ຄຳຖາມທີ 1
ຂ້ອຍຮູ້ຈັກຕົວເອງດີບໍ?
ເຈົ້າ ຈະເຮັດແນວໃດ?
ໃຫ້ນຶກພາບເຫດການນີ້: ຄາເຣັນອາຍຸ 15 ປີ ຢູ່ງານປາຕີ້ບໍ່ຮອດ 10 ນາທີ ທັນໃດນັ້ນກໍໄດ້ຍິນສຽງທີ່ຄຸ້ນໆຫູມາຈາກທາງຫຼັງວ່າ:
“ເປັນຫຍັງຄືຢືນຢູ່ລ້າໆ?”
ເມື່ອຄາເຣັນປິ່ນໜ້າມາກໍເຫັນເຈດຊິກາຖືເບຍສອງແກ້ວທີ່ຫາກໍເປີດຝາແລ້ວຍື່ນໃຫ້ລາວແກ້ວໜຶ່ງແລະເວົ້າວ່າ: “ຢ່າບອກໄດ໋ວ່າເຈົ້າຍັງນ້ອຍຢູ່ ກິນເບຍບໍ່ໄດ້ ຄັນຊັ້ນກະບໍ່ມ່ວນແຫຼະ.”
ຄາເຣັນບໍ່ຢາກເອົາ ແຕ່ເຈດຊິກາກໍເປັນໝູ່ລາວ. ລາວຈຶ່ງບໍ່ຢາກໃຫ້ໝູ່ຄິດວ່າຕົວເອງເປັນຄົນໜ້າເບື່ອ. ນອກຈາກນັ້ນ ເຈດຊິກາຍັງເປັນຄົນທີ່ນິດໄສດີ ແລະຖ້າເຈດຊິກາດື່ມໄດ້ ຄາເຣັນກໍໜ້າຈະດື່ມໄດ້. ຄາເຣັນບອກຕົວເອງວ່າ: ‘ມັນກໍເປັນເບຍຊື່ໆ ບໍ່ແມ່ນຢາເສບຕິດ.’
ຖ້າເຈົ້າຢູ່ໃນສະຖານະການແບບຄາເຣັນ ເຈົ້າຈະເຮັດແນວໃດ?
ຢຸດແລະຄິດ!
ໃນສະຖານະການແບບນີ້ ເພື່ອຈະຕັດສິນໃຈຢ່າງສຸຂຸມ ເຈົ້າຕ້ອງຮູ້ຈັກຕົວເອງດີ. ການຮູ້ຈັກຕົວເອງໝາຍເຖິງການຮູ້ຄ່ານິຍົມແລະສິ່ງທີ່ຕົວເອງຍຶດໝັ້ນ. ເມື່ອຮູ້ແບບນີ້ ເຈົ້າກໍຈະຄວບຄຸມຊີວິດຂອງຕົວເອງໄດ້ແທນທີ່ຈະໃຫ້ຄົນອື່ນມາຄວບຄຸມ.—1 ໂກລິນໂທ 9:26, 27
ເຈົ້າຈະເຮັດໄດ້ແນວໃດ? ການຕອບຄຳຖາມຕໍ່ໄປນີ້ເປັນຈຸດເລີ່ມຕົ້ນທີ່ດີ.
1 ຂ້ອຍມີຈຸດດີຫຍັງແດ່?
ການຮູ້ວ່າເຈົ້າມີຄວາມສາມາດແລະມີຈຸດດີອັນໃດແດ່ຈະຊ່ວຍເຈົ້າໃຫ້ໝັ້ນໃຈໃນຕົວເອງ.
ຕົວຢ່າງໃນຄຳພີໄບເບິນ: ອັກຄະສາວົກໂປໂລຂຽນວ່າ: “ຂ້ອຍອາດຈະເວົ້າບໍ່ເກັ່ງ ແຕ່ຂ້ອຍກໍມີຄວາມຮູ້.” (2 ໂກລິນໂທ 11:6, ລ.ມ.) ເນື່ອງຈາກໂປໂລເຂົ້າໃຈພະຄຳພີດີ ລາວຈຶ່ງບໍ່ຫວັ່ນໄຫວເມື່ອຖືກຄົນອື່ນທ້າທາຍ. ໂປໂລບໍ່ໄດ້ສູນເສຍຄວາມເຊື່ອໝັ້ນຍ້ອນຄວາມຄິດໃນແງ່ລົບຂອງຄົນອື່ນ.—2 ໂກລິນໂທ 10:10; 11:5
ວິເຄາະເບິ່ງຕົວເອງ: ໃຫ້ຂຽນຄວາມສາມາດຫຼືທັກສະທີ່ເຈົ້າມີ.
ໃຫ້ຂຽນຄຸນລັກສະນະທີ່ດີທີ່ເຈົ້າມີ. (ຕົວຢ່າງເຊັ່ນ: ເຈົ້າເປັນຄົນຫ່ວງໃຍຄົນອື່ນບໍ? ໃຈກວ້າງບໍ? ໄວ້ໃຈໄດ້ບໍ? ກົງຕໍ່ເວລາບໍ?)
2 ຂ້ອຍມີຈຸດອ່ອນຫຍັງແດ່?
ຖ້າຕ່ອງໂສ້ຂໍ້ດຽວບໍ່ແຂງແຮງກໍຈະເຮັດໃຫ້ສາຍໂສ້ໝົດເສັ້ນໃຊ້ບໍ່ໄດ້ ຖ້າເຈົ້າຍອມແພ້ຕໍ່ຈຸດອ່ອນພຽງຢ່າງດຽວ ເຈົ້າກໍຈະໄດ້ຮັບຜົນເສຍຫາຍ.
ຕົວຢ່າງໃນຄຳພີໄບເບິນ: ໂປໂລຮູ້ຈຸດອ່ອນຂອງຕົວເອງ. ລາວຂຽນວ່າ: “ຂ້ອຍມັກກົດໝາຍຂອງພະ ເຈົ້າ ແຕ່ຂ້ອຍເຫັນກົດອີກຢ່າງໜຶ່ງໃນຮ່າງກາຍທີ່ຕໍ່ສູ້ກັບກົດໃນໃຈຂອງຂ້ອຍແລະເຮັດໃຫ້ຂ້ອຍຕົກຢູ່ໃຕ້ບັງຄັບຂອງບາບ.” —ໂລມ 7:22, 23, ລ.ມ.
ວິເຄາະເບິ່ງຕົວເອງ: ມີຈຸດອ່ອນຫຍັງແດ່ທີ່ເຈົ້າຕ້ອງຄວບຄຸມ?
3 ເປົ້າໝາຍຂອງຂ້ອຍແມ່ນຫຍັງ?
ເຈົ້າຈະຂີ່ລົດວົນໄປວຽນມາຫຼາຍໆຮອບຈົນນໍ້າມັນໝົດບໍ? ບໍ່ສະຫຼາດເລີຍທີ່ຈະເຮັດແບບນັ້ນ ເປືອງນໍ້າມັນລ້າໆ!
ເຮົາໄດ້ບົດຮຽນຫຍັງ? ການມີເປົ້າໝາຍຈະເຮັດໃຫ້ຊີວິດຂອງເຈົ້າມີທິດທາງແລະບໍ່ວົນວຽນຢູ່ບ່ອນເກົ່າ. ເມື່ອເຈົ້າຮູ້ວ່າຈະໄປໃສ ເຈົ້າກໍວາງແຜນເພື່ອຈະໄປເຖິງທີ່ນັ້ນ.
ຕົວຢ່າງໃນຄຳພີໄບເບິນ: ໂປໂລຂຽນວ່າ: “ເຮົາແລ່ນເສັງເອົາຊະນະເປັນແນ່.” (1 ໂກລິນໂທ 9:26) ແທນທີ່ໂປໂລຈະໃຊ້ຊີວິດແບບບໍ່ມີຈຸດໝາຍ ແຕ່ລາວຕັ້ງເປົ້າໝາຍໄວ້ແລະເຮັດຕາມນັ້ນ.—ຟີລິບ 3:12-14
ວິເຄາະເບິ່ງຕົວເອງ: ໃຫ້ຂຽນເປົ້າໝາຍ 3 ຢ່າງທີ່ເຈົ້າຢາກເຮັດໃຫ້ສຳເລັດໃນປີໜ້າ
4 ຂ້ອຍມີຄວາມເຊື່ອໝັ້ນແນວໃດ?
ຖ້າເຈົ້າບໍ່ມີຄວາມເຊື່ອໝັ້ນ ເຈົ້າຈະເປັນຄົນທີ່ບໍ່ແນ່ນອນຄືກັບໂຕກະປອມທີ່ປ່ຽນສີເພື່ອໃຫ້ເຂົ້າກັບໝູ່ໄດ້ເຊິ່ງສະແດງວ່າເຈົ້າບໍ່ຮູ້ຈັກຕົວເອງດີ.
ຖ້າເຈົ້າມີຄວາມເຊື່ອໝັ້ນໃນສິ່ງທີ່ເຈົ້າເຮັດ ເຈົ້າກໍຈະມີຈຸດຢືນຂອງຕົວເອງບໍ່ວ່າຄົນອື່ນຈະເຮັດອັນໃດກໍຕາມ.
ຕົວຢ່າງໃນຄຳພີໄບເບິນ: ຕອນເປັນໄວໜຸ່ມ ຜູ້ພະຍາກອນດານຽນ “ຕັ້ງໃຈ” ທີ່ຈະເຮັດຕາມກົດໝາຍຂອງພະເຈົ້າ ເຖິງວ່າລາວຈະຖືກແຍກອອກຈາກຄອບຄົວ. (ດານຽນ 1:8) ຍ້ອນຄວາມຕັ້ງໃຈ ດານຽນຈຶ່ງມີຈຸດຢືນຂອງຕົວເອງ ແລະໃຊ້ຊີວິດສອດຄ່ອງກັບຄວາມເຊື່ອຂອງລາວ.
ວິເຄາະເບິ່ງຕົວເອງ: ເຈົ້າມີຄວາມເຊື່ອໝັ້ນແນວໃດ? ຕົວຢ່າງເຊັ່ນ: ເຈົ້າເຊື່ອວ່າມີພະເຈົ້າບໍ? ຖ້າເຊື່ອ ຍ້ອນຫຍັງ? ມີຫຼັກຖານອັນໃດທີ່ເຮັດໃຫ້ເຈົ້າເຊື່ອວ່າພະເຈົ້າມີແທ້?
ເຈົ້າເຊື່ອບໍວ່າມາດຕະຖານດ້ານສິນລະທຳຂອງພະເຈົ້າເປັນປະໂຫຍດຕໍ່ເຈົ້າ? ຖ້າເຊື່ອ ຍ້ອນຫຍັງ?
ສະຫຼຸບແລ້ວ ເຈົ້າຢາກເປັນຄືກັບຫຍັງ ໃບໄມ້ທີ່ປິວໄປມາຕາມລົມຫຼືຕົ້ນໄມ້ທີ່ທົນຕໍ່ພາຍຸທີ່ຮຸນແຮງ? ໃຫ້ພະຍາຍາມຮູ້ຈັກຕົວເອງໃຫ້ຫຼາຍຂຶ້ນ ແລ້ວເຈົ້າຈະເປັນຄືຕົ້ນໄມ້ນັ້ນເຊິ່ງຈະຊ່ວຍເຈົ້າໃຫ້ຕອບຄຳຖາມທີ່ວ່າ ຂ້ອຍຮູ້ຈັກໂຕເອງດີບໍ?