ຄຳຖາມຈາກຜູ້ອ່ານ
“ຜູ້ຍິງ” ທີ່ເວົ້າເຖິງໃນເອຊາຢາ 60:1 ໝາຍເຖິງໃຜ ແລະລາວ “ລຸກຂຶ້ນ” ແລ້ວ “ສ່ອງແສງ” ແນວໃດ?
ເອຊາຢາ 60:1 ອ່ານວ່າ: “ຜູ້ຍິງເອີ້ຍ ລຸກຂຶ້ນແມ້ ແລ້ວສ່ອງແສງອອກໄປ ຍ້ອນວ່າແສງສະຫວ່າງໄດ້ສ່ອງມາຮອດເຈົ້າແລ້ວ ແລະແສງລັດສະໝີຂອງພະເຢໂຫວາກໍສ່ອງມາໃສ່ເຈົ້າ.” ຈາກແວດບົດເຮັດໃຫ້ເຫັນວ່າ “ຜູ້ຍິງ” ໝາຍເຖິງຊີໂອນຫຼືເມືອງເຢຣູຊາເລັມທີ່ເປັນເມືອງຫຼວງຂອງຢູດາໃນສະໄໝນັ້ນ. a (ອຊຢ. 60:14; 62:1, 2) ເມືອງເຢຣູຊາເລັມໝາຍເຖິງຊາດອິດສະຣາເອນໝົດຊາດ. ຄຳເວົ້າຂອງເອຊາຢາໃນຂໍ້ນີ້ເຮັດໃຫ້ມີຄຳຖາມ 2 ຂໍ້ເກີດຂຶ້ນ ນັ້ນແມ່ນ (1) ເມືອງເຢຣູຊາເລັມ “ລຸກຂຶ້ນ” ແລ້ວສ່ອງແສງຕອນໃດແລະສ່ອງແສງແນວໃດ? (2) ຄຳເວົ້າຂອງເອຊາຢາໃນຂໍ້ນີ້ເກີດຂຶ້ນແທ້ໃນຂອບເຂດທີ່ໃຫຍ່ກວ່າບໍ?
ເມືອງເຢຣູຊາເລັມ “ລຸກຂຶ້ນ” ແລ້ວສ່ອງແສງຕອນໃດແລະສ່ອງແສງແນວໃດ? ເມືອງເຢຣູຊາເລັມແລະວິຫານເຫຼືອແຕ່ຊາກຫັກພັງຕອນທີ່ຄົນຢິວເປັນຊະເລີຍຢູ່ບາບີໂລນ 70 ປີ. ແຕ່ຫຼັງຈາກທີ່ຄົນເມເດຍແລະເປີເຊຍເອົາຊະນະບາບີໂລນ ຄົນຢິວຢູ່ທົ່ວຈັກກະວັດບາບີໂລນກໍຖືກປົດປ່ອຍຈາກການເປັນຊະເລີຍແລະກັບໄປບ້ານເກີດເມືອງນອນເພື່ອຈະຟື້ນຟູການນະມັດສະການແທ້. (ອຊຣ. 1:1-4) ຕັ້ງແຕ່ປີ 537 ກ່ອນຄລິດຕະສັກກະຫຼາດ ຄົນຢິວທີ່ສັດຊື່ທັງ 12 ຕະກູນຂອງອິດສະຣາເອນໄດ້ເດີນທາງກັບໄປເມືອງເຢຣູຊາເລັມ. (ອຊຢ. 60:4) ເຂົາເຈົ້າເລີ່ມເຜົາເຄື່ອງບູຊາໃຫ້ພະເຢໂຫວາ ຈັດການສະຫຼອງເທດສະການຕ່າງໆ ແລະສ້າງວິຫານຄືນໃໝ່. (ອຊຣ. 3:1-4, 7-11; 6:16-22) ເຫັນໄດ້ວ່າແສງລັດສະໝີຂອງພະເຢໂຫວາເລີ່ມສ່ອງລົງມາໃສ່ເມືອງເຢຣູຊາເລັມອີກເທື່ອໜຶ່ງ ເຊິ່ງເມືອງນີ້ກໍຄືປະຊາຊົນຂອງເພິ່ນ. ເຂົາເຈົ້າຈຶ່ງເປັນຄືກັບແສງສະຫວ່າງສຳລັບຊາດຕ່າງໆທີ່ບໍ່ຮູ້ຈັກພະເຢໂຫວາ.
ແຕ່ຄຳພະຍາກອນຂອງເອຊາຢາເລື່ອງການຟື້ນຟູເກີດຂຶ້ນແທ້ແຕ່ບາງສ່ວນໃນສະໄໝນັ້ນຍ້ອນຕໍ່ມາຄົນອິດສະຣາເອນສ່ວນຫຼາຍບໍ່ເຊື່ອຟັງພະເຢໂຫວາ. (ນຮຢ. 13:27; ມລກ. 1:6-8; 2:13, 14; ມທ. 15:7-9) ຫຼັງຈາກນັ້ນ ເຂົາເຈົ້າໄດ້ປະຕິເສດພະເຢຊູທີ່ເປັນເມຊີອາ. (ມທ. 27:1, 2) ໃນປີ 70 ເມືອງເຢຣູຊາເລັມແລະວິຫານກໍຖືກທຳລາຍເປັນເທື່ອທີ 2.
ພະເຢໂຫວາໄດ້ບອກລ່ວງໜ້າໄວ້ແລ້ວວ່າເຫດການທີ່ໜ້າເສົ້າແບບນີ້ຈະເກີດຂຶ້ນ. (ດນອ. 9:24-27) ເຫັນໄດ້ແຈ້ງວ່າພະເຢໂຫວາບໍ່ໄດ້ຕັ້ງໃຈໃຫ້ຄຳພະຍາກອນເລື່ອງການຟື້ນຟູໃນເອຊາຢາບົດ 60 ເກີດຂຶ້ນແທ້ທັງໝົດກັບເມືອງເຢຣູຊາເລັມໃນອະດີດ.
ຄຳເວົ້າຂອງເອຊາຢາໃນຂໍ້ນີ້ເກີດຂຶ້ນແທ້ໃນຂອບເຂດທີ່ໃຫຍ່ກວ່າບໍ? ແມ່ນແລ້ວ ແຕ່ເກີດຂຶ້ນແທ້ກັບຜູ້ຍິງອີກຄົນໜຶ່ງ ນັ້ນແມ່ນ “ເຢຣູຊາເລັມທີ່ຢູ່ທາງເທິງ.” ໂປໂລຂຽນວ່າ ລາວ “ເປັນແມ່ຂອງພວກເຮົາ.” (ຄລຕ. 4:26) ເຢຣູຊາເລັມທີ່ຢູ່ທາງເທິງໝາຍເຖິງອົງການຂອງພະເຢໂຫວາທີ່ຢູ່ໃນສະຫວັນເຊິ່ງມີທູດສະຫວັນທີ່ສັດຊື່ຕໍ່ເພິ່ນ. ລູກຂອງລາວມີພະເຢຊູແລະຄລິດສະຕຽນຜູ້ຖືກເລືອກ 144.000 ຄົນ ເຊິ່ງຄົນເຫຼົ່ານີ້ມີຄວາມຫວັງທີ່ຈະໄປສະຫວັນຄືກັບໂປໂລ. ຄລິດສະຕຽນຜູ້ຖືກເລືອກເປັນ “ຊາດທີ່ບໍລິສຸດ” ເຊິ່ງກໍຄື “ອິດສະຣາເອນຂອງພະເຈົ້າ.”—1ປຕ. 2:9; ຄລຕ. 6:16
ເຢຣູຊາເລັມທີ່ຢູ່ທາງເທິງ “ລຸກຂຶ້ນ” ແລະ “ສ່ອງແສງ” ແນວໃດ? ລາວເຮັດແບບນັ້ນຜ່ານທາງຜູ້ຖືກເລືອກທີ່ຢູ່ໃນໂລກ. ໃຫ້ເຮົາສົມທຽບສິ່ງທີ່ເກີດຂຶ້ນກັບເຂົາເຈົ້າກັບຄຳພະຍາກອນໃນເອຊາຢາບົດ 60.
ຄລິດສະຕຽນຜູ້ຖືກເລືອກຕ້ອງ “ລຸກຂຶ້ນ” ຍ້ອນເຂົາເຈົ້າຢູ່ໃນຄວາມມືດທາງຄວາມເຊື່ອຕັ້ງແຕ່ສະຕະວັດທີ 2 ຫຼັງຈາກພວກອັກຄະສາວົກຕາຍໝົດແລ້ວແລະການທໍລະຍົດພະເຈົ້າໄດ້ແພ່ລາມອອກໄປ. (ມທ. 13:37-43) ຍ້ອນແນວນີ້ເຂົາເຈົ້າຈຶ່ງເປັນຊະເລີຍຂອງບາບີໂລນໃຫຍ່ເຊິ່ງກໍຄືສາສະໜາປອມທັງໝົດ. ໃນ “ສະໄໝສຸດທ້າຍຂອງໂລກນີ້” ເຊິ່ງເລີ່ມຕົ້ນໃນປີ 1914 ພວກຜູ້ຖືກເລືອກກໍຍັງເປັນຊະເລີຍຢູ່. (ມທ. 13:39, 40) ແຕ່ເມື່ອຮອດປີ 1919 ເຂົາເຈົ້າກໍເປັນອິດສະຫຼະແລະເລີ່ມສ່ອງແສງທາງຄວາມເຊື່ອທັນທີໂດຍທຸ່ມເທໃນການປະກາດຂ່າວດີເລື່ອງການປົກຄອງຂອງພະເຈົ້າ. b ໃນຫຼາຍປີຜ່ານມາ ຄົນຈາກທຸກຊາດໄດ້ຮັບຄວາມສະຫວ່າງເຊິ່ງລວມເຖິງອິດສະຣາເອນຂອງພະເຈົ້າທີ່ຍັງເຫຼືອຢູ່ເຊິ່ງກໍຄື “ພວກກະສັດ” ທີ່ເວົ້າເຖິງໃນເອຊາຢາ 60:3.—ພນມ. 5:9, 10
ໃນອະນາຄົດ ຄລິດສະຕຽນຜູ້ຖືກເລືອກຈະແພ່ກະຈາຍແສງສະຫວ່າງຈາກພະເຢໂຫວາໃນຂອບເຂດທີ່ໃຫຍ່ກວ່ານີ້. ໃນແງ່ໃດ? ຫຼັງຈາກເຂົາເຈົ້າຕາຍ ເຂົາເຈົ້າຈະໄດ້ເປັນສ່ວນໜຶ່ງຂອງ “ເຢຣູຊາເລັມໃໝ່” ຫຼືເປັນເຈົ້າສາວຂອງພະຄລິດ ແລະ 144.000 ຄົນນີ້ຈະເປັນທັງກະສັດແລະປະໂລຫິດ.—ພນມ. 14:1; 21:1, 2, 24; 22:3-5
ເຢຣູຊາເລັມໃໝ່ຈະມີສ່ວນສຳຄັນໃນການເຮັດໃຫ້ເອຊາຢາ 60:1 ເກີດຂຶ້ນແທ້. (ສົມທຽບກັບເອຊາຢາ 60:1, 3, 5, 11, 19, 20 ແລະພະນິມິດ 21:2, 9-11, 22-26) ຄືກັບທີ່ເມືອງເຢຣູຊາເລັມໃນສະໄໝແຕ່ກີ້ເປັນສູນກາງຂອງລັດຖະບານຂອງຊາດອິດສະຣາເອນ ເຢຣູຊາເລັມໃໝ່ແລະພະເຢຊູກໍຈະເປັນລັດຖະບານຂອງໂລກໃໝ່. ເຢຣູຊາເລັມໃໝ່ “ລົງມາຈາກສະຫວັນ” ແນວໃດ? ໂດຍໃຫ້ຄວາມສົນໃຈຄົນທີ່ຢູ່ໃນໂລກ ເມືອງນີ້ “ສ່ອງແສງສະຫວ່າງໃສ່ທາງຍ່າງ” ເພື່ອຄົນທີ່ຢ້ານຢຳພະເຈົ້າໃນຊາດຕ່າງໆຈະຍ່າງໄປໄດ້. ໃນອະນາຄົດ ຄົນເຫຼົ່ານີ້ທີ່ຢ້ານຢຳພະເຈົ້າຈະບໍ່ມີບາບແລະບໍ່ຕ້ອງຕາຍ. (ພນມ. 21:3, 4, 24) ຜົນກໍຄື “ທຸກສິ່ງຈະໄດ້ຮັບການຟື້ນຟູ” ຄືກັບທີ່ເອຊາຢາແລະຜູ້ພະຍາກອນຄົນອື່ນໄດ້ບອກໄວ້. (ກຈກ. 3:21) ການຟື້ນຟູຄັ້ງຍິ່ງໃຫຍ່ນີ້ເລີ່ມຕົ້ນຕອນທີ່ພະເຢຊູເປັນກະສັດແລະຈະຈົບຕອນທີ່ການປົກຄອງ 1.000 ປີຂອງເພິ່ນສິ້ນສຸດລົງ.
a ໃນເອຊາຢາ 60:1 ສະບັບແປໂລກໃໝ່ໃຊ້ຄຳວ່າ “ຜູ້ຍິງ” ແທນທີ່ຈະໃຊ້ຄຳວ່າ “ຊີໂອນ” ຫຼື “ເມືອງເຢຣູຊາເລັມ” ຍ້ອນຄຳກິລິຍາພາສາເຮັບເຣີທີ່ແປວ່າ “ລຸກຂຶ້ນ” ແລະ “ສ່ອງແສງ” ເປັນຄຳກິລິຍາທີ່ເປັນເພດຍິງ.
b ນອກຈາກນັ້ນ ເອເຊກຽນ 37:1-14 ແລະພະນິມິດ 11:7-12 ກໍເວົ້າເຖິງເລື່ອງການຟື້ນຟູການນະມັດສະການທີ່ເກີດຂຶ້ນແທ້ໃນປີ 1919 ຄືກັນ. ເອເຊກຽນບອກລ່ວງໜ້າວ່າຈະມີການຟື້ນຟູຄລິດສະຕຽນຜູ້ຖືກເລືອກທັງໝົດຫຼັງຈາກທີ່ເຂົາເຈົ້າເປັນຊະເລີຍມາດົນແລ້ວ. ຄຳພະຍາກອນໃນພະນິມິດກໍເວົ້າເຖິງການກັບມາມີຊີວິດຂອງຜູ້ຖືກເລືອກກຸ່ມນ້ອຍໆທີ່ນຳໜ້າໃນອົງການຂອງພະເຈົ້າຫຼັງຈາກທີ່ເຂົາເຈົ້າຕິດຄຸກແບບບໍ່ຍຸຕິທຳຈົນເຮັດໃຫ້ເຂົາເຈົ້າບໍ່ສາມາດເຮັດວຽກຮັບໃຊ້ໄດ້ໄລຍະໜຶ່ງ. ໃນປີ 1919 ເຂົາເຈົ້າຖືກແຕ່ງຕັ້ງເປັນ “ທາດທີ່ສັດຊື່ແລະສຸຂຸມ.”—ມທ. 24:45; ເບິ່ງປຶ້ມການນະມັດສະການທີ່ບໍລິສຸດຂອງພະເຢໂຫວາໄດ້ຮັບການຟື້ນຟູແລ້ວ! ໜ້າ 118. (ພາສາໄທ)