Bantu bavule ke baleke’byo kwenda ku bipwilo, mwanda kebatene’kopo madingi ne busengi. Ino penepo, mwanda waka ufwaninwe kwenda ku kupwila kwa Batumoni ba Yehova? Le ukatana’ko bika?

Nsangaji ya kwikala mu bantu badi na buswe ne bata bakwabo mutyima. Mu myaka katwa kabajinji, bene Kidishitu bādi babanibwe mu bipwilo, bapwila mwanda wa kutōta Leza, kwifunda Bisonekwa, ne kwikankamika abo bene na bene. (Bahebelu 10:24, 25) Byobādi na buswe, bādi bemona bu balunda ba bine—bana na bana ba ku mushipiditu. (2 Tesalonika 1:3; 3 Yoano 14) Tulondanga kyabo kimfwa ne kwimwena nsangaji ya muswelo umo onka.

Kamweno ka kwifunda mwa kulondela misoñanya ya mu Bible. Tamba mu bitatyi byāsonekelwe Bible, bana-balume, bana-bakaji ne bana bebungilanga bonso pamo. Bantu bayukile kufundija bengidijanga Bible mwanda wa kwitukwasha tuyuke mwa kulondela misoñanya idi’mo mu būmi bwetu. (Kupituluka 31:12; Nehemia 8:8) Bonso bakokeja kulondolola’ko mu bipindi bilomba kulondolola ne kwimba’ko, mwa kulombwela lukulupilo lwabo lwa bwine Kidishitu.—Bahebelu 10:23.

Dyese dya kukomeja lwitabijo lobe mudi Leza. Mutumibwa Polo wāsapwidile kipwilo kimo kya mu abo mafuku amba: “Ngabilanga bininge kwimona nenu, amba . . . twikankamike batwe bonso, muntu ne muntu ukankamikwa na lwitabijo lwa mukwabo, ne lwenu ne lwami.” (Loma 1:11, 12) Potwimona kitatyi ne kitatyi na banabetu ku kupwila, tukomejanga lwitabijo ne kusumininwa kotusumininwe kwiendeja bu bene Kidishitu.

Lelo ubulwe’po kwiya kupwila netu amba wimwene abe mwine byotwanena’bi? Bakakutundaila na nsangaji. Kebalombenga’kopo lupeto pa kutwela—ne mukongo mwine i kutupu’o.

• Lelo kupwila kwetu kulondanga kimfwa kya bāni?

• Le tukokeja kumwena namani mu kupwila kwa bwine Kidishitu?