Mumweno wetu ne bilongwa byetu bya pa mfwani bilondanga bufundiji bwa mu Bible, kimfwa buno:

•   I byendele’mo kudila shi muntu otusenswe wafu. Bana ba bwanga ba Yesu bādi badila pādi pafwa baswe babo. (Yoano 11:33-​35, 38; Bilongwa 8:2; 9:​39) Nanshi ketumonengapo mfwani bu kitatyi kya fetyi. (Musapudi 3:​1, 4; 7:​1-4) Ino twiimonanga bu kitatyi kya kulombola bulanda.​—Loma 12:15.

•   Bafwe kebayukilepo kintu. Nansha twikale ba kabila’ka nansha ba muzo’ka, twepukanga bibidiji ne bilongwa kebikwatañenepo na Bisonekwa bya kulanga’mba bafwe bayukile kintu ne amba babwanya kwikala na lupusa pa bōmi. (Musapudi 9:​5, 6, 10) Mu bino mubadilwa ne bibidiji pamo bwa kulāla ntanda, kulaa ufwile ne kulangula kisao, kabujadilo, kuneneja ne kwipangula ufwile, ne kusubila. Twepukanga bino bibidiji ne bilongwa byonso mwanda wa kukōkela musoñanya wa mu Bible unena’mba: ‘Mwisansanyei ne kuleka kutenga kintu kya disubi.’​—2 Kodinda 6:​17.

•   Kudi lukulupilo lwa kumona bafwile. Bible ufundija’mba kukekalanga lusangukilo kadi kukekala kitatyi kekikekala’kopo lufu monka. (Bilongwa 24:15; Kusokwelwa 21:4) Luno lukulupilo lwitukwashanga tuleke kudila bipitepite monka molwākwashishe bene Kidishitu babajinji.​—1 Tesalonika 4:​13.

•   Bible witudingila twikale batūkanye. (Nkindi 11:2) Ketufwaninwepo kumona’mba mfwani o mukenga wa “kwimwekeja na mitatulo” motwikadile nansha pa lupeto lotudi nalo. (1 Yoano 2:​16) Ketufwaninwepo kuteakanya bintu bya pa mfwani mwanda wa kwisangaja nansha kupungija sanduku wa bei mpata ne kutulumuja bantu na kumupotela bivwalwa bya bei.

•   Ketuningilangapo bantu nkulupilo yetu itala pa mfwani. Mu uno mwanda, tulondanga musoñanya unena’mba: “Batwe bonso, wa pandi wa pandi, tukeshintulwilanga kudi Leza.” (Loma 14:12) Inoko, ponso petupa bantu mukenga, twibashintulwilanga nkulupilo yetu “na butūkanye ne bulēme bukatampe.”​—1 Petelo 3:​15.

 Kifuko: Shi kisaka kibasake, kibwanya kuselela lufu konso kobakasaka, kimfwa ku Njibo ya Bulopwe, ku lamolo (morgue), ku njibo ya muntu, kobasōkelanga bantu bafwe, nansha ku tubudi.

 Busapudi: Kunenwanga mwisambo usenga boba bafwidilwe na kushintulula byobya binena Bible pa bafwe ne lukulupilo lwa lusangukilo. (Yoano 11:25; Loma 5:​12; 2 Petelo 3:​13) Ino mpangiko ya pa mfwani ibwanya kuvuluja ngikadila miyampe ya ufwile, padi na kulombola ñeni miyampe yotuboila ku kimfwa kyandi kya kikōkeji.—2 Samwele 1:​17-​27.

 Kubwanya kwimbwa lwimbo lwisambila pa Bisonekwa. (Kolose 3:​16) Busapudi bukafula na milombelo isenga.​—Fidipai 4:​6, 7.

 Bya kufuta nansha mikongo: Ketulombengapo ba mu kyetu kipwilo lupeto mwanda wa mingilo ya kipwilo, kubadila’mo ne ya pa mfwani, kadi ketukoñengapo mikongo ku kupwila kwetu.​—Mateo 10:8.

 Ba kutanwa’ko: Boba ke Batumonipo babwanya kutanwa ku busapudi bwa pa lufu mu Njibo ya Bulopwe. Pamo bwa kupwila kwetu kukwabo, buno busapudi nabo i bwa bantu bonso.

 Kamoni yense ukwatanga butyibi aye mwine, mungya mutyima wandi wa mundamunda mufundijibwe na Bible. (1 Temote 1:​19) Inoko ketutanwangapo ku bisela bya bipwilo byotumona’mba kebikwatañenepo na Bible.​—2 Kodinda 6:​14-​17.