Mu 1985, ntshimvua anu ne bidimu dikumi pavua bana bakuabu ba mu Cambodge balue mu tshilongelu tshimvua mu Columbus, mu Ohio, mu États-Unis. Umue wa ku bana ba balume aba uvua mumanye miaku mikese ya mu Anglais. Ku diambuluisha dia bimfuanyi, wakatuadija kundondela bua miyuki idi ikuatshisha buôwa ya tshikisu, dishipangana ne ya bantu bavua banyema njiwu. Mvua ndila butuku pamvua mvuluka bana aba. Mvua musue kubambila bua ditekemena dia Mparadizu ne dia dibika dia bantu ku lufu, kadi kabavua bumvua muakulu wanyi to. Nansha muntshivua anu muana, ngakangata dipangadika dia kulonga tshiena Cambodge bua meme kuambila balongi betu aba malu a Yehowa. Tshivua mumanye ne: dipangadika dianyi adi divua mua kungambuluisha mu matuku atshivua alua to.

Bivua bikole bua kulonga tshiena Cambodge. Ngakangata dipangadika misangu ibidi bua kulekela kulonga, kadi Yehowa wakankankamika ku diambuluisha dia baledi banyi. Pakapita matuku, balongeshi banyi ne balongi betu bakatuadija kunsaka bua kukeba nsombelu uvua mua kumpetesha makuta. Kadi mvua musue kulua mpanda-njila ne ngakasungula bua kulonga malongesha a mu tulasa tua bikadilu avua mua kungambuluisha bua kupeta mudimu wa bianza wa mêba makese bua kukumbaja tshipatshila tshianyi. Pavua kalasa kapatuka, mvua ne tshibidilu tshia kupetangana ne bamue bampanda-njila ne kuenza nabu mudimu wa buambi. Mvua kabidi ndongesha balongi bavua balonga Anglais bu muakulu muibidi, disungula diakalua kungambuluisha bikole pashishe.

Pangakakumbaja bidimu 16, ngakumvua bakula bua kasumbu ka tshiena Cambodge kavua mu Long Beach mu tshimenga tshia Californie mu États-Unis. Ngakaya muaba eu ne ngakalonga mua kubala tshiena Cambodge. Diakamue pangakajikija kalasa, ngakalua mpanda-njila ne ngakatungunuka ne kuyisha bena mu Cambodge bavua pabuipi netu. Pangakakumbaja bidimu 18, ngakela meji bua kuya mu Cambodge. Utshivua muaba wa njiwu, kadi mvua mumanye ne: mu bantu miliyo dikumi bavua mu Cambodge, anu bantu bakese ke bakavua bumvue lumu luimpe lua Bukalenge. Tshikondo atshi, kuvua anu tshisumbu tshimue tshia bamanyishi 13 mu ditunga dijima. Ngakaya kumona ditunga dia Cambodge bua musangu wa kumpala pamvua ne bidimu 19. Bidimu bibidi pashishe, ngakasungula bua kuya kusombelamu. Ngakapeta mudimu wa kuenza mu mêba makese wa dikudimuna ne dilongesha Anglais bua meme kudiambuluisha mu mudimu wanyi wa buambi. Panyima pa matuku, ngakapeta mukaji uvua pende ne bipatshila bia buena bianyi. Tuetu bonso babidi tuvua bambuluishe bena mu Cambodge ba bungi bua kulambula mioyo yabu kudi Nzambi.

Yehowa mmunkumbajile ‘milombu ya mutshima wanyi.’ (Mus. 37:4) Kuvuija bantu bayidi mmudimu muimpe kupita midimu yonso. Mu bidimu 16 bindi muenze mu Cambodge, tshisumbu tshikese tshia batendeledi ba Yehowa 13 ntshidiunde, tshilue bisumbu 12 ne tusumbu 4.​—Muyuki mulonda kudi Jason Blackwell.