Musapudi 7:1-29
7 Dijina diyampe* i dipite buya māni mayampe,+ kadi difuku dya lufu i dipite buya difuku dya kubutulwa.
2 I kipite buya kwenda ku njibo ya madilo kupita’ko kwenda ku njibo ya masobo,+ mwanda yo mfulo ya muntu ense, kadi mūmi ukalama’kyo ku mutyima.
3 Tusua i tupite buya tusepo,+ mwanda bulanda bwa mpala bulumbululanga mutyima.+
4 Mutyima wa muntu wa tunangu udi mu njibo ya madilo, ino mutyima wa kivila udi mu njibo ya nsangaji.*+
5 I kipite buya kwivwana kufuna kwa muntu wa tunangu+ kupita’ko kwivwana lwimbo lwa balembakane.
6 Mwanda monka mutolokelanga miba itēma munshi mwa kisuku, mo mwikadile ne tusepo twa mulembakane;+ kadi kino nakyo i kya bitupu.
7 Inoko kumweshibwa malwa kubwanya kutwala muntu wa tunangu ku bulubi, kadi majika-kanwa nao onanga mutyima.+
8 Mfulo ya mwanda i mipite buya ngalwilo yao. Kutūkija mutyima i kupite buya kwizunzula mu mushipiditu.+
9 Kokapēlakana* kuloba,+ mwanda bulobo budi mu kyadi kya balembakane.*+
10 Kokanena’mba, “Mwanda waka mafuku a kala adi mapite buya ano?” mwanda ubaipangula kino pampikwa tunangu.+
11 Tunangu pamo ne bupyani i kintu kiyampe kadi i kamweno ku boba bamona kitōkeji kya dyuba.*
12 Mwanda tunangu tukiñanga+ monka mukingilanga lupeto,+ ino kamweno ka buyuki i kano: Tunangu tulamanga būmi bwa yewa udi nato.+
13 Langulukila pa mwingilo wa Leza wa bine, mwanda i ani ubwanya kōlola kyokya kyakondamija?+
14 Mu difuku diyampe, mwekeja buno buyampe,+ ino mu difuku dya masusu,* vuluka’mba Leza walongele dyodi ne dikwabo dine,+ amba bantu kebakayuka* kintu nansha kimo kikebafikila mu mafuku āya kumeso.+
15 Mu būmi bwami bwa bitupu+ namone kintu kyonso—tamba ku muntu moloke oneka mu boloke bwandi+ kutūla ne ku mubi wikele mūmi kitatyi kilampe nansha byadi na bubi.+
16 Kokikala moloke kutabuka,+ nansha kwilombola bu wa tunangu kutabuka.+ Le kyowiletelela musala i kika?+
17 Kokikala mubi kutabuka, nansha kwikala mulembakane.+ Le kyofwila kitatyi kyobe kekyabwene i kika?+
18 I biyampe kwivwanija kidyumu kimo pa kubulwa kuleka kikwabo;+ mwanda yewa utyina Leza ukevwana byonso bibidi.
19 Tunangu tulengejanga muntu wa tunangu ekale mukomo kupita bana-balume dikumi bakomo ba mu kibundi.+
20 Mwanda kekudipo moloke nansha umo pano panshi uloñanga nyeke biyampe ne kulonga bubi mpika.+
21 Kadi, kokalama ku mutyima binenwa byonso binena bantu;+ shi bitupu, ukevwana mwingidi obe ukusakila bibi;*
22 mwanda uyukile biyampe mu mutyima obe amba nobe wasakīle bakwabo bibi misunsa mivule.+
23 Natompele na tunangu bino byonso, ebiya nanena’mba: “Nkekala wa tunangu.” Ino byampityile kipimo.
24 Kyokya kidi’ko kekipetekapo kadi kidi munshi bininge. Le i ani ubwanya kwivwanija’kyo?+
25 Natele mutyima wami ku kuyuka ne kutala ne kukimbakimba tunangu ne bubinga bulongekela bintu, ne kwivwanija bubi bwa buvila ne buvila bwa bulubi.+
26 Penepo nasokola kino amba: Kintu kilula kutabuka lufu i mwana-mukaji udi pamo bwa bukonde bwa kiluwe, udi na mutyima pamo bwa makonde a nkokwa, ne udi na makasa pamo bwa miyololo ya kifungo. Yewa usangaja Leza wa bine ukamupanda,+ ino kipya-mambo ukwatwanga nandi.+
27 Nkonga-bantu unena’mba,+ “Tala, kino ye kyonatana. Nabandawile kintu ne kintu mwanda wa kufikila pa kyonadi nkimba,
28 ino kyokya kyonadi* nkimba’nka kukimba, nkyekitenepo. Natana mwana-mulume* umo mu bantu kanunu, ino nkitene’mopo mwana-mukaji.
29 Natana kino kimo kete amba: Leza wa bine walongele bantu boloke swā,+ ino abo abakimbe nkuku mingimingi.”+
Kunshi kwa Dyani
^ Nansha’mba “Kutumbila biyampe.” Kishima pa kishima i, “Dijina.”
^ Nansha’mba “makayo.”
^ Bibwanika padi i, “i kiyukeno kya bulembakane.”
^ Kishima pa kishima i, “Kokapeja mu mushipiditu obe.”
^ Ko kunena’mba, boba bōmi.
^ Nansha’mba “kebakasokola.”
^ Nansha’mba “kyamalwa.”
^ Kishima pa kishima i, “ukufinga.”
^ Nansha’mba “muya wami.”
^ Nansha’mba “mwana-mulume moloke swā.”
