Bene Kidishitu bakulupile amba Yesu wāfwidile bubi bwa bantu. (1 Petelo 3:18) Inoko, pa kupanda bilomba kulonga bivule kupita’ko’tu kwitabija’mba Yesu i Umpandiji. Enka ne bandemona nabo bayukile amba Yesu i “Mwanā Leza,” ino kebakapandepo, bakonakanibwa.—Luka 4:41; Yude 6.

•  Le mfwaninwe kulonga bika nkapande?

•  Le tunene bika pa “Milombelo ya Kipya-Mambo”?

•  Le “Milombelo ya Kipya-Mambo” i mitambe kwepi?

•   Ufwaninwe kwitabija’mba Yesu wāpēne būmi bwandi pa mwanda wa bubi bwetu. (Bilongwa 16:30, 31; 1 Yoano 2:2) Kadi ufwaninwe kwitabija’mba Yesu i muntu udi’ko bine ne amba myanda yonso inena Bible padi Yesu i ya bine.

•   Wifunde bine bifundija Bible. (2 Temote 3:15) Bible unena’mba ba mutumibwa Polo ne Shilasa bāsapwidile mulami wa kifungo amba: “Itabija mudi Mfumwetu Yesu, nabya usa kupanda.” Kupwa bāshilula kufundija mulami wa kifungo “mwanda wa Yehova a.” (Bilongwa 16:31, 32) Kulonga namani kulombola’mba mulami wa kifungo kādipo bine ukokeja kwitabija mudi Yesu pakubulwa kwivwana Mwanda wa Leza. Wādi ufwaninwe kwikala na buyuki bwa bine bwa mu Bisonekwa.​—1 Temote 2:3, 4.

•   Wisāsa. (Bilongwa 3:19) Ufwaninwe ne kwisāsa, nansha kwialakanya bya binebine pa ngikadila nansha bilongwa bibi bya pa kala. Bakwenu bakamona kwisāsa kobe shi ubaleka bilongwa bifītyija Leza mutyima ne kulonga “bilongwa bifikīle pa kwisāsa.”—Bilongwa 26:20.

•   Batyijibwa. (Mateo 28:19) Yesu wānenene amba bonso bekala bu bandi bana ba bwanga bakabatyijibwa. Mulami wa kifungo otwesambilanga’po wābatyijibwe. (Bilongwa 16:33) Mu muswelo umo onka, Petelo paāpwile kufundija kibumbo kikatampe myanda ya Yesu, “baitabije binenwa byandi na nsangaji babatyijibwa.”​—Bilongwa 2:40, 41.

•   Kōkela misoñanya ya Yesu. (Bahebelu 5:9) Boba ‘balamine byonso’ byāsoñenye Yesu balombolanga kupityila ku mwiendelejo wabo amba i balondi bandi. (Mateo 28:20) Bekalanga bantu “ba kulonga kinenwa, ke ba kutejapo bitupu.”​—Yakoba 1:22.

•   Ūminina’nka ne ku mfulo. (Mako 13:13) Bana ba bwanga ba Yesu ‘bafwaninwe kūminina’ pa kupanda. (Bahebelu 10:36) Kimfwa, mutumibwa Polo wādi nyeke ukōkele bufundiji bwa Yesu ne kulamata kudi Leza, kadi wāūminine mu būmi bwandi bwa bwine Kidishitu kufika ne byaāfwile.—1 Bene Kodinda 9:27.

 Bantu bamo ba mu bipwilo balombelanga milombelo imo yobeta bu “Milombelo ya Kipya-Mambo” ne bu “Milombelo ya Lupandilo.” Nakampata mu ino milombelo betabijanga’mo bubi bwabo ne kulombola’mba Yesu wāfwile pa mwanda wa bubi bwabo. Kadi betanga Yesu āye mu mityima yabo nansha mu būmi bwabo. Inoko mu Bible kemudipo ino milombelo, kadi kasoñenyepo kulombela “Milombelo ya Kipya-Mambo.”

 Bantu bamo balañanga’mba pa kupwa kulombela “Milombelo ya Kipya-Mambo,” muntu waikala na lukulupilo lwa kupanda lonso. Inoko muntu kakapandepo mwanda’po’tu ulombelanga. Byotudi bantu bampikwa kubwaninina, tuloñanga nyeke bilubo. (1 Yoano 1:8) O mwenda Yesu wāfundije balondi bandi kulombela kitatyi ne kitatyi mwanda wa kulekelwa bubi. (Luka 11:2, 4) Ne kadi bibi, bene Kidishitu bamo bādi na dyese kukamona būmi bwa nyeke bājimije dino dyese mwanda bāpalukile kudi Leza ne kuleka’byo kumwingidila.​—Bahebelu 6:4-6; 2 Petelo 2:20, 21.

 Balembi ba mānga bepatanyanga pa kwine kutambile “Milombelo ya Kipya-Mambo.” Bamo banenanga’mba kino kisela kyāshilwile kitatyi kyātambile bene Mishoni mu Katolika. Bakwabo nabo amba bantu bashilwile kulombela “Milombelo ya Kipya-Mambo” mu bisumpi bya bipwilo bya mu myaka katwa ka 18 ne 19. Nansha bikale namani, kino kilongwa kekitabijibwepo mu Bisonekwa—kekikwatañenepo na byobya bifundija Bible.