1 Korint 11:1-34
11 Kom̦win anõke ña, ãinwõt aõ anõke Christ.
2 Ij nõbar kom̦ kõnke kom̦ij keememej ña ilo men otemjej im kom̦ij kanooj l̦oor men ko* iar katakin kom̦ kaki.
3 Bõtab ikõn̦aan bwe kom̦win jel̦ã bwe bõran jabdewõt em̦m̦aan ej Christ, im bõran kõrã ej em̦m̦aan, im bõran Christ ej Anij.
4 Jabdewõt em̦m̦aan eo ej kalbubuuk bõran ñe ej jar ak kwal̦o̦k kanaan ko, ej kajook bõran.*
5 Bõtab jabdewõt kõrã eo ejjab kalbubuuk bõran ñe ej jar ak kwal̦o̦k kanaan ko, ej kajook bõran,* kõnke ejjel̦o̦k oktakin kõrã in jãn juon kõrã eo em̦õj pil̦õl̦e bõran.
6 El̦aññe juon kõrã ejjab kalbubuuk bõran, ej aikuj m̦wijit kool̦an bõran, bõtab el̦aññe ej juon menin kajjookok ñan an juon kõrã m̦wijit kool̦an bõran ak pil̦õl̦, innem ej aikuj kalbubuuk bõran.
7 Juon em̦m̦aan ejjab aikuj kalbubuuk bõran kõnke ej nemãmeen Anij im ej kwal̦o̦k aiboojoj an Anij, bõtab kõrã ej kwal̦o̦k aiboojoj an em̦m̦aan.
8 Bwe em̦m̦aan ear jab itok jãn kõrã, bõtab kõrã ear itok jãn em̦m̦aan.
9 Bareinwõt, kar jab kõm̦anm̦an em̦m̦aan kõn wõt kõrã, bõtab kar kõm̦anm̦an kõrã kõn wõt em̦m̦aan.
10 Eñin unin juon kõrã ej aikuj kalbubuuk bõran kõnke ej ãinwõt juon kõkal̦l̦en an kõttãik e ñan eo ej bõran, im bareinwõt kõn enjel̦ ran̦.
11 Ijoke ilo laajrak eo an Irooj, kõrã ejjab jenolo̦k jãn em̦m̦aan im em̦m̦aan ejjab jenolo̦k jãn kõrã.
12 Ãinwõt an kar kõrã itok jãn em̦m̦aan, ãindein bareinwõt em̦m̦aan ear l̦otaktok jãn kõrã. Meñe ãindein, ak men otemjej rej itok jãn Anij.
13 Kom̦win make etale men in: Ekkar ke bwe juon kõrã en jar ñan Anij ñe ejjab kalbubuuk bõran?
14 Wãween kar kõm̦anm̦an armej ejjab katakin kom̦ ke bwe ej juon menin kajjookok ñe eaetok bõran juon em̦m̦aan,
15 bõtab ñan juon kõrã, ej juon men ej bõktok aiboojoj ñane ñe eaetok kool̦an bõran? Unin ej kõnke kar lel̦o̦k kool̦an bõran im jab juon kein kalbubu.
16 Ijoke el̦aññe jabdewõt ekõn̦aan akwããl bwe jen l̦oori m̦anit ko jet, eokwe ejjel̦o̦k bar ammim m̦anit, im ebar ejjel̦o̦k an eklejia ko an Anij.
17 Ilo aõ kwal̦o̦k naanin jiroñ kein, ijjab nõbar kom̦ kõnke kom̦ l̦ak kweilo̦k ippãn doon, ejjab em̦m̦anl̦o̦k ñan kom̦ bõtab ej nanal̦o̦k wõt.
18 M̦oktata, ij roñ bwe ñe kom̦ij kweilo̦k ippãn doon ãinwõt juon eklejia, ewõr jepel bõro ibwiljimi, im ewõr aõ l̦õmn̦ak bwe em̦ool men in.
19 Ilo m̦ool, enaaj wõr ro rej kõm̦m̦an aer make kumi ibwiljimi, kõnke ilo wãween in en alikkar wõn ro Anij ebuñbũruon ippãer.
20 Ñe kom̦ij kweilo̦k ippãn doon ilo juon jikin, kom̦ij jab kweilo̦kl̦o̦k bwe kom̦win m̦õñã ilo Kõjota eo an Irooj.
21 Kõnke m̦okta jãn an jino iien m̦õñã, kajjojo iaami ej kañi m̦õñã ko kijen m̦okta. Eñin unin jet iaami rekwõle ak bar jet rekadek.
22 Ta ejjel̦o̦k im̦õmi make ñan ami m̦õñã im idaak ie ke? Ke ta, kom̦ij kajjioñ kajejtokjãn eklejia eo an Anij im kajook ro ejjel̦o̦k jabdewõt men ippãer ke? Inaaj ba ta ñan kom̦? Ij aikuj ke nõbar kom̦? Iban nõbar kom̦ kõn men in.
23 Iar bõk jãn Irooj men eo ij bareinwõt katakin kom̦ kake, eñin ej bwe ilo boñõn eo rar pojakin ketake Irooj Jesus, ear bõk juon bũreet
24 im ãlikin an kam̦m̦oolol Anij, ear kõrrãjete ñan elõñ m̦õttan im ba: “Men in ej kõkkar kõn ãnbwinnũ, eo inaaj katok kake kõn kom̦. Kom̦win wõnm̦aanl̦o̦k wõt im kõm̦m̦ane men in ilo ememej eõ.”
25 Ear bar kõm̦m̦ane ejja men in wõt kõn cup eo ãlikin wõt aer kõjota, ear ba: “Cup in ej kõkkar kõn bujen eo ekããl, eo bõtõktõkũ ej kapene. Kom̦win wõnm̦aanl̦o̦k wõt im kõm̦m̦ane men in ilo ememej eõ iien otemjej kom̦ij idaake.”
26 Iien otemjej kom̦ij m̦õñã bũreet in im idaak jãn cup in, kom̦ij kwal̦o̦k kõn mej eo an Irooj, m̦ae iien enaaj itok.
27 Kõn men in, jabdewõt eo ej m̦õñã bũreet in ak idaak jãn cup eo an Irooj bõtab ejjab tõllo̦kũn, enaaj wõr ruõn n̦ae ãnbwinnin im bõtõktõkin Irooj.
28 M̦oktata, juon armej ej aikuj etale bũruon make ñan lale el̦aññe ej tõllo̦kũn, innem ej kab naaj m̦õñã bũreet im idaak jãn cup eo.
29 Jabdewõt eo ej m̦õñã ak idaak ilo an jab kile joñan aorõkin mel̦el̦ein ãnbwinnin Irooj, ej liaakel̦o̦k e make ñan ekajet ilo an m̦õñã im idaak.
30 Eñin unin elõñ iaami rem̦õjn̦o̦ im nañinmej, im ebar lõñ iaami remej.*
31 Bõtab el̦aññe jej etale kõj make bwe jen jel̦ã jepãd ia, jeban bõk ekajet.
32 Ijoke el̦aññe jej bõk ekajet, Jeova* ej kajim̦we kõj. Ilo wãween in, eban liaakel̦o̦k kõj ippãn lal̦ in.
33 Kõn men in, ro jeiũ im jatũ, ñe kom̦ij kweilo̦k ippãn doon bwe kom̦win m̦õñã ilo iien kõjota in, kom̦win kõttare doon.
34 El̦aññe jabdewõt ekwõle, en m̦õñã ilo m̦weo im̦õn, kõnke iien ami kweilo̦k en jab oktak im iien ekajet. Ak kiiõ ikijjeen men ko jet, inaaj kajim̦wi ñe itõpar waj jen̦e.
Footnotes
^ Kajin Grik, “m̦anit ko.”
^ Ak “eo ej bõran.”
^ Ak “eo ej bõran.”
^ Men in ej jitõñl̦o̦k ñan mej ilo tõmak.
^ Lale “Jeova” ilo Kõmel̦el̦e Ko.
