Bantu bavule banenanga’mba ketubwanyapo kuyuka mwine wālembele Bible. Ino Bible ulombola patōka mwine wālembele myanda idi’mo. Bipindi bimo bishilula na ino misemwa, kimfwa’mba, “binenwa bya Nehemia,” “kimonwa kyamwene Isaya,” ne “kinenwa kya Yehova kyaiya kudi Yoela.”—Nehemia 1:1; Isaya 1:1; Yoela 1:1.

 Balembi bavule ba Bible bādi bayukile amba bādi balemba mu dijina dya Yehova, Leza umo kete wa bine, ne amba i aye wādi wibaludika. Bapolofeto bālembele Bisonekwa bya Kihebelu bānenene misunsa 300 ne kupita’mba: “Yehova wanena namino amba.” (Amose 1:3; Mika 2:3; Nahumi 1:12) Balembi bakwabo bātambwile musapu wa Leza kupityila ku bamwikeulu.—Zekadia 1:7, 9.

 Bible wālembelwe na kintu kya bantu 40, mu bula bwa myaka 1 600. Bantu bamo bāingidijibwe mwanda wa kulemba mikanda mivule ya mu Bible. Bine, Bible i kibīko kityetye mudi mikanda 66. Mudi mikanda 39 ya Bisonekwa bya Kihebelu, itwa na bantu bavule bu Kipwanino Kikulu, ne mikanda 27 ya Bisonekwa bya Kingidiki bya bwine Kidishitu, ivudile kwitwa bu Kipwanino Kipya.