Muli Baibo izwi ilyasenulwa “ukutuutuluka” lyafuma ukwi izwi lya Cigliki lyakuti anastasis, ilikapiliula “kukatusya” nanti “kukatusya nupya.” Umuntu wino watuutululwa ala atakatuka ukufuma kumfwa nu ukuya nu umi, wakwe vino wali lino atali afwe.—1 Kolinto 15:12, 13.

 Nanti icakuti izwi lyakuti “ukutuutuluka” litaaya umu Malembo ya Ciebele, akaamwa nu ukuti Upangano wa Mpiti, cisambilizyo cii amuno caaya. Leza walavile ukupitila muli kasesema Oseya ukuti: ‘Ndatuula antu yaa ukufuma kuzimo, nanti ku maka ya mfwa.’—Oseya 13:14; Yobo 14:13-15; Ezaya 26:19; Danieli 12:2, 13.

 Aekwi kuno antu yalatuutulukila? Antu yamwi yakatuutulukila ukwi iyulu pakuti yakaye aene pamwi na Klistu. (2 Kolinto 5:1; Kusokolola 5:9, 10) Baibo ikalanda pa yantu kwene yaa ukuti aalatandikilapo ukutuutululwa nu ukuti yalaya pa kutuutuluka kwa yafwe ukwa kutandikilako, nupya amazwi yaa yakutulangilila ukuti kulaya na yauze aalatuutululwa pa cisila. (Kusokolola 20:6; Filipi 3:11) Kutuutuluka kuuze, u kutuutululwa ukwa kuya nu umi pano nsi, nupya yonsi aalatuutululwa yalaipakizya umi.—Masamu 37:29.

 Uzye antu yalatuutululwa uli? Leza wapeela Yesu amaka aakuti akatuutulule yonsi afwa. (Yoani 11:25) Yesu alatuutulula “yonsi aya umu malindi” yakaye nu umi nupya, alino yalatuutuluka mu musango wakuti yalamanyikwa vino yaali, nupya yaliusya antu yao. (Yoani 5:28, 29) Yonsi alatuutulukila ukwi iyulu yalaya ni miili ya mupasi, lelo yonsi aalatuutululwa nu kuya nu umi pano nsi yene yalaya ni miili isuma, iimalilike.—Ezaya 33:24; 35: 5, 6; 1 Kolinto 15:42-44, 50.

 Aaweni aalatuutululwa? Baibo ikati “kulaya ukutuutuluka kwa yantu alungame na asi alungame.” (Milimo 24:15) Pa yantu alungame palaya na antu aali nu utailo, wakwe Nowa, Sala, na Abulahamu. (Utandiko 6:9; Aebele 11:11; Yakobo 2:21) Asi yalungame yalaya antu yano yatacitanga vino Leza akalonda lelo aatakweti isyuko lyakusambilila pali vino Leza akalonda nu kulavicita.

 Nomba yonsi aakacita iviipe akuti yasilonda nu kusenuka yene yatalatuutululwa. Antu yaayo nga yafwa sile, yakaafwa icakuti kusiya nu upaalilo wakuti yangiiza yaaye nu umi nupya.—Mateo 23:33; Aebele 10:26, 27.

 A lilaci lino kulaya ukutuutuluka? Baibo yasoowile ukuti ukutuutulukila ukwi iyulu kulayako lino Klistu alaateeka, nupya watandike ukuteeka umu 1914. (1 Kolinto 15:21-23) Lyene ukutuutuluka kwa yantu aalikala pano nsi, kulayako umu myaka 1000 iyakuteeka kwakwe Yesu Klistu, lino insi ilaya paladaise.—Luka 23:43; Kusokolola 20:6, 12, 13.

 Umulandu uno tungatailila ukuti kulaya ukutuutuluka. Baibo ikalanda pa yantu 9 aatuutulwilwe, nupya yonsi kwene kwali aasininkizye ukuti yatuutulwilwe. (1 Yamwene 17:17-24; 2 Yamwene 4:32-37; 13:20, 21; Luka 7:11-17; 8:40-56; Yoani 11:38-44; Milimo 9:36-42; Milimo 20:7-12; 1 Kolinto 15:3-6) Vino Yesu watuutulwile Lazaro cikalenga ukuti twakomeleka sana pa mulandu wakuti, pano Lazalo wafwilile papisile amanda 4 nupya Yesu wacisile icizungusyo ala na antu aingi yakulolako. (Yoani 11:39, 42) Nanti sile ayaaya kwene aakanyanga Yesu yasininkizye icisinka cii, fwandi yalondanga nu kuti yakome Yesu na Lazalo kwene.—Yoani 11:47, 53; 12:9-11.

 Baibo ikalanga ukuti Yeova wakwata amaka nupya akalondesya ukutuutulula antu afwa. Akaiusya vyonsi pa yantu yano alatuutulula nupya alayatuutulula ukuomvya amaka yakwe aacila amaka yonsi. (Yobo 37:23; Mateo 10:30; Luka 20:37, 38) Leza wakwata amaka aakutuutulula afwe ukuti yakaye nu umi nupya, nupya akalonda kucita vivyo kwene! Pa kutuutululwa ukulaya uku nkoleelo, Baibo ikalanda pali Leza ukuti: “Ulandonda ne ciumbwa cako nu kundola.”—Yobo 14:15.

Ufi uno yakalanda pa kutuutuluka

 Ufi: Kutuutululwa kukalenga umupasi nu mwili iviya pamwi.

 Icisinka: Baibo ikasambilizya ukuti umupasi uukalenga umuntu ukuya nu umi, asi icintu cino cikatwalilila ukuya nu umi umuntu nga wafwa. (Utandiko 2:7; Ezekelo 18:4) Umupasi usiiza iuya pamwi nu mwili wa muntu; lelo umuntu nga watuutululwa akapangwa cipya cipya nu kuya nu umi nupya.

 Ufi: Antu yamwi yakaatuutululwa nupya paapo kwene iyonoonwa.

 Icisinka: Baibo ikati “acitanga iviipe yalatuutulukila uku upinguzi.” (Yoani 5:29) Nomba, kupingulwa kuu asi kwa vintu vino yacitanga lino yatali yafwe, lelo a pa vintu vino yalaacita pa cisila ca kutuutululwa. Yesu watiile: “Afwe yaluvwa izwi lya Mwana wakwe Leza, nupya yano yuvwa yalaya nu umi.” (Yoani 5:25) Yaayo ‘aaluvwa’, nanti aaluvwila vino yalasambilila pa cisila ica kutuutululwa, yalalembwa umu “lupapulo lwa umi.”—Kusokolola 20:12, 13.

 Ufi: Muntu nga watuutululwa, alaya nu mwili kwene uno wali nao lino atali afwe.

 Icisinka: Umuntu nga wafwa, umwili ukaonooneka nu kuola.—Kasambilizya 3:19, 20