Eni! Bibele izwa ku “Mulimu yaomba-omba babalobehile lipilu.” (2 Makorinte 7:6) Nihaike kuli Bibele haki buka ya litaba za buiketo bwa mwa munahano, itusize batu babañata bane banahana za kuipulaya kutula butata bo. Kelezo yende yeifa yakona kumitusa ni mina.

•  Ki kelezo ifi yende yei lufa Bibele?

•  Kana Bibele yalutaluseza za batu bane babata kushwa?

•  Ki litimana lifi za mwa Bibele zekona kumitusa kusanahana za kuipulaya?

•  Kucwañi haiba mulikani abulela kuli: “Nibata kushwa?”

•  Kucwañi haiba kwamulaho nenibatile kuipulaya?

• ● Mutaluseze babañwi momuikutwela.

   Zeibulela Bibele: “Mulikani wa niti ubonisa lilato ka nako kaufela, mi upepezwi kuli abe mwanahabo mutu mwa linako za ziyezi.”—Liproverbia 17:17.

   Taluso: Lutokwa kukupa tuso ku babañwi haiba kunani lika zeñwi zelubilaeza hahulu.

   Haiba mupatela babañwi momuikutwela, mukaimezwa hahulu ki maikuto ao. Kono haiba mutaluseza babañwi momuikutwela, mukona kuikutwa kwateñi hande mi mane mukaba ni mubonelo oswanela.

   Mulike muezezo wo: Muikambote ni mutu yomuñwi kacenu, ikana yaba wa lubasi kamba mulikanaa mina yemusepile. a Hape mwakona kutalusa momuikutwela ka kuñola maikuto ao.

• ● Mukupe tuso kwa baalafi.

   Zeibulela Bibele: “Batu babaiketile habatokwi mualafi, kono baba mutokwa ki babakula.”—Mateu 9:12.

   Taluso: Luswanela kuya kwa baalafi halukula.

   Kunahana za kuipulaya kukona kuba sisupo sa butuku bwa mwa munahano kamba bobuama maikuto. Ka kuswana ni butuku bwa kwa mubili, butuku bo habuswabisi. Matuku a mwa munahano kamba aama maikuto akona kualafiwa.

   Mulike muezezo wo: Mukupe tuso kwa baalafi kapili-pili kuli bamituse.

• ● Muhupule kuli Mulimu wamiisa pilu.

   Zeibulela Bibele: “Kana litaha zeketalizoho halilekiwi ka masheleñi amabeli a muwayawaya wa teko yenyinyani? Niteñi ku zona hakuna nihaiba iliñwi yelibalwa ki Mulimu. . . . Musike mwasaba; mu ba butokwa hahulu kufita litaha zeñata.”—Luka 12:6, 7.

   Taluso: Mu ba butokwa ku Mulimu.

   Mukana mwaikutwa kuli hakuna yamiisa pilu, kono Mulimu wabona manyando emukopana ni ona. Wamiisa pilu—nihaikaba kuli hamuboni tuso ya kuzwelapili kupila. Samu 51:17 ibulela kuli: “Wena Mulimu, hauna kuhana pilu yelobehile ni yebakile.” Mulimu ubata kuli muzwelepili kupila kakuli wamilata.

   Mulike muezezo wo: Munyakisise bupaki bwa mwa Bibele bobubonisa kuli Mulimu wamilata. Ka mutala, mubone kauhanyo 24 ya hatiso yeitusiswa kwa kuituta Bibele ya Mu Sutelele ku Jehova.

• ● Mulapele ku Mulimu.

   Zeibulela Bibele: “[Munepele] lipilaelo zamina kaufela ku [Mulimu], kakuli wamiisa pilu.”—1 Pitrosi 5:7.

   Taluso: Mulimu ubata kuli mumutaluseze momuikutwela luli ni lika zemibilaeza.

   Mulimu wakona kumitusa kuba ni kozo ya mwa munahano ni kumifa maata a kutiyela muinelo omuli ku ona. (Mafilipi 4:6, 7, 13) Ka nzila ye, utiisa batu babalapela ku yena kukupa tuso.—Samu 55:22.

   Mulike muezezo wo: Mulapele ku Mulimu kacenu. Muitusise libizo lahae, lona la Jehova, mi mumutaluseze momuikutwela. (Samu 83:18) Mumukupe kuli amituse kuzwelapili kuitiisa.

• ● Munahanisise sepiso ya mwa Bibele ya za kwapili.

   Zeibulela Bibele: “Sepo yelunani yona ye, iswana sina ankora ya bupilo bwaluna, yesepahala ni yetiile.”—Maheberu 6:19.

   Taluso: Fokuñwi, mukana mwaikutwa kuziyeleha hahulu inge sisepe sesizukuzwa ki liñungwa, kono sepo ya mwa Bibele yakona kumitiisa.

   Sepo yeo haki nto ya kuikumbuta feela kono itomile fa sepiso ya Mulimu ya kuli ukafelisa lika zeelutahiseza butuku.—Sinulo 21:4.

   Mulike muezezo wo: Muitute zeñata ka za sepo ya mwa Bibele ka kubala tuto 5 ya broshuwa ya Taba Yende Yezwa ku Mulimu!

• ● Mueze lika zemitahiseza tabo.

   Zeibulela Bibele: “Pilu yetabile ki mulyani omunde.”—Liproverbia 17:22.

   Taluso: Haiba lueza lika zelutahiseza tabo, lukana lwaba ni buiketo bwa mwa munahano kamba kuikutwa hande.

   Mulike muezezo wo: Mueze lika zemitahisezanga tabo. Ka mutala, muteeleze kwa lipina zende, mubale nto yeñwi yesusueza, kamba mueze nto yeñwi fa kuzwela bulutu. Hape mukaekeza kwa tabo yamina haiba mueza lika zetusa babañwi, mane nihaiba lika zenyinyani.—Likezo 20:35.

• ● Muipabalele kwa mubili.

   Zeibulela Bibele: “Lipapali za kutwaeza mubili zatusa.”—1 Timotea 4:8.

   Taluso: Lukatuseha haiba lueza lipapali zetiisa mubili, kuba ni nako yeñata ya kupumula, ni kuca lico zende.

   Mulike muezezo wo: Muzamaye ka kuakufa, nihaiba ka mizuzu ye 15 feela.

• ● Muhupule kuli maikuto ni lika zeñwi mwa bupilo zacincanga.

   Zeibulela Bibele: “Hamuzibi mobuka bela bupilo bwamina kamuso.”—Jakobo 4:14.

   Taluso: Butata bobuziyeza—nihaiba mane bomubona kuli hamukoni kubutatulula—bukona kuba bwa ka nakonyana feela.

   Butata bomukopana ni bona niha bukona kumizwafisa, bukafita fa kufela. Kacwalo, muzwelepili kutiyela butata bo. (2 Makorinte 4:8) Butata bobu miziyelize bukafela muta omuñwi, kono haiba muipulaya, hamuna kukona kucinca kezo yeo.

   Mulike muezezo wo: Mubale litaba za mwa Bibele za batu bane bazwafile hahulu kuli mane nebabata kushwa, mi mulemuhe mo bupilo bwabona nebucincelize ni kuba bobunde hahulu—hañata, mwa linzila zene basika libelela. Munyakisise mitala isikai.

 Eni. Bibele ilutaluseza za batu bane babata kushwa. Mulimu naasika bakalimela, kono naabatusize. Wakona kumitusa ni mina.

Elia

•  ● Neli mutu yacwañi? Elia neli mupolofita yanaanani bundume. Kono ni yena fokuñwi naazwafanga. Jakobo 5:17 ibulela kuli: “Elia neli mutu yanani maikuto aswana ni aluna.”

•  ● Ki kabakalañi hanaabata kushwa? Nako yeñwi, Elia naaikutwile kuli naasiyezi feela anosi, naasabile, ni kuikutwa kuli naasina tuso. Kacwalo, akupa kuli: “Jehova, uunge bupilo bwaka.”—1 Malena 19:4.

•  ● Ki lika mañi zenee mutusize? Elia naataluselize Mulimu mwanaaikutwela luli. Mulimu naamususuelize cwañi? Mulimu naabonisize Elia kuli wamuisa pilu mi amubonisa maata ahae amatuna hahulu. Hape naakolwisize Elia kuli naamuunga kuba wa butokwa hahulu mi afa Elia mutusi yomunde.

•  ▸ Mubale ka za Elia kwa: 1 Malena 19:2-18.

Jobo

•  ● Neli mutu yacwañi? Jobo naafumile, naanani lubasi lolutuna, mi naasebeleza Mulimu wa niti ka busepahali.

•  ● Ki kabakalañi hanaabata kushwa? Lika zemaswe zeñata neliezahezi ku Jobo ka sipundumukela. Naasinyehezwi ki maluwo ahae kaufela. Naashwezwi ki bana bahae kaufela mwa kozi. Naakulile butuku bobumaswe. Mi kwa mafelelezo, batu babañwi nebaitusisize lipulelo zemaswe hahulu ni kumutameleza kuli ki yena yanaatahisize kuli atahelwe ki miliko. Jobo naabulezi kuli: “Nitoile bupilo bwaka; hanisa lata kupila.”—Jobo 7:16.

•  ● Ki lika mañi zenee mutusize? Jobo naalapezi ku Mulimu ni kuikambota ni babañwi. (Jobo 10:1-3) Naasusuelizwe ki Elihu, mulikanaa hae yanaanani mukekecima, ili yo naamutusize kuba ni mubonelo oswanela ka za muinelo wanaali ku ona. Sa butokwa nikufita kikuli, Jobo naaamuhezi kelezo ni tuso yanaa mufile Mulimu.

•  ▸ Mubale ka za Jobo kwa: Jobo 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Mushe

•  ● Neli mutu yacwañi? Mushe neli mueteleli wa Isilaele wa kwaikale mi neli mupolofita yanaasepahala.

•  ● Ki kabakalañi hanaabata kushwa? Mushe naanani buikalabelo bobuñata, batu nebaswalelela kumunyaza, mi naaikutwa kukatala. Kacwalo, abulelela Mulimu, ali: “Nikupa kuli unibulaye honafa.”—Numere 11:11, 15.

•  ● Ki lika mañi zenee mutusize? Mushe naataluselize Mulimu mwanaaikutwela. Mulimu naatusize Mushe ka kufukuza kwa misebezi yahae, ilikuli asike akatalanga hahulu.

•  ▸ Mubale ka za Mushe kwa: Numere 11:4-6, 10-17.