Babusi ba lifasi ni likopano zetuna za mwa lifasi lipalezwi kutahisa kozo mwa lifasi. Kacenu, kunani lindwa zeñata hahulu kufita nako ifi kamba ifi kuzwa feela fone kubezi ni Ndwa ya Lifasi Yabubeli. Ibato ba batu ba 2 bilioni—ili palonyana kwa palo ya batu mwa lifasi kaufela—bapila mwa linaha mokunani lindwa.

 Ki kabakalañi batu habasa koni kutahisa kozo mwa lifasi? Bibele ibulelañi fa taba yeo?

1.  1. Batu banani mikwa yetahisa kuli kubabele taata kutahisa kozo. Bibele neipolofitile kuli mwa linako zaluna, “batu [nebakaba] baitati, babalata masheleñi, babaitumbaeta, babaikankabeka, . . . babasa sepahali, . . . babañañelela mihupulo yabona, . . . babasina buiswalo, bababuhali, . . . ba muñañatoho, babaitundumuna ka buikuhumuso.”—2 Timotea 3:2-4

2.  2. Batu kaili bona, ibe ka butu kamba ka sikwata habana maata a kutatulula miinelo yetaata yebakopana ni yona kusina kutusiwa ki Mubupi wabona, yena Jehova a Mulimu. Bibele ibulela kuli “mutu yazamaya haakoni nihaiba kuetelela mihato yahae.”—Jeremia 10:23.

3.  3. Lifasi lizamaiswa ki mubusi yamaata ni yamaswe, Satani Diabulosi, yena “yanzaa kelusa lifasi kaufela.” (Sinulo 12:9) Ibile feela kuli “lifasi kaufela li mwa maata a yamaswe,” lindwa ni mifilifili likazwelapili kuba teñi.—1 Joani 5:19.

 Bibele ilusepisa kuli Mulimu ki yena yakatahisa kozo fa lifasi isiñi batu.

•   “‘Kakuli niziba hande mihupulo yeni minahanela,’ kubulela Jehova, ‘ili mihupulo ya kozo, isiñi ya kozi, kuli nimife bupilo bobunde kwapili, ni sepo.’”—Jeremia 29:11.

 Mulimu ukataleleza cwañi sepiso ye? “Mulimu yafa kozo, atuha apyata Satani.” (Maroma 16:20) Mulimu ukaitusisa mulonga wa kwa lihalimu, ili obizwa mwa Bibele kuli “Mubuso wa Mulimu,” kuli utahise kozo mwa lifasi kaufela. (Luka 4:43) Jesu Kreste, yena Mulena wa Mubuso wo hakabusa, batu bakalutiwa mobakona kupilela ka kozo.—Isaya 9:6, 7.

•   Kuli muitute zeñata, mubale taba yeli, “Mubuso wa Mulimu Ukaezañi?”