an wal̦o̦k men in ñan kom̦.
29 Ro jeiũ im jatũ, ikõn̦aan bar ba ñan kom̦ bwe ekadu iien kiiõ. Jãn kiiõ im ilo̦k, em̦m̦aan ro ewõr pãleer ren kõm̦m̦an ãinwõt ñe ejjel̦o̦k pãleer,
30 ro rej jañ ren kõm̦m̦an ãinwõt ñe rejjab jañ, ro rej m̦õn̦õn̦õ ren kõm̦m̦an ãinwõt ñe rejjab m̦õn̦õn̦õ, im ro rej wia ren kõm̦m̦an ãinwõt ñe ejjab m̦weieer men ko rej wiaiki.
31 Im ro rej kõjerbal men ko an lal̦ in, ren kõm̦m̦an ãinwõt ñe rejjab lukkuun kõjerbali, kõnke men ko rej wal̦o̦k ilo lal̦ in rej oktakl̦o̦k.
32 Ilo m̦ool, ikõn̦aan bwe en ejjel̦o̦k ami inepata. Em̦m̦aan eo ejjel̦o̦k pãleen ej l̦õmn̦ak* kõn men ko an Irooj, kõnke ej l̦õmn̦ak kõn wãween an maroñ kabuñbũruon Irooj.
33 Bõtab em̦m̦aan eo em̦õj an m̦are ej l̦õmn̦ak* kõn men ko an lal̦ in, kõnke ej l̦õmn̦ak kõn wãween an maroñ kabuñbũruon lio pãleen,
34 im men in ekõm̦m̦an an m̦ad. Bareinwõt, kõrã eo ejjel̦o̦k pãleen, ekoba bõjin eo, ej l̦õmn̦ak* kõn men ko an Irooj, kõnke ej l̦õmn̦ak kõn wãween an maroñ kwõjarjar ãnbwinnin im l̦õmn̦ak* ko an. Bõtab, kõrã eo em̦õj an m̦are ej l̦õmn̦ak* kõn men ko an lal̦ in, kõnke ej l̦õmn̦ak kõn an maroñ kabuñbũruon l̦eo pãleen.
35 Ij ba men in ñan jipañ kom̦, ejjab bwe in kapañ* kom̦, ak ej ñan kõm̦akũt kom̦ ñan kõm̦m̦ane men eo ejim̦we im bwe kom̦win lukkuun lel̦o̦k kom̦ make ñan Irooj im jab m̦ad.
36 Ak el̦aññe jabdewõt eo ejjañin pãlele ejjab maroñ dãpij kõn̦aan eo an ñan pãlele, im el̦aññe em̦õj an el̦l̦ãl̦o̦k jãn iiõ ko an jo̦dikdik, innem eñin men eo en kõm̦m̦ane: En kõm̦m̦ane men eo ekõn̦aan, ejjab jerawiwi men in. Kõtl̦o̦k bwe armej in en m̦are.
37 Bõtab el̦aññe em̦õj an juon pepe ilo bũruon im ej lo bwe ejjab menin aikuj ñan an pãlele, im ejel̦ã irooj ioon kõn̦aan ko an im em̦õj an jek ilo bũruon bwe eban m̦are, enaaj l̦ap an jeraam̦m̦an.
38 Bareinwõt, jabdewõt eo ej m̦are, enaaj l̦ap an jeraam̦m̦an. Bõtab, eo ejjab m̦are, enaaj l̦apl̦o̦k an jeraam̦m̦an.
39 El̦aññe em̦õj an juon kõrã m̦are, kien ej liãpe ñan l̦eo pãleen toon wõt an l̦eo mour. Bõtab, el̦aññe l̦eo emej,* innem kõrã eo emaroñ m̦areik jabdewõt eo ekõn̦aan, ijoke en m̦are wõt ilo Irooj.
40 Bõtab ilo aõ l̦õmn̦ak enaaj l̦apl̦o̦k an m̦õn̦õn̦õ ñe ejjab bar m̦are. Ij lukkuun tõmak bwe jetõb kwõjarjar* eo an Anij ej bar pãd ippa.
Footnotes
^ Mel̦el̦ein, babu ippãn.
^ Naan eo ilo kajin Grik ej por·nei′a. Lale “L̦õñ” ilo Kõmel̦el̦e Ko.
^ Ak “jenolo̦k.”
^ Ak “jenolo̦k.”
^ Ak “jenolo̦k.”
^ Lale “Jeova” ilo Kõmel̦el̦e Ko.
^ Lale “M̦wijm̦wij” ilo Kõmel̦el̦e Ko.
^ Ak “ro rejjañin m̦are.”
^ Kajin Grik, “eñtaan ko ilo kanniõk.”
^ Kajin Grik, “inepata.”
^ Kajin Grik, “inepata.”
^ Kajin Grik, “inepata.”
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
^ Kajin Grik, “inepata.”
^ Kajin Grik, “lukwõj.”
^ Kajin Grik, “ekiki.”
^ Ak “kajoor.” Lale “Jetõb kwõjarjar” ilo Kõmel̦el̦e Ko.
