Ne onyuola kendo ne adongo e gweng’ moro ma joma odhier e ma nodakie machiegni gi taon mar Rumi. Ngima ne tek sidang’. Ne akia kata minwa ma ne onyuola, to wuonwa bende ne ok awinjrago. Ne apuonjora dak e ngima matek.

Ne achako kwelo kata ka pok aromo jahigni apar. Ka ne ajahigni 12, ne awuok dala; mano e kinde ma ne ahango wuokie dala. Kinde ka kinde, wuonwa ne jaoma ka polis kendo dwoka dala. Ne asiko aywara mana gi ji, kendo ne ager gi ng’ato ang’ata. Ka ne ajahigni 14, ne adar pacho chuth. Ne achako tiyo gi yedhe ma mero ji kendo ne adak kaka chokora. Nikech ne aonge gi kama ne anyalo ninde, ne ajatoyo dirise mag mtokni mondo adonj anind e igi. Kae to gokinyi kogwen ne amanyo kama nitie pi achiya mondo alwokrago.

Ne an jakuo ma thiring’inyi molony e kwalo gimoro amora kendo kamoro amora, obed odiechieng’ kata otieno. Ne achako bedo gi nying marach mi jonjore moko ne ogwela mondo ariwora kodgi, to mano nomiyo achako kwelo e bengi. Nikech ne an ng’ama achach kamano, jonjore wetenago ne omiya luor. Onge kama ne anyalo dhiye ma onge bunde, kendo bundeno e ma ne atenogo wiya ka anindo. Ngimana nopong’ gi timbe mahundu, tiyo gi yedhe ma mero ji, kuo, ayenje, kod timbe anjawo. Polise nosiko ka manya kendo ne gimaka nyading’eny. Mano nomiyo atieko higni mang’eny e jela.

Chieng’ moro ka ne ogonya e jela, ne aneno ni adhi alim nyamin mamawa matin. Ne ok ang’eyo ni en kaachiel gi nyithinde ariyo ne gin Joneno mag Jehova. Ne gigwela mondo adhi e chokruok mar Joneno mag Jehova. Nikech nadwaro mana neno kaka gitimoga chokruogegi, mano nomiyo adhi. Ka  ne wachopo e Od Romo, ne aramo ni nyaka abed mana e dhoot mondo eka ane joma donjo gi joma wuok. Ne amanora gi bunde.

Chokruogno ne oloko ngimana! Ne chalna mana ka gima ne an e piny moro mopogore. Ji ne omosa gi mor kendo e yor osiep. Wiya pok owil gi kaka Jonenogo nonyisa ng’wono gi chuny maler. Jonenogo nopogore ahinya gi joma ne ang’iyogo.

Ne achako puonjora Muma gi Joneno mag Jehova. Kaka ne amedo puonjora, e kaka ne amedo fwenyo ni onego alok ngimana chuth. Ne atimo kaka Ngeche 13:20 wacho niya: “Ng’a mawuotho kod jo mariek nobedi mariek; to ng’a ma wadgi jo mofuwo none chandruok.” Ne afwenyo ni ne nyaka awera gi jonjore wetenaka. Weruok gi jonjorego ok ne yot, kata kamano Jehova ne okonya ma gikone awera kodgi.

Bende, ne aloko ngimana mobedo maler. Ne atimo kinda ma aweyo madho ndawa kod tiyo gi yedhe ma mero ji. Ne alielo yie wiya maboyo, ne agolo stadi e ita, kendo ne aweyo tiyo gi ayenje. Mago e kinde ma ne achako chiko ngimana e yo mowinjore.

Nikech ne pok ang’iyo gi somo kod puonjruok, ne ayudo ka tekna chomora tir gi puonjruok Muma. Kata kamano, mosmos kaka ne amedo timo kinda e kaka ne amedo hero Jehova, kendo mano nomiyo chunya ochako chanda. Kinde mang’eny ne abedo gi paro ma ok ni kare kuoma awuon kendo ne an gi kiawa ka be Jehova ne nyalo ng’wonona gik maricho duto ma ne atimo. E kindego, ne ayudo hoch mogundho kuom somo kaka Jehova ne ong’wono ne Ruoth Daudi richo madongo ma ne otimo.—2 Samuel 11:1–12:13.

Gima chielo ma ne tekna timo ne en dhi wuoyo gi ji ot ka ot e wi yiena. (Mathayo 28:19, 20) Gima ne aluoro ne en ni ne anyalo rado gi ng’ama ne asetimone gimoro marach kinde mosekalo. Kata kamano, ne aloyo luorono mosmos. Ne achako yudo mor madier kuom konyo jomamoko mondo opuonjre kuom Wuonwa manie polo ma jahera, ma ng’wono ne ji richogi e okang’ malach.

Ng’eyo Jehova noreso ngimana. Moko kuom osiepena machon ne osetho kendo moko nie e jela, kata kamano, adak e ngima madier sani kendo an gi geno mar yudo ngima mochwere kinde mabiro. Asepuonjra bedo ng’ama bolore kendo ma nigi luor kendo geng’o ich wang’ mara. Nikech mano, winjruokna gi ji ne ochako bedo maber. Adak maber gi chiega majaber miluongo ni Carmen. Waduto wanwang’o mor mogundho e konyo ji ong’e Muma.

Bende, sani koro tich ma atimo en tich maler motudore gi bengi; kata kamano, koro kar kwalo e bengi, to alwokogi mondo gibed maler. ▪