KAHA 2
Ba Hebadina Heheni
“Dirava ese vada e hahekapudia taudia na taunimanima ese basie hapararadia.”—Mareko 10:9
Iehova na e uramu adavamu ba “kara momokani” henia. (Hereva Lada-isidia 5:15, BH) Emu headava lalonai una na mai anina bada, badina bema kara momokani na lasi, basio heabidadama hehenimu. Bona heabidadama heheni karana ese lalokau e hagoadaiamu.
Hari ina negai, headava momo lalodiai hebadina heheni karana na lasi. Emu headava ba gimaia totona, lalomu ba hadaia, ḡau rua ba kara.
1 EMU HEADAVA BA LALOA BADA
BAIBUL NA E GWAUMU: “Ḡau namodia toadia ba diba.” (Filipi 1:10) Emu mauri lalonai headava na ḡau badana dainai, ba laloa bada.
Iehova na e uramu adavamu ba laloa bada bona “ba moale hebou.” (Kohelete 9:9) Ia na se uramu adavamu ba rakatania, to ba hahemoale heheni daladia ba tahu. (1 Korinto 10:24) Namona na adavamu na baine diba, ia na o ura heniamu bona o laloa badamu.
BA KARA DIBA ḠAUDIA:
-
Hanaihanai adavamu ida ḡau ba kara hebou, una nega na ḡau ta ese basine koua na namo
-
“Lau sibogu” lalohadaina na da lasi, to “ai”
2 KUDOUMU BA GIMAIA
BAIBUL NA E GWAUMU: “Tau ta ese hahine ta baine raraia ela bona baine ḡahusia, ia lalona ai vada e heuda hanai vaitani.” (Mataio 5:28) Bema ta na matabodaḡa lalohadaidia e abimu, baita gwau dibamu ia na vada e heudahanai.
Iehova na e gwaumu, namona na “lalomu [“kudoumu,” NW] ba gimaia tarika-tarika.” (Hereva Lada-isidia 4:23; Ieremia 17:9) Unu ba kara toma totona, namona na matamu ba gimaia. (Mataio 5:29, 30) Iobu ba tohotohoa, ia na e gwauhamata heḡahusi dalanai hahine idauna ta basine raraia. (Iobu 31:1) Lalomu ba hadaia matabodaḡa laulaudia basio ita, bona tau o hahine idauna ta basio ḡahusia.
BA KARA DIBA ḠAUDIA:
-
Emu kara amo haida ese bae itaia, oi na adavamu o badinaiamu bona o lalokau henia momokanimu
-
Adavamu ena hemami ba laloa, bona iena hemami baine hadikaia diba hetura karadia ba hadoko
