MISANGU bungi kayi iutu uditangila mu lumuenu? Bua ba bungi ba kutudi, ntshibidilu tshia dituku dionso ne pamuapa tutu tuditangila nunku misangu ya bungi ku dituku. Bua tshinyi? Bualu tudi basue kulengeja tshimuenekelu tshietu.

Tudi mua kufuanyikija kubala Bible ne kuditangila mu lumuenu. (Yakobo 1:23-25) Malu atu mu Dîyi dia Nzambi atu ne bukole bua kutuambuluisha bua tuetu kudimona tshitudi menemene. Ditu mene ‘ditubula ne dipandulula muoyo ne nyuma.’ (Ebelu 4:12) Mu mushindu mukuabu tudi mua kuamba ne: ditu dipandulula tshitudi tumueneka pa mbelu ne tshitudi menemene munda muetu. Ditu dituleja muaba utudi ne bua kuakaja anu bu mutu lumuenu lutuleja.

Bible katu anu utuleja patupu malu atudi ne bua kuakaja, kadi utu utuleja mutudi mua kuakaja kabidi. Mupostolo Paulo wakafunda ne: ‘Dîyi dionso dia mu Mukanda wa Nzambi didi difume munda mua Nzambi bu mupuya wende, ne didi ne mudimu muimpe wa kuyisha bantu, ne wa kubabela, ne wa kubadimuija, ne wa kubalongesha mu buakane bua Nzambi.’ (2 Timote 3:16, 17) Mu malu anayi adibu baleje muaba eu, asatu a kudiwu aa: kubela, kudimuija, ne kulongesha adi aleja dishintulula dia mmuenenu wetu ne dia malu atudi tuenza. Bituikala basue bua kuditangila mu lumuenu bua kumona bulenga bua mpala, bidi bikengela tuetu kudifila ne muoyo mujima mu dibala dia Bible Dîyi dia Nzambi pa tshibidilu!

Pavua Yehowa musungule Yoshua bua kulombolaye tshisamba tshia Isalele, wakamuambila ne: ‘Mukanda eu wa mikenji yanyi kaumuki mukana muebe; kadi welangane meji a mukanda eu munya ne butuku, udimuke bua kuenza malu onso adi mafundamu; pashishe neutute dikasa dimpe, newikale ne diakalengele.’ (Yoshua 1:8) Bushuwa, bua Yoshua kututaye dikasa dimpe, uvua ne bua kubala Dîyi dia Nzambi “munya ne butuku,” tuambe ne: pa tshibidilu.

Musambu wa kumpala udi uleja pawu mudi dibala dia Bible pa tshibidilu dikale dimpe, wamba ne: ‘Disanka didi kudi muntu udi kayi ulonda lungenyi lua bantu babi, udi kayi wimana mu njila diatshimue ne benji ba malu mabi, udi kayi mushikame mu tshisombelu tshia babuidi. Kadi disanka diende didi mu mikenji ya Yehowa, ne mu mikenji yende mudiye welangana meji munya ne butuku. Yeye udi bu mutshi wakukunabu kukala kua misulu ya mâyi, udi ukuama mamuma au mu tshidimu tshiawu; dibeji diawu kadiena difubidila. Malu onso adiye wenza adi atuta diakalengele.’ (Musambu 1:1-3) Bushuwa, tudi basue kuikala bu muntu wa mushindu eu.

Bantu ba bungi batu ne tshibidilu tshia kubala Bible dituku dionso. Muena Kristo mukuabu uvuabu bakonke bua tshinyi uvua  bubala Bible, wakandamuna ne: “Bingikala nsambila Nzambi dituku dionso ne ditekemena dia ne: neanteleje, bua tshinyi meme ntshiena ne bua kumvua bidi Nzambi wamba pandi mbala Dîyi diende dituku dionso? Tuetu basue kudia bulunda ne muntu, katuena ne bua kuenza muetu muonso bua kuikala kuyukila nende anyi?” Tshidiye muambe ntshilelela. Kubala Bible kudi anu bu kuteleja Nzambi bualu patudi tumubala tudi tumanya tshidiye wamba bua bualu kampanda.

Pamuapa ukadi mutete bua kubala Bible ulonda programe kampanda. Uvua mumubale yonso anyi? Wewe mubala mushindu eu, udi wibidilangana bikole ne malu adimu. Kadi bamue bakavua batuadije kubala Bible misangu ya bungi, kadi bapangila bua kumujikija. Uvuaku mupete lutatu lua mushindu eu anyi? Ntshinyi tshiudi ne bua kuenza bua kukumbaja tshipatshila tshiebe tshia kubala Bible mujima? Kuenaku mua kulonda umue wa ku mishindu itudi baleje eyi anyi?

Programe wa dibala Bible paudi wenza midimu yebe ya ku dituku. Ditekela dîba dituku dionso diwikala ubala Bible. Ulongolole kabidi tshiudi mua kuenza bua kubala matuku awapangila mushindu wa kubala. Bikala amue malu mua kukupangisha bua kubala Bible dîba diudi musungule, wikala muteke dîba dikuabu dia kubala bua kulu kupitshisha dituku dijima kuyi mubala to. Wewe wenza nanku, udi widikija tshilejilu tshia bena Beloya ba kale. Tudi tubala bua bualu buabu ne: ‘Bakitabuja dîyi ne mitshima mimane kulongolola; bakadi badikebela mu Mukanda wa Nzambi ku dituku ku dituku ne: Malu aa adi malelela anyi?’​—Bienzedi 17:11.

Difundila tshipatshila tshisunguluke. Tshilejilu, wewe ubala nshapita 3 nansha 5 ku dituku, udi mua kubala Bible mujima mu tshidimu tshimue. Tablo udi ulonda eu udi uleja mushindu uudi mua kuenza programe eu. Kuenaku mua kudifundila tshipatshila tshia kuenza bu mudi programe eu uleja anyi? Muinshi mua muaku “Matuku,” funda dîba diudi musue bua kubala nshapita bungi kampanda. Pashishe wikale wenda wela kasalu mu kazubu kadi ku penga aku bua kuleja nshapita iudi mubale. Wewe wenza nunku neumone muudi wenda uya kumpala.

Wewe mujikije dibala Bible mujima, mbimpe wimanyika anyi? Udi mua kutuadijilula programe webe au tshidimu tshionso, pamuapa uteka bua tshikondo kampanda tshitupa kansanga. Peshi udi mua kujinga bua kubala Bible ne lutulu ndambu, nshapita iuvua ubala ku dituku ayi uyibala mu matuku 2 anyi 3.

Misangu yonso iudi ubala Bible, neupete tshintu tshipiatshipia tshia kutumikila mu nsombelu webe, tshiuvua kuyi mutuishile mêsu kumpala to. Bua tshinyi? Bualu ‘tshimuenekelu tshia malu a pa buloba ebu tshidi tshijimina’ anyi tshishintuluka, ne nsombelu wetu ne malu etu bidi pabi bishintuluka bikole. (1 Kolinto 7:31) Nanku, difundila tshipatshila ne muoyo mujima tshia kutangila dituku dionso mu lumuenu ludi luikale Dîyi dia Nzambi. Wewe wenza nunku, udi anu bu uudi witaba bua kuteleja Nzambi padiye ukuambila malu dituku dionso.​—Musambu 16:8.