Batili, bulapeli kaufela habuswani. Bibele ibulela za bulapeli bobuñata bobusa tabisi Mulimu. Bulapeli bo, bukona kutaluswa mwa likalulo zepeli.

Kalulo Yapili: Kulapela milimu ya buhata

 Bibele haibulela za kulapela milimu ya buhata iitusisa lipulelo zecwale ka ‘kusatusa sesiñwi,’ “za mbango,” ni “zesina tuso.” (Jeremia 10:3-5; 16:19, 20) Jehova a Mulimu naalaezi sicaba sa Isilaele wa kwaikale kuli: “Usike walapela milimu isili, kwandaa ka.” (Exoda 20:3, 23; 23:24) Maisilaele hane balapezi milimu isili, ‘buhali bwa Jehova bwabatukela.’—Numere 25:3; Livitike 20:2; Baatuli 2:13, 14.

 Mulimu usaikutwa cwalo ka za kulapela “zebaanga batu kuli ki milimu.” (1 Makorinte 8:5, 6; Magalata 4:8) Ulaela batu bababata kumulapela kuli batuhele kuswalisana ni batu baba mwa bulapeli bwa buhata, uli: “Hamuzwe mwahalaa bona, mi muikauhanye ku bona.” (2 Makorinte 6:14-17) Haiba bulapeli kaufela bwaswana mi butusa batu kusutelela ku Mulimu, ki kabakalañi Mulimu hafile taelo yecwalo?

Kalulo Yabubeli: Kulapela Mulimu ka nzila yesa mutabisi

 Fokuñwi, Maisilaele nebalapelanga Mulimu ka kulikanyisa litumelo ni likezo za batu bane balapela milimu ya buhata, kono Jehova naahanile kumulapela ka kuzwakanya litumelo za bulapeli bwa niti ni za buhata. (Exoda 32:8; Deuteronoma 12:2-4) Jesu naanyazize baeteleli ba bulapeli ba mwa linako zahae kabakala mone balapelela Mulimu; nebaiponahalisa inge kuli neli balumeli, kono neli baipi kakuli “[nebakeshebisa] litaba zebuima za mwa Mulao, ili katulo yelukile ni sishemo ni busepahali.”—Mateu 23:23.

 Ki nto yeswana ni kacenu, bulapeli bobutomile fa niti ki bona feela bobutusa batu kusutelela ku Mulimu. Niti yeo ifumaneha mwa Bibele. (Joani 4:24; 17:17; 2 Timotea 3:16, 17) Kono mane bulapeli bobuluta lituto zelwanisana ni Bibele butahisa kuli batu babe kwahule ni Mulimu. Lituto zeñata zebaanga batu kuli lizwa mwa Bibele, zecwale ka tuto ya Silaalu, tuto ya kuli moyo wa mutu haushwangi, ni tuto ya kuli batu babamaswe bakatukufazwa mwa lihele kuya kuile, lisimuluha kwa batu bane balapelanga milimu ya buhata. Bulapeli bobuluta lituto zecwalo ‘habuna tuso’ kakuli buluta batu lizo za bulapeli kufita milao ya Mulimu.—Mareka 7:7, 8.

 Mulimu utoile balapeli babaipumisa kuba balumeli. (Tite 1:16) Kuli bulapeli butuse batu kusutelela ku Mulimu, buswanela kubatusa kueza licinceho zeama mupilelo wabona wa ka zazi ni zazi isiñi kubaluta feela lizo za bulapeli. Ka mutala, Bibele ibulela kuli: “Haiba mutu anahana kuli ki mulapeli, kono asaswali lilimi lahae, upuma pilu yahae, mi kulapela kwahae hakuna tuso. Bulapeli bobukenile ni bobusa nyazahali fapilaa Mulimu Ndataa luna ki bo: ki kubabalela lindiala ni limbelwa mwa manyando abona, ni kusaikenya mwa linzila zemasila za lifasi le.”—Jakobo 1:26, 27; litaluso ze kwatasi.