Navyalilwe umu Montreal, umusumba ukalamba umu citungu ca Quebec uku Canada. Mangulenzi na atowane yaili alumendo twakulile umu ncende isuma iya Rosemont nupya avyazi itu yatutemilwe sana. Twaipakizyanga ukwikala capamwi umi uwaula ivyongo nupya uwa mutende.

Lino nali umulumendo natemilwe sana ukuwelenga Baibo. Nkaiusya lino nali ni myaka 12 ala nkuwelenga Upangano Upya pali Yesu nupya natemilwe sana ilyasi lili. Pa mulandu na vino nasambilile pali vino wakweti ukutemwa ni cikuuku kuli yauze nalondanga ukumukolanya. Icifileko i cakuti ukulondesya ukucita vivyo kwayanga kukucepa lino nayanga nkukula nupya natandike ukucina na antu ali ni miyele iipe.

Ya tata yamanyile sana ukulizya ipenga lino yakati saxophone, nupya yampeezile ipenga lilyo nupya yalenzile ukuti ntemwe sana inyimbo nu kwikako sana amano. Natemilwe sana inyimbo icakuti nasambilile zuwa ukulizya banjo. Pataalengile, napanzile kaliumba ka kwimba na anji yamwi nupya twayanga umu ncende izipusane pusane umu kwimba. Ya kapanga ya nyimbo yamwi amanyikwa sana yandolanga nupya izile nu kunena ukuti yangazwako ukupanga inyimbo. Nasaine ivipepala na kampani ikulu iikalekoda. Inyimbo zino nimbanga zyamanyikwe sana nupya yazilizyanga sana pa cilimba umu Quebec.

Nalolekanga ukuti nakweti vyonsi vino nalondanga ukukwata. Nali nene mwance nu kumanyikwa sana, nakwatanga sana impiya nupya natemilwe vino nacitanga. Kasanya nayanga umu kutukusya umwili muno yakatukusizya, ukusimika ivyacitike, ukusainila antu siginica wane nu kulolekela pa TV. Usiku nayanga umu kwimba nu kuya uku mapaate. Pakuti nkwanisye ukwimba pa maumba ya antu yano yantambanga natandike ukumwa uwengwa ala ncili umwance sana nomba nizile intandika nu kuomvya imilembo ikavulunganya uwongo. Nupya nailekeliizye nupya nacitanga ivintu iviipe.

Yamwi yakumbwanga uwikalo wane pano nalolekanga ukuya uwa nsansa. Nomba umu kasi nayuvwanga ukuti ntali ni nsansa nupya ntacindime sana sana nga indi nenga. Nuvwanga ulanda nupya nasakamalanga sana. Ni caifile sana icakuti lino natandike ukuomba ningo sana nu kumanyikwa yakapanga ya nyimbo yaili angazwanga yafwile nu ulwalwe wakwe AIDS. Nazungwike sana. Nanti icakuti natemilwe sana ukwimba inyimbo, umi uno nikalanga pa mulandu ni nyimbo wali uwipisye.

Nanti icakuti naombanga ningo sana nupya nakweti impiya, namanyile ukuti umu nsi mwali cimwi icitaali ningo. U mulandu ci uno mwayelile sana ulufyengo? Nalenganyanga pa mulandu uno Leza atacitiilangapo ivili vyonsi. Nupya ilingi napepanga kuli Leza ukuti angasuke. Lino napuzangako, natandike ukuwelenga Baibo nupya. Nanti icakuti ntuvwikisyanga ivingi vino nawelenganga, nasondwelile ukuti impela ya nsi ifwile ili umupipi.

Lino nawelenganga Baibo, nazanyile ukuti pa nsita imwi Yesu ataalilepo pa manda 40 lino wali umu lwanga. (Mateo 4:1, 2) Nelenginye ukuti ndi cakuti avino nani nacisile, limwi Leza angaisokolola kuli nene, fwandi napanzile uwanda uno nali nu kutandika. Ala kwasyala imilungu ili ukuti inte ukulya, ya Nte Yakwe Yeova yaili izile apa ng’anda pane, nupya papo kwene nayanenyile ukuti ingile. Nalolekisye Nte wenga izina lyakwe a Jacques nu kumuzya ukuti, “Tungamanya uli ukuti tukwikala umu manda akusyalikizya?” Pakungasuka wakupwile Baibo nu kuwelenga ilembelo lyakwe 2 Timoti 3:1-5. Nuzizye ya Nte ya yaili amauzyo aingi nupya natemilwe sana ukuvwa ivyasuko ivikumanile vino yangaswike ukufuma umu Malembelo. Lino yantandalile pa miku imwi, nilwike ukuti ntalinzile ukuta ukulya.

Natandike ukusambilila Baibo na ya Nte. Nasusile impela inyele zyane izitali nupya natandike ukuya umu kulongana apa Ng’anda ya Wene iyayelile umupipi. Vino yampokelelanga ningo pa kulongana kuu vyalenzile nsininkizye ukuti natinzana icumi.

Mu cumi cumi pakuti nalondela vino nasambililanga muli Baibo, nalondekwanga ukusenuka sana. Nalondekwanga ukuta ukuomvya imilembo ikavulunganya uwongo nu kuta imiyele iipe ino nakweti. Nupya nalondekwanga nu kuta ukuitemwa nu kutandika ukwika amano uku yantu yauze. Vino nakweti ana yaili yano nasunganga nenga nalondekwanga ukumanya ivya kuyasakamala muli vino yakulondekwa aineco na muli vyakwe Leza. Fwandi natiile ukwimba inyimbo nu kwingila incito ino nafolanga ulupiya ulunono.

Ukusenuka muli vii kutangwike. Lino naombelanga pa kuta ukuomvya imilembo iikavulunganya uwongo, nakwatanga uwavya pano ilingi nalwalanga fwandi naswililanga umu kuomvya milembo kwene iyo pa maila yamwi. (Loma 7:19, 21-24) Ukuta imiyele iipe nako kwene kwatazile. Nupya incito ino natandike ukuomba yantonsyanga sana nupya nafolanga ulupiya ulunono. Cansendelanga imyezi itatu pakuti sile nkwate impiya zino nakwatanga umu maawala sile yaili lino nimbanga.

Ipepo lyangazwile ukwezya na maka ukuombesya ukusenuka umu vintu vivyo. Nupya ukuwelenga Baibo nako kwacindime sana. Amalembelo yamwi yangazwilizye sana. Ilembelo lyonga i lyakwe 2 Kolinto 7:1 ilikakomelezya Aina Klistu “kufumako ku vintu vyonsi vino vikakowezya mili nga ni mipasi” yao. Lyuze ilyangazwilizye ukusininkizya ukuti ningata imiyele iipe ino nakweti i lyakwe Filipi 4:13 ilikalanda ukuti: “Klistu wampeela maka akulungatana ni miyele ili yonsi.” Yeova Leza waswike amapepo yane nu kungazwa ukutandika ukuvwikisya nu kulondela icumi ca muli Baibo. Ukucita vii kwalenzile injipeele kuli aliwe. (1 Petulo 4:1, 2) Nawatiziwe umu 1997 nu kuya Inte Yakwe Yeova.

Nasininkizya ukuti ndi cakuti ntaasenwile imiyele yane, ndi nafwa ino nsita. Nomba nkaipakizya umi nupya naya sana ni nsansa. Napaalwa sana pa kukwata mamane umusuma cuze Elvie. Tukaipakizya ukusambilizya yauze Baibo capamwi muli upainiya. Cii cikalenga inje sana ni nsansa. Nkataizya sana Yeova pa kumpalamika kuli aliwe.—Yoane 6:44.