Kitatyi kyotelekanga bino binenwa bya amba, “Mfulo ibafwena!” lelo i bika bikwiyanga mu ñeni? Lelo umonanga musapudi mukatampe wisamba ku alutale koku ulonga madingidijo, Bible ku makasa? Nansha umonanga muntu umo mununu wa myevu wimene kufula kwa dishinda, uvwele nkanzo milampe mwikute ne monji mu kifuka, uselele kiyukeno kya musapu wa difuku dya butyibi? Kulanga namino kubwanya kulengeja bantu bamo bakwatwe moyo, ino bakwabo nabo babwanya kutatana nansha kwibimona bu bisela.

Bible unena amba: “Mfulo keiya.” (Mateo 24:14) Kino kinkumenkume kimo kyonka kitwanga ne bu “difuku dikatampe dya Leza” ne bu “Amakedona.” (Kusokwelwa 16:14, 16) Na bubine, bipwilo bivule bidi na milangwe mishileshile pa uno mwanda, kadi ingi, mikutakane. Nansha nankyo, Bible i mulombole mfulo patōkelela​—ulombola moikadile ne mokeikadilepo. Kadi Kinenwa kya Leza kitukwasha twivwanije amba mfulo idi pabwipi. Kikatampe kutabukidila, kitufundija muswelo wa kupanda! Dibajinji bidi, tutōkejei milangwe imo ya bubela ne kuleta shintulwilo mifike’po. Lelo na bubine kukwatañana na Bible, “mfulo” ishintulula bika?

1. MFULO KELUBIMBIPO LUKATAMPE LUSOKA NTANDA.

   Bible unena amba: “[Leza] wādije byalwilo bya panopanshi, amba kepakikajinapo nyeke.” (Ñimbo 104:5) Kino kisonekwa pamo ne bikwabo bitukulupija amba Leza kakonakanyapo uno umbuo wa ntanda nansha kwiuleka onakanibwe​—lonso!​—Musapudi 1:4; Isaya 45:18.

2. MFULO KEKINTUPO KYA KUFWATAKANYA, KYAMPIKWA KUPANGIKA.

   Bible ulombola amba mfulo i mipangikwe​—Leza i mutūle’ko kitatyi kyayo kipotoloke. Tutanga amba: “Pa mwanda wa dyodya difuku ne nsá mine, i kutupu nansha umo wibiyukile, nansha bamwikeulu mūlu nansha Mwana, poso’nka Tata. Talai’nka kutala, kemwakilālai, mwanda kemuyukilepo kitatyi kitungwe pokikafika.” (Mako 13:32, 33) Na bubine, Leza (“Tata”) i mutūle’ko “kitatyi kitungwe” kine kyakaleta mfulo.

3. MFULO KEIKASHILULWAPO NA BANTU NANSHA NA BUTYAFU BUSENSUKA MU LWELELE.

   Le i bika bikaleta mfulo? Kusokwelwa 19:11 unena amba: “Kadi namwene diulu dyashituka, na’mba ntale! kabalwe katōka tō. Ne mwine wadi utentamine’po witwanga bu Mukōkele kadi wa Bine.” Vese 19 ubweja’ko amba: “Kadi namwene kinyema kya ntanda ne balopwe ba pano pa ntanda ne bibumbo byabo bibungīle pamo kukalwa divita yewa ushikete pa kabalwe ne kibumbo kyandi.” (Kusokwelwa 19:11-21) Mu kipindi kikatampe ino myanda i ya kyelekejo, tukokeja kwibivwanija mu uno muswelo amba: Leza ukatuma kibumbo kya bamwikeulu konakanya balwana nandi.

1. MFULO YA IMBIKALO YA BANTU MIKOMENWE.

   Bible unena amba: “Leza wa mūlu ukemika bulopwe [umbikalo] kebukōnakanibwapo nansha patyetye,  nansha bulopwe bwine bwabo kupityila ku bantu bangi, ehe; ino bukatyumuna bipindibipindi ne kukubija malopwe ano’a onsololo, kadi bukemananga nyeke.” (Danyele 2:44) Monka mokyalombwelwanga kūlu’ku, mu kipindi 3, kukekala bonakani bwa “balopwe ba pano pa ntanda ne bibumbo byabo,” bine “bibungīle pamo kukalwa divita yewa ushikete pa kabalwe ne kibumbo kyandi.”​—Kusokwelwa 19:19.

2. MFULO YA DIVITA, BUKALABALE, NE BUKONDAME.

   “[Leza] watukija mavita ne ku mfulo ya ntanda.” (Ñimbo 46:9) “Babuluji bakekalanga mu ntanda’ya, kadi babwaninine bakekadidilanga monka. Ino nanshi bapupakane bakatyibibwa ku ntanda’ya, kadi banzazangi bakatukunwamo.” (Nkindi 2:21, 22) “Talai! Nalonga bintu byonso ke bipya.”​—Kusokwelwa 21:4, 5.

3. MFULO YA MITŌTELO ILUBILA LEZA NE BANTU.

   “Bapolofeto bafumika na bubelabubela, ne bapidishitu balela mwendele mutyima wabo . . . kabidi lelo kyomukalonga kumfulo’kwa i kika le, a?” (Yelemia 5:31) “Bavule bakanena mu dyodya difuku amba: ‘Mfumwetu, Mfumwetu, le ketwadipo tunena bupolofeto mu dijina dyobe, tupanga bandemona mu dijina dyobe ne kulonga bilongwa bya bukomo mu dijina dyobe?’ Ino ami nami nkebalombola’mba: Nkimuyukilepo nansha dimo! Ntalukei papo, banwe ba kujilula bijila!”​—Mateo 7:21-23.

4. MFULO YA BANTU BAZAMBALAJA NE BAKWATAKANYA MYANDA YA INO NTANDA.

   Yesu Kidishitu wānene amba: “Pano po pene pemanine butyibi, amba kitōkeji kyaile mu ino ntanda; ino bantu basanswa’ko fukutu kupita’ko kitōkeji, mwanda mingilo yabo yadi mibi.” (Yoano 3:19) Bible wisambila pa bonakani bwa ntanda yonso mu kitatyi kya Noa muntu wa kikōkeji. “Ntanda ya mu kine kitatyi’kya yāonakanibwe poyālobele mu mema. Ino na kinenwa kimo kyonka madiulu ne ntanda bidi’ko pano’bi bibikīlwe mudilo kadi bilaminwe kufika ne mu difuku dya butyibi ne dya konakanibwa kwa bantu bampikwa bwine Leza.”​—2 Petelo 3:5-7.

Yuka amba “difuku dya butyibi ne dya konakanibwa” i didingakanibwe na bonakani bwa “ntanda” ya mu mafuku a Noa. Le i ntanda’ka yāonakanibwe? Umbuo wetu kewāonakanibwepo; ino i “bantu bampikwa bwine Leza”​—balwana na Leza​—bo ‘bāonakanibwe.’ Mu kitatyi kya “difuku dya butyibi” bwa Leza, boba betūdile bu balwana na Leza nabo bakonakanibwa. Inoko balunda na Leza, abo bakapanda pamo na mwāpandile Noa ne kisaka kyandi.​—Mateo 24:37-42.

Langa’po bidi mukekadila ntanda kitatyi kikatalulwa’ko bantu babi! Bine, musapu wa Bible utala mfulo i musapu muyampe, ke mubipo. Ino, ubwanya kwiipangula amba: ‘Lelo Bible i mwitulombole kitatyi kikafika mfulo? Lelo idi pabwipi? Lelo tukapanda’ko namani?’