Nenipepezwi mwa muleneñi wa Calgary mwa Alberta, kwa Canada. Hane nisali mbututu, bashemi baka bafelisa linyalo labona, mi na ni bo ma, lwayo kala kupila ni bo kuku. Bo kuku neba lulata, mi nenili mwana yatabile. Hanihupula linako zende zeo zene nibanga ni zona kwa bwanana, naikutwanga hande luli.

 Hane ninani lilimo ze 7, bupilo bwaka bwatatafala hahulu muta bo ma nebakutisani ni bo ndate ili ka nako yeo nelututezi kwa St. Louis, mwa Missouri, kwa America. Nalemuha kuli bo ndate nebanani situhu luli. Ka mutala, zazi lapili hanizwa kwa sikolo, nabataluseza kuli neniizo toliswa ki babañwi mi nenisika kutisa misuha. Bo ndate nebanyemile hahulu kuutwa taba yeo, mi baninata hahulu kufita mone baninatezi bana ba sikolo babañwi! Taba ye nei nilutile tuto ya kuli ni na nikale kulwananga ni banana babañwi inze ninani feela lilimo ze 7.

 Bakeñisa kuli bo ndate nebanani pilu yemaswe, bo ma ni bona bakala kuhalifanga, mi taba yeo yatahisa kuli bakananisanange hahulu. Hane ninani lilimo ze 11, nakala kuitusisa milyani yekola ni kunwa maswe bucwala. Nakala kuba wa mifilifili hahulu mi nenilwananga ni batu bane nifumananga mwa mikwakwa. Hanitofezanga sikolo, nese nili mutu wa mifilifili ni kufita.

 Hane ninani lilimo ze 18, naiñolisa kuba lisole wa naha ya America. Teñi koo, nayo ituta mwa kubulaela batu. Hamulaho wa lilimo ze 5, natuhela busole ka mulelo wa kuli niitute tuto ya za munahano ilikuli nifumane musebezi ku ba katengo kakabatisisanga litaba kakabizwa Federal Bureau of Investigation. Nakalisa lituto zaka fa yunivesiti mwa America, mi nayo zwelapili ni lituto zeo hane nikutezi kwa Canada.

 Hane nili kwa yunivesiti, neniikutwanga hahulu bumaswe ka za batu kaufela kabakala lika zemaswe zene baeza. Batu nebabonahala kuba ni buitati, lika mwa lifasi nelisa bonahali kuzamaya hande, mi matata a batu naasa bonahali kuli akona kutatululwa. Nafelelwa ki sepo ya kuli batu bakona kucinca lifasi kuli libe lelinde.

 Bakeñisa kuli nenifelezwi ki sepo, nakalisa kuisa hahulu pilu yaka kwa bucwala, milyani yekola, masheleñi, ni buhule. Nako kaufela nenili wa mikiti, mi nenitabelanga kueza somano ni basali babashutana-shutana. Bakeñisa kuli nenilutilwe mwa kulwanela ka nako yene nili lisole, hañata nenilwananga ni batu babañwi. Kunani lika zene niinga kuli lilukile ni lika zene niinga kuli halisika luka, mi nenikona kushelana ni mutu ufi kamba ufi yanaasa ezi hande babañwi. Kono kueza cwalo neku nitahiselize kuli nibe hahulu mutu wa mifilifili.

 Zazi leliñwi kwa ndu yaka, na ni mulikanaa ka hane luzubile hahulu, inze lulonga matokwani kuli luyo lekisa, mulikanaa ka anibuza ka za haiba nenilumela ku Mulimu. Namualaba kuli, “Haiba Mulimu ki yena yatahisa manyando mwa lifasi, hanilati kuziba ka za hae!” Habusa, ili lizazi lapili kwa musebezi waka omunca, yene nisebeza ni yena ili yanaali Paki wa Jehova, anibuza kuli, “Kana munahana kuli Mulimu ki yena yatahisa manyando mwa lifasi le?” Puzo yeo nei nikomokisize hahulu mi neitahisize kuli nibe ni takazo ya kuziba zeñata. Likweli ze 6 zenetatami, nelubile ni lipuisano zeñata mi ka kuitusisa Bibele, naaalabile lipuzo zeñwi zaka zetaata zene niipuzanga ka za bupilo.

 Musali yene nipila ni yena ka nako yeo, naasalati kuli nimutaluseze zene nisweli kuituta. Zazi leliñwi la Sunda, namutaluseza kuli nenimemile Lipaki kwa ndu yaluna kuli bato ituta Bibele ni luna. Habusa hanizwa kwa musebezi, natofumana kuli ulongile lika kaufela mi uile kunisiya. Nazwela fande ni kuyo lila hahulu. Hape nalapela ku Mulimu ni kumukupa kuli anituse. Lo neli lwapili kuitusisa libizo la Mulimu, lona la Jehova, mwa tapelo.—Samu 83:18.

 Hamulaho wa mazazi amabeli, nakala kuituta Bibele ni bo mutu ni musalaa hae bane bali Lipaki. Hase baile, nazwelapili kubala buka ya Wakona Kupila Kuya Kuile Mwa Paradaisi Fa Lifasi-Mubu, mi nafeza kuibala mwa busihu bulibuñwi. a Zene niitutile ka za Jehova ni Mwanaa hae, neli nifitile kwa pilu. Nenilemuhile kuli Jehova unani mukekecima, mi waikutwanga bumaswe halunyanda. (Isaya 63:9) Nenifitilwe hahulu kwa pilu ki lilato la Mulimu ni buitomboli bwanaaezize ka kufa Mwanaa hae sina sitabelo kabakala ka. (1 Joani 4:10) Nalemuha kuli Jehova naanibonisize pilu-telele “kakuli hatabeli kuli mutu ufi kamba ufi atimezwe kono utabela kuli batu kaufela babake.” (2 Pitrosi 3:9) Neniikutwile kuli Jehova naabata kuli nibe mulikanaa hae.—Joani 6:44.

 Mwa sunda yeswana yeo, nakala kufumaneha kwa mikopano. Neninani milili yemitelele, masikiyo, mi nenibonahala kusabisa, kono Lipaki neba niingile sina wahabo bona yene batondile ka nako yetelele. Nebaeza inge Bakreste ba niti. Neniikutwa inge kuli nenikutezi kwandu ku bo kuku, kono mwa sibaka sesinde hahulu.

 Honafo feela, lika zene niituta mwa Bibele zakala kucinca bupilo bwaka. Nakuta milili yaka, natuhela muzamao wa buhule, mi natuhela kuitusisa maswe milyani yekola ni kunwa hahulu bucwala. (1 Makorinte 6:9, 10; 11:14) Nenibata kutabisa Jehova. Kacwalo, hane nieza nto yemaswe ili yene niziba kuli uitoile, nenisa fangi libaka lakuicemela kabakala mukwa waka omaswe. Kono hañata neniikutwanga hahulu bumaswe kwa pilu. Neniipulelisanga kuli, ‘haniswaneli kupila cwana.’ Mi honafo feela, nenilikanga kucinca munahano waka ni likezo zaka. Kabakala leo, nakala kulemuha kuli bupilo bwaka nebucinca kabakala kueza lika zatabela Jehova. Mwa July 29, 1989, likweli ze 6 kuzwa fone nikalezi kuituta Bibele, nakolobezwa sina yomuñwi wa Lipaki za Jehova

 Bibele initusize kucinca butu bwaka. Kwamulaho, hañata nenihalifanga hahulu muta nishelena ni mutu yanani buhali. Kono cwale niezanga ka taata kuli “nipilisane ka kozo ni batu kaufela.” (Maroma 12:18) Haniitumbi kabakala licinceho zeniezize kono niitumela ku Jehova kabakala maata a Linzwi lahae ni moya okenile.—Magalata 5:22, 23; Maheberu 4:12.

 Mwa sibaka sa kuba mutu yalata hahulu milyani yekola, mifilifili, ni muzamao wa buhule, nieza ka monikonela kaufela kutabisa Jehova Mulimu ni kumusebeleza ka kutala. Mi hape nitusanga batu babañwi kuli bazibe Jehova. Hamulaho wa lilimo lisikai kuzwa foni kolobelezwa, naya kwa naha yeñwi kuli niyo kutaza mwa libaka mokusina hahulu bakutazi ba Mubuso. Mwa lilimo zeñata zefelile, nibile ni tabo yakuluta batu babañata ni kubona mo Bibele icincelize bupilo bwabona. Hape nitabile kuli bo ma babile Lipaki za Jehova kabakala licinceho zende zene nieza mwa bupilo bwaka ili zene bapoinela.

 Mwa 1999, mwa El Salvador, nafeza sikolo sesibizwa ka nako ya cwale kuli Sikolo sa Bakutazi ba Mubuso. Sikolo seo nesi nilutile kuziba mwakupetela hande musebezi wa kukutaza, kulisa ni kuluta mwa puteho. Hamulaho wa silimo seo, nanyalana ni bakuluna, bo Eugenia. Lusebeza hamoho mwa sebelezo ya ka nako kaufela mwa Guatemala.

 Ka nako ya cwale, mwa sibaka sa kubilaezwa ki lika za mwa bupilo, ninani tabo yetuna. Kusebelisa lituto za Bibele kunitusize kutuhela muzamao wa buhule ni mifilifili mi kunitusize kuba ni lilato la niti hamohocwalo ni kozo.