4 Bavua batufuke bua tuikale tukenga anyi?
Bua tshinyi lukonko elu ludi ne mushinga?
Diandamuna dia lukonko elu didi ditangila mushindu utudi tumona malu mu nsombelu.
Anji elabi meji
Bua tshinyi Nzambi udi mufuke bintu bilenga bionso ebi udi ulekela makenga?
Bantu badi kabayi batendelela badi bamona makenga bu bualu bua kubenga dikalaku dia Nzambi anyi malu adiye mulongolole. Badi bamba ne: makenga adi aleja mudi Nzambi 1) kayi ne bukole bua kuajikija, 2) kayi musue kuajikija, peshi 3) kayiku to.
Anu malu aa ke adi enza bua bantu bikale bakenga anyi?
BUA KUMANYA MALU MAKUABU
Tangila filme wa Tshidi tshitujadikila ne: Bible udi ne malu malelela ntshinyi? udi mu site wa jw.org.
Tshidi Bible wamba
Nzambi kavua mutufuke bua tuikale tukenga to.
Mmusue bua tuikale ne muoyo.
“Kakuena tshintu tshimpe [kudi bantu] tshidi tshipite kusanka ne kuenza malu mimpe matuku abu a muoyo, kabidi ne: muntu yonso adie, anue ne apetele disanka mu mudimu wende wonso mukole. Ndipa dia kudi Nzambi.”—MUAMBI 3:12, 13.
Nzambi wakapesha bantu babidi ba kumpala bionso bivua bikengela bua bobu kuikala ne muoyo kabayi bakenga.
Kavua mubafuke bobu ne bana babu bua bikale bakenga to.
“[Nzambi wakabambila] ne: ‘Nulelangane, nuvulangane, nuwuje buloba tente, nubukokeshe.’”—GENESE 1:28.
Bantu babidi ba kumpala bakasungula bua kubenga kutumikila Nzambi.
Ke bualu kayi bakadikebela bobu ne bana babu bonso makenga a bungi.
“Mpekatu mubuele mu ba pa buloba kupitshila kudi muntu umue, ne lufu lubuele bua mpekatu, ne mushindu eu lufu lutampakane kudi bantu bonso bua muvuabu bonso benze mpekatu.”—LOMO 5:12. *
Nzambi kavua mufuke bantu ne bukokeshi bua kudilombola to.
Anu mudibi kabiyi mua kuenzeka bua bantu kusombela muinshi mua mâyi, ke mudibi kabiyi mua kuenzeka bua bobu kudilombola nkayabu.
“Muntu udi wenda eu kena ne bukokeshi bua kuludika nansha dikasa diende to.”—YELEMIYA 10:23.
Nzambi ki mmusue bua tuikale tukenga to.
Mmusue bua tudienzeje mu mishindu yonso bua kuepuka ntatu.
“Bu wewe nansha muteye ntema ku mêyi anyi! Nunku ditalala diebe divua mua kulua anu bu musulu.”—YESHAYA 48:18.
^ tshik. 17 Mu Bible muaku “mpekatu” kawena anu uleja malu mabi adi muntu wenza to, kadi udi uleja kabidi nsombelu udi bantu bonso bapiane.
Mona bikuabu:
TSHIBUMBA TSHIA NSENTEDI
Nzambi udi umvua bishi bua makenga ebe?
Mvese ya mu Bible eyi idi mua kukuambuluisha bua kujingulula mudi Nzambi umona makenga.
