Gin Jomage Madhi e Polo?
Dwoko ma Muma Chiwo
Nyasaye yiero Jokristo moko matin mochung’ motegno mondo bang’ tho margi ochiergi mondo gidag e polo. (1 Petro 1:3, 4) Ka oseyiergi, nyaka gidhi nyime bedo gi yie gi timbe maler mondo kik gilal pok margi mar dhi e polo.—Jo-Efeso 5:5; Jo-Filipi 3:12-14.
Joma dhi e polo biro timo ang’o kuno?
Gibiro bedo ruodhi gi jodolo kanyachiel gi Yesu kuom higni 1,000. (Fweny 5:9, 10; 20:6) Gibiro loso “polo manyien,” ma en sirkal mar polo ma biro locho e wi “piny manyien,” ma en oganda dhano modak e piny. Ka gisebedo ruodhi e polo gibiro konyo dhano mondo odag e ngima maber mana kaka Nyasaye ne dwaro ka ne ochueyo dhano.—Isaiah 65:17; 2 Petro 3:13.
Gin ji adi mibiro chier mondo odhi e polo?
Muma wacho ni ji 144,000 e ma ibiro chier mondo odhi odag e polo. (Fweny 7:4) E weche mondik e bug Fweny 14:1-3, jaote Johana ne oneno “Nyarombo kochung’ e Got Sayun, kendo ne en gi ji 144,000.” E fwenyni, “Nyarombo” ochung’ne Yesu ma ne osechier. (Johana 1:29; 1 Petro 1:19) “Got Sayun” ochung’ne migawo maduong’ ma Yesu nigo gi 144,000 ma locho kode e polo.—Zaburi 2:6; Jo-Hibrania 12:22.
“Joma ne oluong kendo oyier” mondo oloch gi Kristo e Pinyruodhe iluongo ni “kweth matin.” (Fweny 17:14; Luka 12:32) Mano nyiso ni ne gidhi bedo ji manok kopimgi gi rombe mamoko duto ma Kristo nigo.—Johana 10:16.
Miriambo miwacho e wi joma dhi e polo
Miriambo: Joma beyo duto dhi e polo.
Adiera: Nyasaye osingo ngima ma nyaka chieng’ e piny ne ji mang’eny mabeyo.—Zaburi 37:11, 29, 34.
Yesu nowacho ni: “Onge ng’ato ang’ata ma oseidho malo e polo.” (Johana 3:13) Omiyo ne otemo wacho ni joma ne otho ka pok obiro e piny kaka Ibrahim, Musa, Ayub, gi Daudi ne ok odhi e polo. (Tich Joote 2:29, 34) Kar mano, ne gin gi geno mar chier mondo giyud ngima e pinyka.—Ayub 14:13-15.
Chier ma miyo ng’ato dhi dak e polo iluongo ni “chier motelo.” (Fweny 20:6) Mano nyiso ni ne dhi betie chier moro machielo. Obiro bedo chier mar joma biro dak e piny.
Muma puonjo ni e bwo loch mar Pinyruodh Nyasaye, “tho ok nobedie kendo.” (Fweny 21:3, 4) Singoni biro timore e piny nikech tho pok obetiega e polo.
Miriambo: Ng’ato ka ng’ato yiero owuon kabe obiro yudo ngima e polo kata e piny.
Adiera: Nyasaye ema yiero jotichne mochung’ motegno mondo giyud ngima ma en “mich man malo,” mano tiende ni dak e polo. (Jo-Filipi 3:14) Gombo mar ng’ato owuon ok ema biro miyo oyiere.—Mathayo 20:20-23.
Miriambo: Geno mar yudo ngima e piny imiyo mana joma ok owinjore dhi e polo.
Adiera: Nyasaye luongo joma biro yudo ngima ma nyaka chieng’ e piny ni “joga,” “jogo mayiedho,” kendo “jogo ma Jehova osegwedho.” (Isaiah 65:21-23) Gibiro bedo gi thuolo mar chopo dwach Nyasaye mokwongo ne dhano ma en bedo gi ngima makare chuth e Paradiso e pinyka.—Chakruok 1:28; Zaburi 115:16; Isaiah 45:18.
Miriambo: Kwan mar ji ma gin 144,000 mowach e bug Fweny en mana mar ranyisi to ok en kwan masie.
Adiera: Kata obedo ni kwan moko manie bug Fweny gin ranyisi, moko kuomgi bende gin masie. Kuom ranyisi, owuoyo e wi “nyinge 12 mag joote 12 mag Nyarombo.” (Fweny 21:14) Ne ane gik manyalo miyo wawach gadier ni kwan mar 144,000 gin masie.
Fweny 7:4 wuoyo kuom “kwan mar joma oket alama kuomgi [kata, ose yang ni gibiro yudo ngima e polo], 144,000.” E kwan matindo maluwe iwuoyo e wi grup moro mar ariyo miluongo ni: “oganda mang’ongo ma dhano ok nyal kwano.” Joma nie “oganda mang’ongo” be yudo warruok koa kuom Nyasaye. (Fweny 7:9, 10) Ka kwan mar 144,000 ok en masie to en grup ma nigi ji mang’eny to koro kara ere kaka ne inyalo pim pogruok mantie e kind grube ariyogo ka koro gichal. *
E yo machal kamano, Profesa moro miluongo ni Robert L. Thomas nondiko wachni e wi kwan mar 144,000 mantie e Fweny 7:4: “En kwan masie ma inyalo pim gi kwan mantie e Fweny 7:9. Ka ok en kwan masie to kare onge kwan moro amora minyalo kaw ka kwan masie e bugno.”—Fweny 1-7: Buk mar An Exegetical Commentary, ite mar 474.
^ par. 16 E wi mano, ilero ni ji 144,000 ‘ne ong’iew ka gia kuom oganda dhano mondo gibed kaka nyak mokwongo.’ (Fweny 14:4) Wach motigo kanyo ni “nyak mokwongo” en gima nyiso ji matin ahinya moyier. Omiyo, olero maber joma biro locho gi Kristo e polo ka gilocho wi dhano ma kwan gi ok ong’ere mabiro dak e piny.—Fweny 5:10.
Samoro Inyalo Hero Magi Bende
ESSENTIAL BIBLE TEACHINGS
Pinyruodh Nyasaye En Ang’o?
Kinde duto ma Yesu ne yalo, nojapuonjo ji wach Pinyruodh Nyasaye nyading’eny moloyo wach moro amora. Ji osebedo kalemo kuom higni mang’eny mondo pinyruodhno obi.
