Navyalilwe umu musumba uwa Sakesyifehava (Székesfehérvár), ku Hungary, umwali antu akankala pa myaka ukucila pali 1,000 uku cisila. Lelo, ncili nkaiusya iviipe ivyacitike umu musumba uwa, pa mulandu ni nkondo ya nsi yonsi yakwe ciili.

Lino nali umwance, nikalanga na kuuku na mama. Nkaiusya ukuti yantemilwe sana, maka maka mama uwi zina lyakuti Elizabeti. Wangazwile ukutaila sana Leza. Kufuma lino nali ni myaka itatu, cila wanda manguzi twapepelanga pamwi nawe ipepo lino insita zimwi likaamwa ukuti Ipepo Lya Mwene. Lelo nanti cali vivyo, nizile imanya upiliulo uwi pepo lilyo lino nali ni myaka mu ma 20.

Lino nali umwance nikalanga pali mama na kuuku pa mulandu wakuti avyazi yane yaombanga musanya nu usiku pakuti yakale ing’anda isuma. Lyonsi pa Cibelusi cakwe ciili umu mwezi, twakolongananga nu kuliila capamwi icakulya nga ulupwa. Natemwanga sana tusita tuno twayanga pamwi.

Umu 1958, vino avyazi yane yalondanga vyacitike, yakwanisye ukukala ing’anda muno twali nu kulaikala. Lyene natemilwe sana vino natandike ukwikala na avyazi yane! Nomba lino papisile imyezi 6, ivintu vyasenwike, ya tata yafwile pa mulandu nu ulwale wakwe kansa.

Nuvwile sana ulanda. Nkwiusya ukuti napefile ati: “Leza, nakulenzile ukuti upususye ya tata, nkuyalonda, nomba i cani cino utaasukiile ipepo lyane?” Nalondesyanga ukumanya kuno ya tata yaali. Fwandi nelenganyanga inti: ‘Uzye iyaya ukwi yulu? Nanti ntalatala njalolepo nupya?’ Natandike ukukumbwa acance akweti ya isi.

Pa myaka iingi, nayanga kuno twazisile ya tata umupiipi na cila wanda. Nafukamanga api lindi pano twazisile ya tata nu kupepa inti: “Leza, napaapata, nkulonda ukumanya ukuli ya tata.” Nupya napepanga na ukuti imanye umulandu uno twayelako.

Lino nali ni myaka 13, nasoolwilepo ukusambilila ululimi lwa Cigerman. Nelenganyanga ukuti nga nkubelenga mabuku aingi aa mu Cigerman ningazana masuko uku mauzyo yano nakweti. Umu 1967, natandike ukusambilila umu musumba uwa Jena, uku Germany. Natemilwe ukubelenga mabuku aa mu Cigermany yano antu azumila umu mano ya untunze yalemvile, maka maka alandanga pa mulandu uno antunze yayelako. Nanti cakuti kwali ivisinka vimwi vino natemilwe muli vino nabelenganga masuko yene yataswikwe. Fwandi natwalilile ukupepa pakuti nzane masuko uku mauzyo yano nakweti.

Umu 1970, naswilile uku Hungary kuno nazanyile umwanaci wino nizile intwala, Rose. Pa nsita iya ali impanga iya Hungary ikateekwa na kaungwe akasi ka mu uteeko. Lino papisile insita ukufuma pano twatwaliine, Rose nani tutukile uku mpanga iya Austria. Twalondanga ukuya ikala umu musumba uwa Sydney, uku Australia, kuno yayama ikalanga.

Patalengiile, nazanyile incito umu Austria. Wanda umwi, wino naomba nawe wanenyile ukuti ningazana masuko uku mauzyo yano nakweti muli Baibo. Wampezile mabuku aingi aalandanga pali Baibo. Nabelenzile mabuku yayo umu nsita sile inono nupya nalondesyanga ukusambilila ivingi. Fwandi nalemvile kalata kuli ya Nte Yakwe Yeova aalemvile mabuku kwene yano nabelenzile nu kulenga mabuku na yauze.

Uwanda uno twakuminye umwaka ukufuma pano twatwaliine na Rose, Nte umwi uwacance wizile umu kututandalila. Walesile impapulo zino nalenzile nupya wanguzizye ndi cakuti ningatemwa ukusambilila nawe Baibo, nazumile. Pa mulandu wakuti nalondesyanga ukusambilila, nasoolwile ukuti twasambilila manda yaili umu mulungu nupya cila sambililo lyamalanga maawazi mupiipi na 4.

Natemilwe sana vino ya Nte yansambilizyanga ivya muli Baibo. Cantalile ukuzumila, lino yandanzile izina lyakwe Leza ilyakuti Yeova muli Baibo wane uwa mu Cihungarian. Pa myaka 27 yonsi ino nayanga uku ceici, ntatazile nuvwepo izina lyakwe Leza nanti sile umuku onga. Natemilwe sana masuko amuli Baibo auvwike. Wakwe, nasambilile ukuti afwe yakaya kwati iyakasula nupya yasimanya icili consi. (Kasambilizya 9:5, 10; Yoani 11:11-15) Nupya nasambilile nu kuti kulaya insi ipya ‘umutalaya imfwa.’ (Kusokolola 21:3, 4) Nkalondesya ukwizalola ya tata nupya, pano umu nsi ipya “kulaya ukutuutuluka.”—Milimo 24:15.

Mamane Rose nawe kwene watandike ukusambilila Baibo nu mwenzo onsi. Twalundulukanga zuwa sana nupya twamazile ibuku lino twasambililangamo pa myezi sile iili! Twazanwanga uku kulongana konsi kuno ya Nte Yakwe Yeova yakakwata apa Ng’anda ya Wene. Twatemilwe sana vino ya Nte Yakwe Yeova yatemwanine, vino yaazwananga, alino na vino yaali alemane.—Yoani 13:34, 35.

Umu 1976, mamane Rose nani yatuzumilizye ukuya uku Australia. Lino twafisile sile, twalonzile kuno tungazana ya Nte. Ya Nte yano twazanyile yatupokeliile ningo sana. Lyene umu 1978, twabatiziwe.

Lyene nazanyile amasuko uku mauzyo yano nakweti pa myaka ingi. Pa mulandu nu kupalama kuli Yeova Leza, nakwata tata umusuma sana. (Yakobo 4:8) Nupya nkatekeziwa sana pa mulandu nu upaalilo uno nakwata uwa kwizalola ya tata nupya.—Yoani 5:28, 29.

Umu 1989, mamane Rose nani twasoolwilepo ukuswilila uku Hungary pakuti tukasambilizyako ya cuza itu, ya lupwa, alino na yauze pali vino twazumilemo. Twakweti isyuko ilya kusambilizya antu aingi Baibo. Nupya pa yantu yayo antu ukucila pali 70, ukwikako na ya mayo yane yatandike ukuombela Yeova.

Pa myaka 17 napepanga ukuti nzane masuko uku mauzyo yano nakweti. Nomba ipapita imyaka 39, nupya pa myaka yonsi iyo nkapepa ukuti: “Nkukutaizya Tata wane uwa kwi yulu pa kwasuka mapepo yano napepanga lino nali umwance.”