ISAMBILILO 7
Uzye Uwene Wakwe Leza I Cani?
1. Uzye Uwene wakwe Leza i cani?
I vyani vikalenga kuti Yesu aye u Mwene wa mpomvu?—MAKO 1:40-42.
Uwene wako Leza ali uteeko uwaya umwiyulu. Ulasisyapo mauteeko yonsi kuti uliwo uce wateeka; alino na vino Leza akalonda, vilacitika umwiyulu na pano nsi. Cumi kwene ukuvwa vino Leza alacita ukuomvya Uwene uu, i lyasi lisuma sana. Likwene sile Uwene wako Leza ulateeka ningo cakuti na antu yalatemwa cuze. Uteeko uu uliwo ulaleka kuti antu yace yalemane pano nsi.—Welengini Danieli 2:44; Mateo 6:9, 10; 24:14.
Uwene onsi ukakwata umwene. Nu Wene wakwe Leza wakwata umwene wino Yeova wasolola. Umwene wiyo a Yesu Klistu.—Welengini Umbwilo 11:15.
Tambini vidyo ya kuti Uzye Uwene Wakwe Leza I Cani?
2. U mulandu ci uno Yesu wayela Umwene wa mpomvu?
Umwana wakwe Leza ali Mwene wa mpomvu pano wene wakwata icikuuku, kapya asilonda ivintu viipe. (Yoane 1:14) Nakupya wakwata amaka akusunga antu ningo, pano lino alaateeka insi, alaya ukwiyulu kwene. Lino Yesu watutulwike, wayile ukwiyulu nu kuyaikala ukwikasa lilungi lyakwe Yeova. (Ayebulai 10:12, 13) Lino papisile insita, alino Leza wamupeezile amaka yakutandika ukuteeka.—Welengini Danieli 7:13, 14.
3. Nga yauze aaweni alateeka na Yesu?
Kwayako iumba lya yantu akaamwa ukuti a muzilo; aaliyo yalateeka na Yesu mwiyulu. (Danieli 7:27) Atumwa yako Yesu acumi aliyo atandikiilepo ukusololwa ukuya a muzilo. Kufuma lili kwene, Yeova akasoolola aonsi na anaci acumi kuti yaye a muzilo. Antu yaa ndi yafwa, yakatutulukila ukwiyulu, wako vino cali kuli Yesu.—Welengini Yoane 14:1-3; 1 Kolinto 15:42-44.
Uzye antu yano yakaaya ukwiyulu, yaya yanga? Yesu watiile yaya sile “uufyo unono.” (Luka 12:32) Antu alaya ukwiyulu, yalaya 144,000, yonsi pamwi. Aaliyo yalaateeka insi pamwi na Yesu.—Welengini Umbwilo 14:1.
4. Uzye lino Yesu watandiike ukuteeka, ivyani vyacitike?
Uwene wakwe Leza watandiike ukuteeka umu 1914. * Na cino Umwene Yesu watandikiilepo ukucita, u kusumba Satana ni viwa vyakwe pa mpanga ya pansi. Lyene Satana wasosile icakuti watandiike ukuleta intazi mu nsi yonsi. (Umbwilo 12:7-10, 12) Kufuma lili kwene, macuzi ya antu yakalukuvula. Kwaya inkondo, vipowe, vikuko ni vilundumusi ivikulangizya ukuti likwene sile Uwene wasya utandike ukuteeka insi.—Welengini Luka 21:7, 10, 11, 31.
5. Ngu Wene wakwe Leza ukacita vyani?
Ndakayi, Uwene wakwe Leza ukakolonganya antu amu nko zyonsi nu kupanga iumba likalamba; na pa kuti cintu cico ciombeke, kwaya umulimo wakusimikila mu nsi yonsi. Lyene antu afuuke, aingi cuze, yakaiza kuli Yesu pa kuti aliwe aayateeka. Antu ya afuuke, yalacingililwa lino Uwene wakwe Leza ulonona ivintu vipe ivyaya pano nsi. Acino fwandi, yonsi aakulonda kuti yakikale ningo mu Wene wakwe Leza, yalinzile ukulauvwila Kateka Yesu.—Welengini Umbwilo 7:9, 14, 16, 17.
Pa myaka 1,000, lino Uwene ulateeka, alino vyonsi vino Leza walondanga kuti antu yace yaikala, vilacitika. Lyene impanga yonsi ilaya paladaise. Vyonsi vii nga vyaca vyacitika, alino Yesu alaswilizya Uwene kuli Isi. (1 Kolinto 15:24-26) A weni uno mukulonda kuti mukasimikileko pali vino Uwene wakwe Leza ulacita?—Welengini Masamu 37:10, 11, 29.
^ pala. 6 Nga mukulonda ukumvwikisya vino Baibolo yasoowile umwaka wa 1914, welengini pa mafwa 215-218 mwi buku ilyakuti Uzye Baibo Ikatusambilizya Vyani?
