• Kusoololwa na Leza. “Natindasika mpiti umwene wane . . . namakupeela inko zyonsi. Insi yonsi pano yapelela imaya iyakwako.”—Masamu 2:6, 8.

• Kufuma umu mupanda wa Mwene Davidi. “Umwana watatuvyalilwa, yatiyatupeela umwana umonsi . . . Uwene wakwe ulandalila konsi konsi. Ulasyukila ulongo ulutalasila. Wene alikala apa cifulo ca wene wakwe Davidi nga nu kuteeka uwene wakwe. Wene alausimpa nu kuukomya.”—Ezaya 9:6, 7.

• Kuvyalilwa umu Betelemu. “We Betelemu . . . , munuli ndafumya umuntu wino alateeka . . . Ukulu wakwe ulafika nu ku mpela ya nsi.”—Mika 5:2, 4.

• Kukaanwa na antu nu kukomwa. “Wasaalukanga nu kusulwa ku antu, wali umuntu wa ulanda, wene uvwanga ukali. Swemo twamusuuzile cakuti tutalondanga nu kumulolekesya. . . . Apali ucipote witu, icalenzile ukuti yamucisole vivi. A pa mulandu wa uyi witu, icalesile kuti yamume mu musango uwa.”—Ezaya 53:3, 5.

• Kututululwa nu kupeelwa icifulo ca papela. “Pano wemo utalansya mwi lindi, nanti kuleka muomvi wako umukundwe akalole ukuola. . . . Ulandetela isyuko ilyakunzanzya, amanda pe.”—Masamu 16:10, 11.

Kufuma pano antu yaumbiilwe, umuntu wenga sile awino walinga ukuya Kateeka, nupya umuntu wiyo a Yesu Klistu. Alino, umungeli wanenyile maliya nyina wakwe Yesu ukuti: “Leza alamupeela uwene wakwe Davidi cikolwe cakwe, . . . Uwene wakwe utalatala uwe.”—Luka 1:31-33.

Yesu ataatazile aye kateeka pano nsi. Lelo, alaya Umwene wa Wene Wakwe Leza nu kuteeka antu kufuma ukwi yulu. I cani icilalenga aye kateeka musuma? Elenganyini pali vino wacisile lino wali pano nsi.

•   Yesu wasakamalanga antu. Yesu wazwilizyanga aonsi na anaci, ance na ikolo asi mulandu ni nkulilo yao nanti imikalile yao. (Mateo 9:36; Mako 10:16) Lino uwalwile tembwe wamulenzile ukuti: “Ndu kasi ungampozya,” Yesu wamuvwilile uluse nu kumupozya.—Mako 1:40-42.

• Yesu watusambilizye ivya kuzanzya Leza. Watiile: “Mutangaombela Leza nga ni vyuma.” Walanzile nu kuti tulinzile ukucitila yauze vino tungatemwa ukuti naswe yatucitile. Nupya, walangilile nu kuti Leza atika sile mano kuli vino tukacita, lelo wika na mano kuli vino tukaelenganya nu kuyuvwa. Fwandi pakuti tuzanzye Leza, tulinzile ukuikanya muli vino tukayuvwa. (Mateo 5:28; 6:24; 7:12) Yesu walanzile nu kuti pakuti tuye ni nsansa, tulinzile ukumanya vino Leza akalonda twacita nu kucita vivyo kwene.—Luka 11:28.

• Yesu wasambilizye vino cikapiliula ukutemwa yauze. Vino Yesu walandanga nu kucita, vyafikanga antu yano wasambilizyanga pa mwenzo. “Maumba yazunguka misambilizizye yakwe. Wene atasambilizyanga wakwe yakasambilizya ya masunde, lelo wa muntu akweti maka.” (Mateo 7:28, 29) Wayasambilizye ukuti: “Temwini anisi inu.” Nupya wapeepileko na yano yamukomile ukuti: “Tata, uyelele, pano yatamanyile cino yakucita.”—Mateo 5:44; Luka 23:34.

Yesu walinga sana ukuya Kateeka wa nsi yonsi uwaya ni cikuuku nupya wino alazwilizya antu yonsi. Nomba a lilaci lino alatandika ukuteeka?