Ka in achiel kuom Joneno mag Jehova, temie paro ni in gi polise ma kowi sama ilendo ot ka ot! Mano e gima notimore ne Joseph modak Micronesia e higa mar 2017. Chieng’ moro en kaachiel gi Joneno moko adek ne gidhi timo kampen moro mar lendo ne joma odak e chulni mosokore.

 Ka nochopo kar sa auchiel kama, Joseph kod jowetene adekgo nochopo e chula moro ma ne nigi ji ma kwan-gi dirom 600 kama. Meya mar chulano nomosogi e dho wath kanyo. Winj ane gima Joseph wacho ni notimore bang’ mano: “Meyano nowacho ni ne inyalo kowwa gi mtok polis e udi te ma ne wadhi lendee. Kata obedo ni wachno nobwogowa ahinya, ne watamore gi muolo. Ne wadwaro ni walim ji kaka wajatimoga sama walendo ot ka ot.”

 Jolendogo nochako wuoth mondo gidhi gilend ne ji mang’eny kaka nyalore. Ne giwacho kama: “Joma odak e chulano ne gin joma ohero rwako welo kendo ne gimor ahinya gi wach ma ne walando. Mano nomiyo wakawo thuolo mang’eny moloyo kaka ne waparo e ot ka ot.”

 Bang’e, mtok polis nokalo Joseph nyadiriyo, kae to sama nokale mar adek, mtokano nochung’. Polise ma ne nitie e i mtokano nopenjo Joseph ka ne ginyalo kowe e udi ma ne pok odhiye. Joseph wacho kama: “Kata obedo ni ne akwerogi, wang’ni to ne gitamore winja. Ne ginyisa ni: ‘Idong’ mana gi seche matin to iwuok e chulani, omiyo, wabiro teri e udi modong’.’ Koro to ne ok anyal tamora nikech ne pod odong’ udi moko mang’eny ma ne pok alendee. Sama ne wachopo machiegni gi ot moro, polisego ne nyisa nying wuon odno kae to ne ginyisa ni ka po ni onge ng’at ma obiro yawo dhot bang’ ka aseduong’o, to gibiro goyo hon mar mtoka mondo giluonggo wuon ot.

 “Kony ma ne wayudono nomiyo walimo udi te odiechiengno. Ne wamiyo ji buge mang’eny kendo ne watimo chenro mar dok limo joma ne dwaro puonjore.”

 Polisego nonyiso Joseph ni ‘ne gimor ahinya lando ne ji wach maber.’ Sama ne Jonenogo a godhiambo, polisego nogonegi oriti ka gimor kendo ka gin gi buge ma lero Muma e lwetgi.