MUZWELEPILI KUTONA!
Ki Kabakalañi Batu Babañata Kacenu Habasa Bonisangi Babañwi Likute?—Bibele Ibulelañi fa Taba Yeo?
Kacenu, ki batu basikai feela bababonisanga babañwi likute. Bakuli babañwi bahanyaukelanga baalafi; batu babañwi babayo lekanga lico mwa macelo habakutekangi babeleki ba mwateñi; batu babañwi babakwelanga lifulai balwanisanga bababaleli ba mwateñi; banana ba likatazi hañata banyefulanga, kubemba, ni kulwanisa baluti; mi batu babañwi ba lipolitiki baezanga lika zemaswe hahulu mi babañwi bona balikanga kuiponahalisa inge kuli banani hahulu likute.
Bibele yakona kulutusa kuziba zekutalusa luli kubonisa babañwi likute. Mi hape italusa libaka batu babañata habasa bonisangi likute kacenu.
Ki kabakalañi batu babañata kacenu habasa bonisangi babañwi likute?
Kusabonisa babañwi likute, kuatile hahulu mwa lifasi kaufela kacenu.
Ka kuya ka patisiso yetuna yeneezizwe cwanoñu fa mwa America, nekufumanwi kuli batu babañata mwa America balumela kuli batu ba mwateñi hababonisi hahulu likute kufita mone baezezanga lilimo ze 22 zefelile.
Mwa patisiso yeñwi yeneezizwe mwa linaha ze 28, nekubuzizwe batu babafitelela 32,000 mi 65 pesenti ya batu bao nebabulezi kuli kacenu batu hababonisangi hahulu likute kufita mone kuinezi kwamulaho.
Bibele neipolofitile ka za mikwa yebanani yona batu kacenu.
“Mwa mazazi a mafelelezo kukaba ni linako zetaata. Batu bakaba baitati, ba mukwañuli, babaitumbaeta, ni babaikuhumusa; ba matapa, babasa utwi bashemi babona, babasina buitumelo, . . . babasina sishemo, ni ba mifilifili.”—2 Timotea 3:1-3, Bibele ya Good News.
Kuli muzibe litaba zeñata ka za mobusweli kutalelelezwa bupolofita bo, mubale taba yeli “Kana Bibele Neipolofitile ka za Munahanelo ni Mikwa Yebanani Yona Batu Kacenu?”
Nto yelukona kusepa yekona kulutusa kuziba zekutalusa luli kubonisa likute
Mwa lifasi ili mo batu babañata hababonisi likute, buñata bwa batu balemuhile kuli Bibele yakona kubatusa kuba ni mikwa yeminde. Likelezo zayona ‘zasepahala kamita, cwale ni kuya kuile.’ (Samu 111:8) Ki ye mitala isikai feela:
Zeibulela Bibele: “Lika kaufela zemubata kuli batu bamiezeze, mubaezeze zona ni mina.”—Mateu 7:12.
Taluso: Luswanela kubonisa babañwi sishemo ni likute sina feela ni luna molubatela kuli balueze cwalo.
Zeibulela Bibele: “Ka mukwa ocwalo, haubona cwale mutuhezi bupumi, mubulelelane niti yomuñwi ni yomuñwi.”—Maefese 4:25.
Taluso: Luswanela kusepahala mwa lika kaufela zelubulela ni zelueza.
Kuli muzibe litaba zeñata ka za taba ye, mubale:
Tawala ya Mulibeleli yenani toho ya taba yeli, “Ki Lika Mañi Zekona Kumitusa Kuziba Lika Zelukile Kamba Zesika Luka?”
Taba yeli, “Tolerance—How the Bible Can Help.”
Hape Mwendi Mwakona Kutabela Litaba Ze
TAWALA YA MULIBELELI
Ki Lika Mañi Zekona Kulutusa Kuba ni Bupilo Bobunde Kwapili?
Hañata haluezanga likatulo, lubuzanga batu babahulu ku luna ili babanani yeloseli kulufita. Ka nzila yeswana, kunani yakona kulutusa kuli lube ni bupilo bobunde kwapili ili yomuhulu hahulu ku luna ni yabutali kulufita.
MUZUHE!
Likuka Ze Sebeza Ku Mañi Ni Mañi Ka Nako Kaufela—Busepahali
Bo Raquel ne ba ka ba ni masheleñi a mañata ha ne ba ka amuhela masheleñi a ñambekelo a naa swanela ku ya kwa kampani, kono ne ba ikutwile kuli ne ba fumani nto ya butokwa hahulu ha ne ba hanile masheleñi ao.
LITUTO ZA BUTOKWA ZA MWA BIBELE
Lukona Kuikolwisa Cwañi Kuli Litaba Zeñozwi Mwa Bibele ki za Niti?
Haiba Mulimu ki yena musimululi wa Bibele, uziba iswanela kushutana ni libuka zeñwi kaufela.
KA ZA LUNA
Mukupe Kuli Mutu Yomuñwi Ato Mipotela
Munyakisise puzo yeñwi ka za taba ya mwa Bibele, kamba muitute zeñata ka za Lipaki za Jehova.
