Eni, Bibele neipolofitile kuli mwa linako zaluna buñata bwa batu nebaka cinca ni kuba ni mikwa yemaswe hahulu. Bibele neibonisize hande kuli batu babañata nebaka hana kulatelela likuka zepahami za muzamao ni mikwa yetusa batu kupilisana hande. a (2 Timotea 3:1-5) Kono Bibele hape neipolofitile kuli batu babañwi nebasike baba ni mikwa yeo. Kono mane ka tuso ya Mulimu, nebaka ikataza kuambuka mikwa yemaswe yeo ni kuituta kunahana ni kueza lika ka nzila yetabisa Mulimu.—Isaya 2:2, 3.

Ze mwa taba ye

•  Ki lika mañi zene ipolofitile Bibele ka za munahanelo ni mikwa yene bakaba ni yona batu mwa linako zaluna?

•  Mikwa ya batu babanani buitati neika ama cwañi batu babañwi?

•  Ki kabakalañi buñata bwa batu hane baka cinca ni kuba ni mikwa yemaswe?

•  Luswanela kuunga cwañi batu babanani mikwa yemaswe yeo?

•  Kana batu kaufela nebakaba ni mikwa yemaswe?

•  Kana batu kaufela nebakaba ni mikwa yemaswe hahulu kuli mane mupilelo wabona uba feela wa mifilifili?

 Bibele italusa mifuta ya mikwa ni likezo zemaswe zeneka ata mwa lifasi ili zeneka tahiswa ki buitati. Batu nebakaba “babasina buiswalo,” “baitati,” ni “babalata minyaka kufita kulata Mulimu.”—2 Timotea 3:2-4.

 Ka kulumelelana ni bupolofita bo, mwa linako zaluna batu babañata baisanga feela pilu kuza bona bañi, kwa lika zekona kubatusa, lika zekaba tahiseza tabo ni kwa lika zekaba tusa kuikola bupilo mane ni zeñwi cwalo. Sina mone bubulelezi bupolofita bo, batu babañata kacenu baisanga hahulu pilu ku za bona feela, mi taba yeo iatile hahulu mwa lifasi. Batu babañata baisanga hahulu pilu kubona bañi, mi ki batu “babasa lati bunde” kuli mane habakoni feela kulata mikwa yeminde. Ka kuba batu “babasina buitumelo,” baikutwanga kuli hakuna tuso ya kubonisa buitumelo kwa lika zebanani kamba kwa lika zebaba ezeza batu babañwi.—2 Timotea 3:2, 3

 Buitati ki bona bobutahisa mikwa yemiñwi yemaswe ili yeo Bibele neipolofitile kuli neikaba teñi mwa linako zaluna:

•   Mukwañuli. Batu babañata “babalata masheleñi,” balumela kuli kuba ni masheleñi ni maluwo amañata kubonisa kuli bakondisize mwa bupilo.—2 Timotea 3:2

•   Buikuhumuso. Buñata bwa batu ki “babaitumbaeta, babaikankabeka,” ni “babaitundumuna ka buikuhumuso.” (2 Timotea 3:2, 4) Batu bao baitumbaetanga ni kuikunga kuli bona banani hahulu buikoneli, tulemeno totunde kamba bufumu bobuñata kufita babañwi.

•   Busawana. Batu “babanyefula” ni “masawana” bafumaneha kai ni kai kacenu. (2 Timotea 3:2, 3) Lipulelo ze likona kuama kwa batu babalwahanga batu babañwi kamba Mulimu kamba kubulela litaba za buhata ka za bona.

•   Kutatafala pilu. Buñata bwa batu ki “babasa sepahali,” “babañañelela mihupulo yabona,” “babeteki” ni ba “muñañatoho.” (2 Timotea 3:2-4) Babonisanga mikwa ye ka kusa amuhela maikuto a babañwi, kusa tatulula butata, kamba mane kusa buluka litumelelano zene baezize.

•   Mifilifili. Batu babañata kacenu ki “bababuhali,” babahalifanga kapili, ili nto yetahisanga likezo ze situhu kamba mifilifili.—2 Timotea 3:3.

•   Bumaswe. Jesu naapolofitile za “kuekezeha kwa bumaswe” mwa mazazi elupila ku ona. (Mateu 24:12) Hape naapolofitile ka za kuekezeha kwa “mifilifili,” kamba “kukwenuhelana.”—Luka 21:9, litaluso ze kwatasi.

•   Kusaba ni lilato mwa lubasi. Bakeñisa kuekezeha kwa batu “babasa utwi bashemi babona” ni “babasina lilato la sipepo [lubasi]” batu babañata mwa mabasi bakonile kuyubekwa, kuezwa maswe mane ni kulwaniswa ki yomuñwi wa mwa lubasi.—2 Timotea 3:2, 3.

•   Kuipumisa kuba balapeli. Sekunani batu babañata “bababonahala kuba balumeli.” (2 Timotea 3:5) Mwa sibaka sa kueza zatokwa Mulimu, baiketela kulatelela babahulu ba bulapeli baba bataluseza feela litaba zebabata kuutwa.—2 Timotea 4:3, 4.

 Bakeñisa kuli batu babañata ki baitati, palo ya batu babakatazwa ki matuku a mwa munahano ni mwa maikuto iekezehile hahulu. (Muekelesia 7:7) Ka mutala, batu babañwi babalata hahulu masheleñi banyandisanga ni kuhatelela babañwi. Batu babasina lilato la sipepo bakona kueza maswe ba mwa lubasi lwabona, ili nto yekona kutahiseza ba lubasi bao kulembwala kamba mane kutahelwa ki mihupulo ya kuipulaya. Batu baba betekanga babañwi kamba babasa sepahalangi ku babañwi batahisezanga batu babaezizwe maswe bao butuku mwa munahano, mi muinelo wo ukona kuunga lilimo zeñata.

 Bibele italusa mabaka luli atahisa kuli batu babe ni mikwa yemaswe:

•   Lilato sakata la kulata Mulimu ni batu babañwi lisweli lafola. (Mateu 24:12) Taba yeo itahisa kuli buitati buekezehe hahulu mwa lifasi.

•   Satani Diabulosi ulunduzwi kwa lihalimu mi unepezwi fa lifasi. (Sinulo 12:9, 12) Kuzwa feela nako yeo, uzwezipili kukukueza batu kuba ni moya wa buitati.—1 Joani 5:19.

 Linzwi la Mulimu libulela kuli: “Musabe kwa batu babacwalo.” (2 Timotea 3:5, Bibele ya Easy-to-Read Version) Taba yeo haitalusi kuli luswanela kuikahanya kwa batu babañwi. Kono italusa kuli luswanela kuambuka kueza silikani ni batu babanani buitati babasa lateleli zatokwa Mulimu.—Jakobo 4:4.

 Batili. Bibele neipolofitile kuli batu babañwi nebaka tonga “ni kulila kabakala lika kaufela zenyenyisa zeezwa.” (Ezekiele 9:4) Nebaka hanyeza moya wa buitati ni kupila ka kulumelelana ni likuka za Mulimu. Lipulelo ni likezo zabona nelika bonisa kuli bashutana hahulu ni buñata bwa batu. (Malaki 3:16, 18) Ka mutala, nebaka eza mobakonela kaufela kupilisana ka kozo ni babañwi mi nebaka hana kuikenya mwa lindwa ni mifilifili.—Mika 4:3.

 Batili. Batu nebasike baba ni mikwa yemaswe hahulu kuli mane mupilelo wabona uba feela wa mifilifili. Mane, hona cwale-cwale fa, Mulimu ukazwisa batu babazwelapili kusautwa likuka zahae. (Samu 37:38) Ukatahisa “lifasi lelinca,” ili lifasi mo babaishuwa bakapila ka kozo kuya kuile. (2 Pitrosi 3:13; Samu 37:11, 29) Sepo ye haki tolo feela. Nihaiba ka nako ya cwale, Bibele isweli kutusa batu kucinca mupilelo wabona ilikuli bakale kupila ka kulumelelana ni linzila za Mulimu zelukile.—Maefese 4:23, 24.