KĨŨRIA KĨA 1
Ũũni Ndĩ Muntũ Ũkari?
NĨATĨA ŨŨGWE ŨŨMBA KŨTHITHIA?
Ũthũgaania: Ndagĩka nkũrũki ya ĩkũmi nikũrũkĩte Karen arĩ kĩathone. Akaigua kajũ akũmenya nyuma yaawe.
“Keke! Nĩkĩ ũrũngi au o ũu?”
Karen akĩgarũka akona mũcoore waawe Jessica agwete cuuba ijĩrĩ ikunũri. Atega nakwona nĩ cia ncoobi. Jessica akathagaania Karen cuuba ĩmwe na akauga, “Ũtĩ mwana mono ũntũ ũtĩũmba kwigwĩria, kana tĩu?”
Karen nakwenda kũrega, ĩndĩ Jessica nĩ mũcoore waawe. Karen atĩkwenda mũcoore waawe amwona teka atĩcancamũki. Na bũngĩ, Jessica nĩ ũmwe wa aarĩ babeega. Na kethĩra we nakũnyua, no mwanka kwĩthĩrwe tĩ ũntũ bũthũũku mono. Karen agaciĩra, ‘Uga tĩ gĩntũ tu gĩa kũnyua. Tĩ ũmwe na gũtumĩra ndaawa cia mbogita.’
Ũrĩngĩĩthĩrwa nĩgwe Karen, nĩatĩa ũrĩngĩthithia?
AMBA ŨTHŨGAANIE!
Nĩkenda ũtua ĩtua rĩrĩega ũntũne ta bũu, kwimenya ũrĩ muntũ ũkari nĩgũkwendeka. Kwimenya nĩ gũciũkĩrwa ũrĩ ũũ, na kĩrĩa ũkũgwata mbaru. Ũkĩmenyaga ũu, no ũũmbe kwerekeeria ũtũũro bwaku antũ-a gũtiga bangĩ bakũthithĩria u.—1 Akorintho 9:26, 27.
Nĩatĩa ũũmba kũthithia ũu? Gũcookia biũria bibi bithingatĩte nĩ mwambĩrĩrio jũmwega.
1 ŨŨMBI BWAKWA NĨ BŨRĨKŨ?
Kũmenya ũũmbi bwaku na nkũma ciaku injega kũgagũteethia gũciinda ũguaa.
NGEREKANO YA BIBIRIA: Mũtũmwa Paũlũ aandĩkĩre: “Kinya nkeethirwa nti umuume riria nkwaria, untune bwa kumenya mantu tiu nkari.” (2 Akorintho 11:6) Akĩmenyaga Maandĩko bwega, Paũlũ noombĩre kũrũngama airikĩtie rĩrĩa bangĩ baamwĩraga mantũ jatĩbuugi. Ataarekere jarĩa baamwĩraga jamwĩkĩra ũguaa.—2 Akorintho 10:10; 11:5.
ICŨNKŨŨNE. Andĩka aja kĩewa, kana ũtea bwaku.
Nandĩ taarĩĩria nkuma yaaku ĩnjega. (Ngerekano, nũmakagĩra bangĩ? ũrĩ mũtugani? no wĩrĩgĩĩrwe? nĩ wĩkaga thaa?)
2 NĨKŨ NTAŨKĨRI?
O ta ũrĩa ncamba ĩgwĩthagua nĩ mũcako, ũrĩa ũkari, no kũgarũke o rĩmwe kethĩra ũkareka gũtaũkĩrwa gwaku gũgũtongeeria.
NGEREKANO YA BIBIRIA: Paũlũ naaijĩ gũtaũkĩrwa kwawe. Aandĩkĩre: “Ndene ya nkoro yakwa no kugwirua ngwiragua ndumiirite maathana ja Murungu; indi ndene ya marungo jakwa nimbonaga watho bungi buria burujaga na watho bwa umenyo bwakwa bugatuma mpee nkombo ya kwathagwa ni watho bwa wiyia buria buri ndene ya marungo jakwa.”—Aroma 7:22, 23.
ICŨNKŨŨNE. Nĩ gũtaũkĩrwa kũrĩkũ ũbuĩri kwiritana kũũmbana na ku?
3 MĨOROTO YAKWA NĨ ĨRĨKŨ?
No ũkombore ngaarĩ na wĩre ndereba akũthiũrũnkie antũ amwe mwanka ĩthire maguta? Bũu nĩ waa—na nĩ gũta mbia!
Kĩthoomo? Mĩoroto nĩkũmenyithagia njĩra ĩrĩa ũkathingata ũtũũrone bwaku, na ĩgagũteethia ũtĩkathiũrũnke antũ amwe. Kũrĩ arĩa wĩtĩte na ũrĩ na mũbango jwa ũrĩa ũgakinya nao.
NGEREKANO YA BIBIRIA: Paũlũ aandĩkĩre: “Nimbugiangaga ta muntu uti na nkanja.” (1 Akorintho 9:26) Antũ-a gũkara ũtheri eterete mantũ jakarĩka, Paũlũ naciĩkĩĩre mĩoroto na amiingia.—Afilipi 3:12-14.
ICŨNKŨŨNE. Andĩka aja mantũ jathatũ jarĩa ũkwenda kwiingia mwaka jwĩjĩte.
4 NĨ MANTŨ JARĨKŨ MBĨTĨKĨTIE?
Ũkeethĩrwa ũkiimenyaga bwega ũrĩ ũũ, ũkari ta mũtĩ jũrikĩtie mĩri, jũrĩa jũũmba kũrũngama ĩgiita rĩa ibubani.
Gũkeethĩrwa gũtĩkĩo wĩtĩkĩtie, ũtĩũmba gwituĩra matua. Ũkagarũkaga o ta kaumbu kenda wĩtanĩria na nthukĩ yaaku—kwonania ũũgwe ũtĩkwimenya ũrĩ ũũ.
Mwanya na bũu, rĩrĩa mathithio jaaku jagwĩtanĩria na jarĩa wĩtĩkĩtie, nũkaraga ũkiimenyaga—gũtĩkũmakania ũrĩa bangĩ bakũthithia.
NGEREKANO YA BIBIRIA: Kwombĩka kĩroria Danieli aarĩ na nthĩ ya mĩaka 19, rĩrĩa ‘aathuganirie nkorone yawe’ atĩ akaathĩkĩra mawaatho ja Mũrungu kinya kethĩra naathũrani na antũ ba nja yaao. (Danieli 1:8) Na njĩra ĩu, ataagarũkĩre. Danieli aatũũrĩre kũringana na jarĩa eetĩkĩtie.
ICŨNKŨŨNE. Nĩ mantũ jarĩkũ wĩtĩkĩtie? Ngerekano: Nĩ wĩtĩkĩtie Mũrungu arĩ o? Kethĩra nĩu, nĩkĩ? Nĩ ũntũ bũrĩkũ bũtũmaga ũũgwe wĩtĩkia arĩ o?
Nĩ wĩtĩkĩtie ithimi bia Mũrungu bia mĩĩtĩre nĩ bia gũkũguna? Kethĩra nĩu, nĩkĩ?
Mũthiene, wenda gũkara ta mbi—ĩbũũra rĩgwĩte rĩrĩa rĩurutagwa kinya nĩ karuuo kaniini, kana ta mũtĩ jũrĩa jũrũngamaga kinya kwĩna kĩbubani gĩkĩnene? Imenye bwega na ũgakara ta mũtĩ jũu. Na bũu bũgagũteethia gũcookia kĩũria, Ũũni ndĩ muntũ ũkari?
