Exod 6:1-30
6 Alor Zeova ti dir Moiz: “To pou trouve seki mo pou fer ar Faraon. Enn lame pwisan pou fors li pou les bann-la ale, ek enn lame pwisan pou fors li pou fer bann-la kit so pei.”
2 Lerla Bondie ti dir Moiz: “Momem Zeova.
3 Ek mo ti abitie aparet ar Abraam, Izaak, ek Zakob kouma Bondie Tou-Pwisan, me konsernan mo nom, Zeova, mo pa ti vremem fer bann-la kone kisann-la mo ete.
4 Mo ti osi fer enn lalians avek bann-la pou donn zot pei Kanaan, pei kot zot ti pe viv kouma bann etranze.
5 Aster-la, mwa, mo finn tann pep Izrael plengne parski bann Ezipsien inn fer zot vinn esklav, ek mo’nn rapel mo lalians.
6 “Alor, dir bann Izraelit: ‘Momem Zeova ek mo pou tir zot anba fardo ki bann Ezipsien inn met lor zot, ek mo pou delivre zot ar lesklavaz bann Ezipsien. Mo pou servi mo lebra pwisan pou sap zot ek mo pou pini bann Ezipsien dan enn fason sever.
7 Zot pou vinn mo pep, ek mo pou vinn zot Bondie, ek vremem zot pou kone ki momem Zeova zot Bondie, ki pe tir zot anba fardo ki bann Ezipsien inn met lor zot.
8 Mo pou fer zot rant dan pei ki mo’nn fer serman* pou donn Abraam, Izaak, ek Zakob; ek mo pou donn zot sa pei-la ek li pou vinn pou zot. Momem Zeova.’”
9 Plitar Moiz ti fer bann Izraelit konn sa mesaz-la, me selman zot pa ti ekout Moiz parski zot ti dekouraze ek parski zot ti pe travay dir kouma bann esklav.
10 Apre sa Zeova ti dir Moiz:
11 “Ale, al dir Faraon, lerwa Lezip, ki li bizin fer bann Izraelit kit so pei.”
12 Me Moiz ti dir Zeova: “Gete! Bann Izraelit pa’nn ekout mwa, alor kouma Faraon pou ekout mwa, mwa ki gagn difikilte pou koze?”
13 Me Zeova ti redir Moiz ek Aaron ki bann lord zot bizin donn bann Izraelit ek Faraon, lerwa Lezip, pou fer bann Izraelit kit Lezip.
14 Ala nom bann sef fami dapre zot bann anset: Bann garson Ribenn ti Anok, Palou, Ezronn, ek Karmi. Sa se bann fami Ribenn, premie-ne Izrael.
15 Bann garson Simeon ti Zemouel, Zaminn, Oad, Zakinn, Zoar, ek Saoul, garson enn Kananeenn. Sa se bann fami Simeon.
16 Ala nom bann garson Levi, kot zot bann desandan sorti: Gershonn, Keat, ek Merari. Levi ti viv 137 an.
17 Bann garson Gershonn ti Libni ek Simei. Zot ti bann sef fami.
18 Bann garson Keat ti Amram, Izar, Ebron, ek Ouziel. Keat ti viv 133 an.
19 Bann garson Merari ti Mali ek Moushi.
Sa ti bann fami bann Levit, kot zot bann desandan sorti.
20 Amram ti marye ar Zokebed, ser so papa. Zokebed ti gagn Aaron ek Moiz. Amram ti viv 137 an.
21 Bann garson Izar ti Kore, Nefeg, ek Zikri.
22 Bann garson Ouziel ti Mishael, Elizafann, ek Sitri.
23 Aaron ti marye ar Eliseba, tifi Aminadab, ser Nasonn. Eliseba ti gagn Nadab, Abiou, Eleazar, ek Itamar.
24 Bann garson Kore ti Asir, Elkana, ek Abiazaf. Sa ti bann fami bann Koreit.
25 Eleazar, garson Aaron, ti marye ar enn tifi Poutiel, ek lerla zot ti gagn Fineas.
Sa se bann sef fami bann Levit, kot zot bann desandan sorti.
26 Se ar sa Aaron ek Moiz lamem ki Zeova ti dir: “Fer pep Izrael sorti dan pei Lezip, group par group.”*
27 Se bann-la mem, Moiz ek Aaron, ki ti koz ar Faraon, lerwa Lezip, pou fer pep Izrael sorti dan Lezip.
28 Sa zour-la, kan Zeova ti koz ar Moiz dan Lezip,
29 Zeova ti dir Moiz: “Momem Zeova. Dir Faraon, lerwa Lezip, tou seki mo’nn dir twa.”
30 Lerla Moiz ti dir Zeova: “Gete! Mo gagn difikilte pou koze, alor kouma Faraon pou ekout mwa?”
