Ita iboudai ese moni ta ḡaukaralaimu eda ruma bese edia ura ḡaudia ta havaramu. (Hereva Lada-isidia 30:8) Una dainai, moni na heduru ḡauna. (Kohelete 7:12) Nega haida basio uramu moni iḡaukaralaina daladia ba herevalai, to moni dainai headava lalonai hekwakwanai basie vara na namo. (Efeso 4:32) Moni iḡaukaralaina dalanai, namona na headava taudia na bae heabidadama heheni bona bae ḡaukara hebou.

BAIBUL NA E GWAUMU: “Umui daika kohoro baine larebaia e tomamu, basine helai diho guna, davana do basine laloa, basine haeroa guna baine haḡuḡurua diba eiava?” (Luka 14:28) Emui moni iḡaukaralaina dalana ba herevalaia hebou namonamo. (Amos 3:3) Ba lalo namonamo, dahaka ba hoi na namo bona moni hida ba ḡaukaralai diba. (Hereva Lada-isidia 31:16) Dia emu ai na heḡereḡere dainai, ba hoi kava hoi kava. Basio abitorehai kava. Emu moni heḡereḡerenai ba hoihoi.​—Hereva Lada-isidia 21:5; 22:7.

BA KARA DIBA ḠAUDIA:

• Bema moni haida na dounu mimia, raruosi ba lalotamona ede ba ḡaukaralai toma

• Bema emu moni na dia heḡereḡere, ḡau haida na basio hoi. Heḡereḡere, sibomu emu aniani ba heḡaeḡaelai to stoai e nadu-hata anianidia basio hoi

BAIBUL NA E GWAUMU: Ba “ḡaukara maoromaoro, Dirava vairanai bona taunimanima vairadiai.” (2 Korinto 8:21) Mai momokanimu ida adavamu ba hadibaia emu pei be hida bona moni hida o ḡaukaralaimu.

Moni iḡaukaralainai abi hidi badadia haida o uramu ba kara neganai, adavamu na hanaihanai ba hadibaia. (Hereva Lada-isidia 13:10) Moni ba ḡaukaralaia namonamo daladia ba herevalai, unu amo headava lalonai maino baine mia. Basio laloa oiemu pei na oi sibomu emu moni, to emu ruma bese edia danu.​—1 Timoteo 5:8.

BA KARA DIBA ḠAUDIA:

• Ba lalotamona, umui ta ta sibomui be moni hida ba ḡaukaralai diba

• Basio nari ela bona hekwakwanai bae vara bena moni iḡaukaralaina daladia ba herevalai