BENE KIDISHITU ba mu myaka katwa kabajinji bālongele bukomo bwa kusapwila bantu bavule “myanda miyampe ya Bulopwe.” (Mateo 24:14) Bamo bādi benda’nka ne mu matanda a bweni. Kimfwa, mutumibwa Polo wāendele mu kifuko kimo kya mu ntanda imo itwa dyalelo bu Tirki, wāsapwile’mo bininge mu ñendo yandi ya bumishonele. * Kintu kya myaka 2 000 pa kupita’po, mu 2014, mu Tirki mwalongelwe kampanye ka pa bula ka busapudi. Mwanda waka kwateakanibwe kano kampanye? Le i bāni balongele’ko?

Mu Tirki mudi basapudi 2 800 ne musubu, inoko mu ino ntanda mudi bantu midiyo 79. Kino kishintulula’mba musapudi 1 mu Tirki, udi na bantu ba kusapwila kubwipi kwa 28 000. Enka na mobwanya kufwatakenya, bano basapudi babwanya’tu kusapwila bantu batyetye kete ba mu ino ntanda. Kitungo kya kano kampanye ka pa bula ka busapudi, kyadi kya kusapwila bantu bavule mu kitatyi kityetye’tu. Kubwipi kwa batutu ne bakaka 550 ba mu matanda makwabo besamba Kitirki baendele mu Tirki ne kusapwila pamo na basapudi ba mu ino ntanda mu kano kampanye. Le i bika byalupikile’ko?

Kusapulwa kwa bukamoni konsokonso. Kipwilo kimo kya mu Ishitambule kyalembele amba: “Bantu pobadi betumona badi betwipangula’mba: ‘Le mudi na kitango muno? Mwanda Batumoni ba Yehova i basambakane muno monso!’” Kipwilo kya mu Izmir nakyo kyalembele amba: “Muntu umo wadi wendeja taxi wafwenene mukulumpe umo wamwipangula’mba, ‘I bika bilongeka? Le musaka kutandabula mwingilo wenu?’” Na bubine, kano kampanye kamwenwe na bantu bonso.

Nansha ke basapudi ba mu matanda a bweni basangedile mwingilo wa busapudi. Steffen, watambile ku Danemarke, wanenene amba: “Difuku ne difuku, nadi nsapwila bantu kebaivwene kashā myanda ya Yehova. Na bubine, namwene’mba ndyukanyanga dijina dya Yehova.” Jean-David, watambile mu Franse walembele amba: “Twadi tusapula mansá mavule mu kilayi’tu kimo. Bine kyadi kya kutendelwa! Bantu bavule kebadipo bayukile Batumoni ba Yehova. Divule ku njibo ne njibo twadi tupēlelwa kushilula mīsambo, kulomboja video yetu nansha imo, ne kushīla mwine njibo mabuku.”

 Basapudi 550 batenwe ku kano kampanye, baabenye mabuku 60 000 mu mayenga’tu abidi kete! Kano kampanye kalengeje bukamoni busapulwe konsokonso.

Kuvudila’ko kwa bupyasakane mu mwingilo. Kano kampanye kakankamikile banabetu ba mu Tirki. Bavule bashilwile kulangulukila pa mwingilo wa kitatyi kyonso. Na bubine, kibalwa kya bapania ba lonso ba mu Tirki kyakandile kufika mu bantu 24 pa katwa mu myeji 12 yalondele’po pa kupwa kwa kampanye.

Basapudi batambile mu matanda makwabo nabo balombwele mwaikadile kano kampanye na lupusa pa mwingilo wabo nansha ke pobajokele mu matanda abo. Şirin, kaka umo watambile mu Alemanye, walembele amba: “Banabetu ba mu Tirki badi bapēlelwa bininge kusapula bya kiponka na ponka. Nadi ngivwana bumvu bwa kusapula bya kiponka na ponka. I dyese’po kashā, mwanda kupityila ku kano kampanye ka pa bula, ku bimfwa bya banabetu ba mu Tirki, ne kupityila ku milombelo, pano kenoñanga bintu byonkyadipo mbwanya kulonga mafuku kunyuma. Nadi kensapula’nka ne mu mashinda a ndyandya munanga bantu bavule, mpāna matrakte! Pano nkikidipo na bumvu bwa kusapula na monadi dibajinji.”

Johannes, watambile mu Alemanye wanenene amba, “Nefundile bintu bivule pa mwa kulumbulwila mwingilo wami, na bubine banabetu ba muTirki basakanga kusapwila bantu bavule bubine. Basapulanga bukamoni ponso pobamona mukenga. Nami nakwete butyibi bwa kulonga uno muswelo ponajokele mu Alemanye. Na bubine pano nsapwilanga bantu bavule kupita mafuku kunyuma.”

Zeynep, watambile mu Franse wanenene amba, “Kano kampanye kalumbulwile mwingilo wami bininge. Kadi kaunkweshe ngikale na bukankamane ne kukulupila bininge mudi Yehova.”

Kupwana bininge kwa basapudi. Buswe ne bumo bwadi mu bukata bwa banabetu ba mu matanda meshileshile bwadi bwa endaenda. Jean-David utelelwe kūlu’ku wanenene amba “Twemwenine ‘kizaji kya banabetu.’” Kadi wabwejeje’ko amba: “Badi betutundaila pamo bwa balunda nabo ne pamo’nka bwa bamwanabo ba ku mashi. Betutambwile ku mobo abo. Nadi ndyukile amba tudi mu kisaka kya bubana na bana bwa ntanda yonso ponadi nebutanga misunsa mivule mu mabuku etu. Inoko pano nemwenine’bo na  meso. Ngivwananga fyedi pa kubadilwa mu bantu ba Yehova kadi mufwijanga’ko pa kumpa dino dyese dya kutendelwa.”

Claire, watambile mu Franse wanenene amba, “Ekale boba batambile mu Danemarke, mu Franse, mu Alemanye, nansha ba mu Tirki, batwe bonso twaikele bu kisaka kimo. Bidi pamo’nka na Leza wabudile mikalo ya mizo na gome mikatampe.”

Stéphanie, watambile mu Franse nandi ubweja’ko amba: “Kano kampanye ka pa bula ketufundije amba, kitulungile mu bumo ke bibidijipo, nansha ndimi, ino i buswe botuswele Yehova batwe bonso.”

Bantu bavule batambile mu matanda a bweni bashilwile kulanga ya kuvilukila mu Tirki mwanda wa kukwasha ku mwingilo mukatampe ukilomba kwingilwa mu ino ntanda. Bamo bidi bavilukidile’mo kala. Bano bengidi ba mutyima wa kwingidila kokwa kusakilwa bukwashi i ba kufwijibwa’ko bininge.

Tala bidi kimfwa kya kakisumpi kamo ka basapudi 25 kadi mu mwaba mwitolwele. Mwadi’tu’nka mukulumpe umo kete mu bula bwa myaka mivule. Langa’po bidi mwasangedile basapudi ba mu kano kakisumpi paile’mo banabetu basamba ba kwituma mu 2015, batambile mu Alemanye ne mu Pays-Bas mwanda wa kukwatakanya kano kakisumpi!

Le basapudi ba mutyima wa kwituma baendele mu Tirki banenene bika pa mobadi bekadile’mo? I bine, kitatyi kimo kebipēlangapo, inoko kwingidila kokwa kusakilwa bukwashi kuletanga mpalo mivule. Pano tala byanenene basapudi bamo:

Federico, tutu umo musonge wa myaka 40 ne musubu watambile mu Eshipanye, unena’amba, “Kubulwa bintu bya ku ngitu bivule kwankweshe nemone bu ngidi na bwanapobo ne kuta mutyima ku bintu bya mvubu mpata.” Le nandi wasangedile uno mwingilo? Aye mwine unena’mba “Bine, i amo! Shi uvilukile ku ntanda-bene na kitungo kya kukwasha bantu bayuke Yehova, na bubine ukekala mu makasa andi. Kadi ukeivwana’mba Yehova ukutele mutyima mpata.”

Rudy, tutu umo musonge wa myaka isenselela ku 60 watambile mu Pays-Bas, unena’mba, “Kwingidila  kokwa kusakilwa bukwashi, ne kusapwila bantu bavule bubine badi kebebwivwene kashā kwitupanga nsangaji mivule. Kadi kumona mwitabijija bantu bubine na nsangaji kwitulengejanga netu tusangale.”

Sascha, tutu umo musonge wa myaka 40 ne musubu watambile mu Alemanye, unena’mba: “Kyaba kyonso poñenda mu busapudi netananga’mo na bantu kebaivwene kashā bubine. Kupa bano bantu mukenga wa kuyuka Yehova kumpanga nsangaji mivule.”

Atsuko, kaka umu musongwe wa myaka 35 watambile mu Jampani, unena’mba: “Pa kala, nadi nkimba Amakedona ifike bya bukidibukidi. Ino ponavilukidile mu Tirki, mfwijanga’ko Yehova pa mwanda wa kitukijetyima kyandi. Pomona mwendejeja Yehova mwingilo wa busapudi wa ntanda yonso, nsangelanga kumufwena bininge.”

Alisa, kaka umo wa myaka 30 ne musubu watambile mu Rusi, unena’mba: “Kwingidila Yehova mu uno mwingilo kwaunkweshe nemwene buyampe bwandi.” (Ñimbo ya Mitōto 34:8) Ubweja’ko amba: “Yehova kadipo’nka Tata wami kete ino kadi i Mulunda nami wa pa mutyima, onayuka biyampe mu bitatyi bishileshile. Mu būmi bwami, ndi mwimwene bitatyi bivule bya nsangaji, myanda isangaja, ne madyese mavule!”

Kupityila ku kampanye ka pa bula kalongelwe mu Tirki, bantu bavule basapwidilwe myanda miyampe. Nansha nankyo, mukishele mwaba mukatampe kewasapwilwe’mo. Difuku ne difuku, basapudi bavilukidile mu Tirki bakitananga’mo na bantu kebaivwene kashā myanda itala padi Yehova. Le nobe usakanga kwingidila mu mwaba na uno? Shi i amo, tukukankamika’mba: ‘Tulula meso obe, umone madimi, amba abatōka tō mwanda wa kwangula.’ (Yoano 4:35) Le nobe usakanga kukakwasha mu kipindi kyo-kyonso kya ntanda mudi madimi ‘atōka tō mwanda wa kwangula’? Shi i amo, shilula na matabula a kamweno tamba’nka pano, mene akakukwasha ufikile pa kino kitungo. Kintu kya mvubu i kino: Kusapula bininge mwanda wa kusambakanya myanda miyampe “ne kulakula kwine kwa ntanda” kukakuletela madyese keadingakanibwa!​—Bilongwa 1:8.