Ooyo. Muma wacho maler ni Nyasaye nochueyo dhano, le, alode kaachiel gi yiende mopogore opogore kaka “kothgi” obet. (Chakruok 1:12, 21, 25, 27; Fweny 4:11) Muma nyisowa ni dhano duto ne owuok kuom Adam gi Hawa, ma gin jonyuolwa mokwongo. (Chakruok 3:20; 4:1) Weche mondik e Muma ma wuoyo e wi chuech ok riw lwedo paro mar ni Nyasaye nomiyo gik moko osieko asieka kendgi e piny. Kata kamano, adiera en ni Muma ok kwed gima josayans moko wacho ni nitie pogruok e kind chuech ka chuech.

•  Jomoko nigi paro mane e wi chuech?

•  Be Muma oyie ni gik moko nosieko kendgi?

•  Be wanyalo wacho ni le kod gik mamoko ma twi e lowo nosieko kendgi mana nikech gin gi nyalo mar lokore kaluwore gi alwora ma giyudore?

Joma oyie ni Nyasaye nomiyo gik moko osieko kendgi nigi paro mopogore opogore e wi wachno. Jomoko oyie ni “nyalo ma chuech nigo mar dak kamoro kendo medore en achiel kuom gik ma nyiso ni Nyasaye e ma tayo chuech manie piny.”

Joma paroga ni Nyasaye nomiyo gik moko osieko kendgi bende wachoga kama:

• Gik moko duto mangima nowuok kuom gimoro achiel ma ne nitie e kinde machon ahinya.

• Gimoro achiel mangima nyalo lokore mos mos mabed gimoro machielo mopogore.

• Nyaka bed ni Nyasaye e ma miyo gik ma kamago timore.

Joma puonjo ni gik moko nosieko kendgi kwedo weche ma yudore e bug Chakruok ma wuoyo e wi chuech. Kata kamano, Yesu nowuoyo e wi weche ma yudore e bug Chakruok nikech gin weche madier. (Chakruok 1:26, 27; 2:18-24; Mathayo 19:4-6) Muma wacho ni ka Yesu ne pok obiro e piny, nodak gi Nyasaye e polo kendo ne okonye loso “gik moko duto”. (Johana 1:3) Omiyo, paro ma ji nigo ni Nyasaye nomiyo gik moko osieko kendgi ok winjre gi puonj manie Muma.

Muma ok lernwa kaka lokruoge timorega e kit chuech moro. Bende, ok okwed paro moro ni gik matwi e lowo kod le mopogore opogore ma Nyasaye nochueyo nyalo bedo gi pogruok moko kaka gimedo nyuolore kata kaluwore gi alwora ma gintie. Kata obedo ni jomoko paro ni pogruok ma kamago nyiso ni gik moko nosieko kendgi, adiera en ni pogruok ma betiego ok kel chuech moro manyien.