Nonyuola e piny Uganda e distrikt miluongo ni Gomba. Thoth joma nodak kono ne gin joma odhier ahinya. Taon ma ne wadakie ne onge stima, omiyo, otieno ne watiyoga gi teyni ma tiyo gi mafuta.

 Jonyuolna ma ne gin jopur nobiro Uganda ka gia Rwanda. Ne gipuroga kahawa kod rabolo, kendo rabologo ne gilosogo kong’o moro miluongo ni waragi. Jonyuolna ne pidhoga bende gwen, diek, anguro, kod dhok. Alwora ma naponie nomiyo abedo gi paro moro ni dhako nyaka winj chwore kinde te, kendo ni dhako ok onego ochiw paro e wi wach moro amora.

 Ka ne an jahigni 23, nadhi Rwanda, kendo kuno ne wajamieloga thum e klab gi osiepena moko ma ne gin mbesena. Nitie klab moro ma ne ajadhiyega nyading’eny kendo nochopo kama wuon klabno nomiya kad moro ma noyienago donjo e klabno ma ok achulo pesa moro amora. Nahero neno sinembe ma nyiso lwenje kendo moko kuom sinembego ne nyiso gik ma notimore adier. Osiepe ma ne an-go kod sinembe ma nahero nenogo nomiyo adonjo e timbe mag gero kendo nabedo jamer ma timbege richo.

 E higa mar 2000, nachako dak gi nyako moro miluongo ni Skolastique Kabagwira kendo ne wanyuolo nyithindo adek. Nageno ni en bende nyaka ogo chonge piny sama odwaro mosa kata ka odwaro kwaya gimoro nikech kamano e kaka napon chakre tinna. Ne an gi paro bende ni gik moko duto ma jooda ne nigo ne gin maga kendo nanyalo tiyo kodgi kaka adwaro. Najawuokga otieno kendo naduogoga kogwen sa ochiko ka amer. Nadwong’oga dhoot, kendo ka Skolastique nobudho ka pok oyawo dhoot, nagoyega.

 E kindeno, ne an supervisor e kambi moro mar jorit kendo nichula maber. Skolastique notemo jiwa mondo adhi kode e kanisagi mar Pentecostal koparo ni timo kamano ne dhi loko ngimana. Kata kamano, ne ok adwar dhi e kanisagino, kendo kar timo kamano, nachako osiep gi nyako moro ma ne pok okendi. Nikech timbega maricho mag gero kod mag anjawo, Skolastique nokawo nyithindwa adek, kendo nodhi odak gi jonyuolne.

 Osiepna moro ma ne hike oniang’ nowuoyo koda e wi kit ngima ma nadakieno. Nojiwa ni mondo adog ir Skolastique. Nonyisa ni nyithinda mabeyogo ne ok onego odag mabor koda. Omiyo, e higa mar 2005, naweyo metho, kendo nawera gi nyako ma ne adakgono ma adok ir Skolastique. E higa mar 2006, ne wakendore e yo maler. Kata kamano, pod nahero timbe gero kendo natimonega jaoda gik maricho.

 E higa mar 2008, achiel kuom Joneno mag Jehova ma nyinge Joël nolimowa e odwa, kendo ne wachiko itwa ne ote ma ne en-go. Kuom dweche mogwaro, en kaachiel gi Janeno wadgi moro miluongo ni Bonaventure negijalimaga kendo ne wajabedoga gi mbaka ma iye otuere mar Muma. Napenjo penjo mang’eny, to ahinya-ahinya ma notudore gi bug Fweny. Gima natemoga timo ne en mana nyiso ni Joneno mag Jehova ne ok ni kare e weche ma ne gipuonjo. Kuom ranyisi, napenjogi gimomiyo giwacho ni ‘oganda mang’ongo’ miwuoye e Fweny 7:9 odak e piny to e wesno iwacho ni “gichung’ e nyim kom-loch [mar Nyasaye] kendo e nyim Nyarombo,” ma en Yesu Kristo. Joël nodwoka penjogo kohore ahinya. Kuom ranyisi, nosomona Isaya 66:1 kama Nyasaye noluongoe piny ni ‘raten tiende.’ Mano nyiso ni oganda mang’ongo ochung’ e piny e nyim kom-loch mar Nyasaye. Bende nasomo Zaburi 37:29 ma wacho ni joma kare nodag e piny nyaka chieng’.

 Gikone, nayie puonjora Muma. Omiyo, Bonaventure nopuonjore kodwa Muma an gi Skolastique. Kaka namedo puonjora Muma, e kaka namedo bedo gi gombo mar timo lokruok e ngimana. Bende, napuonjora timo ne jaoda gik moko e yor luor. Koro ne ok adwar ni ogona chonge piny kodwaro mosa kata kodwaro kwaya gimoro, kendo naweyo bedo gi paro ni gimoro amora ma jooda nigo gin meka. Naweyo neno sinembe ma ne nyiso timbe mag gero kod lwenje. Timo lokruogego ne ok yot, kendo ne dwarore ni abed gi ritruok kod bolruok.

 Higni moko chien, natero yathina maduong’ ma nyinge Christian mondo odag gi wedena moko ma ni Uganda. Kata kamano, bang’ somo ndiko mar Rapar mar Chik 6:4-7, nafwenyo ni an gi jaoda e ma wan gi ting’ e nyim Nyasaye mar rito nyithindwa, pidhogi, kendo puonjogi weche Nyasaye. To mano kaka waduto ne wamor ka ne wuodwano oduogo dala!

 Napuonjora ni Jehova en Nyasaye mang’won, kendo ne an-gi yie ni noseweyona gik maricho duto ma natimo kod paro maricho ma ne an-go. Amor ni Skolastique bende noyie puonjore Muma. Ne wachiwo ngimawa ne Jehova, kendo nobatiswa kanyachiel tarik 4 dwe mar Desemba, 2010. Tinde wagenore kendo wamor ni watiyo gi puonj mag Muma e ngimawa mar joot. Jaoda tinde mor ni ka aa e tich, to achomo mana ot tir, kar baro kuonde mamoko. Omor bende ni tinde atimone gik moko e yo mang’won kendo gi luor. Gima chielo ma more en ni nawera gi kong’o chuth kendo tinde ok an ng’at mager. E higa mar 2015, noketa jaduong’-kanyakla mondo akony e rito rombe e kanyaklawa. Kuom nyithindwa abich, adek osebatisi.

 Ka nachako puonjora Muma gi Joneno mag Jehova, ne ok ayiega ayieya gi gik ma ne gipuonjago ma ok anonogi maber. Kata kamano, namor gi yo ma ne gitiyogo gi Muma mondo gidwok penjo ma ne an-go. An kaachiel gi Skolastique ne wamor ng’eyo ni jotich Nyasaye madier onego odag ka luwore gi puonj mage, to ok luwo puonjgo mana sama yotnegi timo kamano. Amor ahinya ni Jehova noywaya ire, kendo sani an achiel kuom joma ni e riwruok mar ogandane. Ka aparo kaka ngimana ne chal chon, abedo gadier ni ka ng’ato oyie mondo Jehova okonye, to onyalo lokore mobed ng’at maber.