YOMARA ne muanabu Marcelo ne Hiver bavua basombele mu kamusoko mu Guatémala. Yomara wakatuadija kulonga Bible ne Bantemu, ndekelu wa bionso bana babu abu kutuadijabu kulonga pabu. Kadi kuvua lutatu. Busatu buabu mbampofu, kabavua bamanye mua kubala muakulu wa bampofu to. Ke bualu kayi, mulongeshi wabu wa Bible ke uvua ubabadila bikoso ne mvese ya dilongesha.

Bivua kabidi bikole bua bobu kubuela mu bisangilu. Bobu nkayabu kabavua mua kuenda minite 40 bua kufika ku Nzubu wa Bukalenge wa pabuipi to. Kadi bana betu ba mu tshisumbu bakabambuluisha bua kuikala kubuela mu bisangilu bionso. Pakatuadijabu kubapesha midimu mu tshisangilu tshia munkatshi mua lumingu, bana betu bavua babambuluisha bua kukuata midimu yabu ayi mu mutu.

Mu ngondo 5 wa 2019, bakatuadija kuenza bisangilu mu musoko wabu. Katshia anu pine apu, bena dibaka bampanda-njila ba pa tshibidilu bakaya kusombela mu musoko au. Bakaditekela tshipatshila tshia kubalongesha mua kubala muakulu wa bampofu ne mua kuwufunda, nansha muvua bena dibaka abu kabayi bawumanye pabu. Bakaya ku tshitekelu tshia mikanda bua kulonga muakulu au ne mishindu ya kuwulongesha.

Mu ngondo mikese, bampofu basatu abu bakatuadija kubala muakulu wa bampofu bimpe, kubambuluishabi bua kulubuluka kabidi mu nyuma. a Mpindieu Yomara, Marcelo, ne Hiver bakadi bampanda-njila ba pa tshibidilu. Marcelo mmusadidi wa mudimu. Badi badifila bikole mu malu a mu nyuma lumingu luonso elu. Disanka diabu ndiambulukile bakuabu.

Bana ba muntu basatu aba badi ne dianyisha bua mudi bena mu tshisumbu babenzele malu ne dinanga. Yomara udi wamba ne: “Bantemu mbatuleje dinanga dia buena Kristo bulelela kutuadijila anu ku dituku dituvua batuilangane nabu bua musangu wa kumpala.” Marcelo udi wamba pende ne: “Tudi ne balunda bimpe mu tshisumbu tshietu, tudi mu dîku dia bana betu ba buloba bujima badi mu tshisuikidi tshia buobumue tshia dinanga.” Yomara ne bana babu ba balume mbidile ne muoyo kuulu kuulu dituku diamonabu buloba bulua Mparadizu.​—Mis. 37:10, 11; Yesh. 35:5.