Batili. Lipaki za Jehova ki Bakreste, kono haki Maprotesitanti. Kabakalañi?

 Maprotesitanti baangiwa kuli ki “sikwata sa bulapeli sesilwanisa Keleke ya Katolika.” Ki niti kuli Lipaki za Jehova habalumeli lituto zelutiwa mwa Keleke ya Katolika, kono fo hakutalusi kuli lu Maprotesitanti ka mabaka alatelela:

1.   Lituto zeñata zelutiwa mwa bulapeli bwa Protesitanti halilumelelani ni zeiluta Bibele. Ka mutala, Bibele iluta kuli “kunani Mulimu alimuñwi,” isiñi mulimu wa Silaalu. (1 Timotea 2:5; Joani 14:28) Mi Bibele ibonisa hande fokusweu kuli Mulimu ukafa koto batu babamaswe ka kubayundisa, isiñi ka kubatukufaza mwa lihele.​—Samu 37:9; 2 Matesalonika 1:9.

2.   Halulwanisi Keleke ya Katolika kamba kulika kueza licinceho mwa keleke yeo kamba likeleke zeñwi. Kono luna lukutaza taba yende ya Mubuso wa Mulimu, mi lubata kutusa batu kuba ni tumelo mwa taba yende yeo. (Mateu 24:14; 28:19, 20) Mulelo waluna haki wa kucinca likwata zeñwi za bulapeli, kono lubata kuluta batu ba lipilu zende niti ka za Mulimu ni Linzwi lahae, yona Bibele.​—Makolose 1:​9, 10; 2 Timotea 2:​24, 25.