Dan Zistwar Bann Apot 2:5-11, Labib dekrir lafoul ki ti vinn Zerizalem pou Lapantkot 33 Nou Lepok. Me apart Labib, ena osi Philon, enn ekrivin Zwif sa lepok-la, ki’nn dekrir sa lafoul-la.

Konsernan bann vwayazer ki ti vinn Zerizalem, Philon ti ekrir: “Pou sak fet, gran-gran lafoul dimounn vini depi enn kantite lavil, ena sertin travers pei, travers lamer, depi les, lwes, nor, ek sid.” Li ti osi sit seki Agripa I, ti-zanfan Erod I, ti dir dan enn let ki li ti avoy Caligula, Lanperer Romin. Dan so let, Agripa ti ekrir konsernan Zerizalem: ‘Lavil Sint . . . li pa zis kapital Zide me li osi kapital laplipar pei alantour kot li ti ena bann koloni.’

Agripa ti fer enn lalis bann landrwa kot bann koloni Zwif ti forme. Parmi ti ena bann landrwa bien lwin dan Mezopotami, Lenor Lafrik, Lazi Miner, Lagres, ek bann zil dan Mediterane. Joachim Jeremias, enn spesialis dan Labib, dir: “Mem si sa lalis-la pa mansionn dan enn fason presi ki bann Zwif ti al Zerizalem, nou konpran ki zot inn fer sa, parski li ti obligatwar ki tou bann Zwif adilt al fer enn pelrinaz laba.”​—Deteronom 16:16.

Toule lane ti ena trwa fet dan Zerizalem​—Pak, Lapantkot, ek fête des Huttes. Dan premie siek, plizir milye dimounn ti vinn Zerizalem pou sa bann fet-la. Zot ti sorti partou dan Izrael ek osi dan lezot pei kot ti ena bann Zwif. (Lik 2:41, 42; Zistwar Bann Apot 2:1, 5-11) Tou sa bann pelrin-la ti bizin trouv enn plas pou reste.

Sertin ti pas lanwit kot zot bann kamarad; lezot ti res dan bann oberz ouswa dan bann ti lotel. Boukou ti kanp dan bann latant dan lavil ouswa toutotour bann miray lavil. Pandan so dernie sezour dan Zerizalem, Zezi ti res Betani, enn vilaz akote.​—Matie 21:17.

Pre ar tanp finn dekouver plizir infrastriktir kot ena bann basin pou begne. Li posib ki sa bann batiman-la ti servi kouma bann ti lotel kot bann pelrin ti kapav reste ek begne avan zot rant dan tanp. Dan enn sa bann batiman-la ena enn linskripsion ki montre ki Theodotus, enn pret ek sef sinagog sa landrwa-la, “ti ranz enn sinagog pou lir Tora ek . . . anplis, enn lotel, bann lasam, ek bann instalasion delo pou bann etranze ki ti pe rod enn plas pou reste.”