ຄຳຖາມທີ 9
ຂ້ອຍຄວນເຊື່ອເລື່ອງວິວັດທະນາການບໍ?
ເຈົ້າ ຄິດແນວໃດ?
ໃຫ້ນຶກພາບເຫດການນີ້: ອາເລັກຮູ້ສຶກສັບສົນ. ລາວເຊື່ອມາຕະຫຼອດວ່າພະເຈົ້າເປັນຜູ້ສ້າງທຸກສິ່ງ. ແຕ່ມື້ນີ້ອາຈານສອນຊີວະພັດເວົ້າຢ່າງໜັກແໜ້ນວ່າວິວັດທະນາການເປັນຄວາມຈິງ ແລະມີຫຼັກຖານການຄົ້ນຄວ້າທາງວິທະຍາສາດທີ່ສະໜັບສະໜູນເລື່ອງນີ້. ອາເລັກບໍ່ຢາກຖືກເບິ່ງວ່າເປັນຄົນໂງ່ ລາວຈຶ່ງເວົ້າກັບຕົວເອງວ່າ: “ຖ້ານັກວິທະຍາສາດພິສູດແລ້ວວ່າວິວັດທະນາການເປັນຄວາມຈິງ ແລ້ວຂ້ອຍເປັນໃຜຈຶ່ງກ້າສົງໄສເລື່ອງນີ້?”
ຖ້າເຈົ້າເປັນອາເລັກ ເຈົ້າຈະຍອມຮັບເລື່ອງວິວັດທະນາການພຽງແຕ່ຍ້ອນປຶ້ມຕຳລາຮຽນບອກວ່າເປັນຄວາມຈິງບໍ?
ຢຸດແລະຄິດ!
ທັງຄົນທີ່ເຊື່ອເລື່ອງວິວັດທະນາການແລະຄົນທີ່ເຊື່ອວ່າມີພະເຈົ້າຈະບອກໄດ້ເລີຍວ່າເຂົາເຈົ້າເຊື່ອຫຍັງ ແຕ່ອະທິບາຍບໍ່ໄດ້ວ່າເປັນຫຍັງຈຶ່ງເຊື່ອ.
-
ບາງຄົນເຊື່ອວ່າພະເຈົ້າສ້າງທຸກສິ່ງກໍຍ້ອນວ່າຢູ່ໂບດຂອງເຂົາເຈົ້າສອນແບບນັ້ນ.
-
ບາງຄົນເຊື່ອເລື່ອງວິວັດທະນາການກໍຍ້ອນວ່າອາຈານຢູ່ໂຮງຮຽນສອນແບບນັ້ນ.
6 ຄຳຖາມທີ່ໜ້າຄິດ
ຄຳພີໄບເບິນບອກວ່າ: ‘ເຮືອນທຸກຫຼັງຕ້ອງມີຜູ້ສ້າງ ແຕ່ຜູ້ທີ່ສ້າງທຸກສິ່ງຄືພະເຈົ້າ.’ (ເຫບເລີ 3:4) ມີເຫດຜົນບໍທີ່ຈະເຊື່ອແບບນັ້ນ?
ການເວົ້າວ່າບໍ່ມີຜູ້ສ້າງຊີວິດເປັນເລື່ອງແປກຄືກັບການເວົ້າວ່າເຮືອນຫຼັງນີ້ບໍ່ມີຜູ້ສ້າງ
ຂໍ້ອ້າງ: ທຸກຢ່າງໃນເອກະພົບເກີດຈາກການລະເບີດຄັ້ງໃຫຍ່ທີ່ບໍ່ມີການຄວບຄຸມເຊິ່ງເອີ້ນວ່າບິກແບງ.
1. ໃຜຫຼືສິ່ງໃດເຮັດໃຫ້ເກີດບິກແບງ?
2. ອັນໃດຟັງມີເຫດຜົນຫຼາຍກວ່າກັນລະຫວ່າງ ທຸກສິ່ງເກີດມາຈາກຄວາມຫວ່າງເປົ່າ ຫຼືທຸກສິ່ງເກີດມາຈາກບາງຄົນ?
ຂໍ້ອ້າງ: ມະນຸດວິວັດທະນາການມາຈາກສັດ.
3. ຖ້າມະນຸດເກີດມາຈາກສັດ ເຊັ່ນ: ຈາກລີງ ເປັນຫຍັງມະນຸດຈຶ່ງສະຫຼາດຫຼາຍກວ່າລີງ?
4. ເປັນຫຍັງສິ່ງມີຊີວິດທີ່ມີໂຄງສ້າງ “ແບບງ່າຍ” ທີ່ສຸດກໍຍັງຊັບຊ້ອນແບບບໍ່ໜ້າເຊື່ອ?
ຂໍ້ອ້າງ: ວິວັດທະນາການເປັນຄວາມຈິງທີ່ໄດ້ຮັບການພິສູດແລ້ວ.
5. ຄົນທີ່ເວົ້າແບບນີ້ໄດ້ກວດສອບເບິ່ງຫຼັກຖານດ້ວຍຕົວເອງແລ້ວບໍ?
6. ມີຈັກຄົນທີ່ເຊື່ອເລື່ອງວິວັດທະນາການຍ້ອນມີຄົນບອກວ່າ ຄົນທີ່ສະຫຼາດກໍພາກັນເຊື່ອເລື່ອງນີ້ໝົດ?
“ຖ້າເຈົ້າກຳລັງຍ່າງຢູ່ໃນປ່າແລ້ວກໍເຈິເຮືອນໄມ້ຫຼັງໜຶ່ງທີ່ງາມໆ ເຈົ້າຈະຄິດບໍວ່າ: ‘ໂອ້ຄືຄັກແທ້! ຕົ້ນໄມ້ໄດ້ລົ້ມລົງໃສ່ບ່ອນນີ້ ແລ້ວກໍກາຍເປັນເຮືອນຫຼັງນີ້.’ ເຈົ້າບໍ່ຄິດແບບນັ້ນດອກ! ມັນໄຮ້ສາລະໂພດ. ດັ່ງນັ້ນ ເຮົາຈະເຊື່ອໄດ້ແນວໃດວ່າທຸກສິ່ງໃນໂລກນີ້ເກີດຂຶ້ນໂດຍບັງເອີນ?”—ຈູເລຍ
“ລອງນຶກພາບເບິ່ງວ່າ ຖ້າມີຄົນບອກເຈົ້າວ່າເກີດລະເບີດຄັ້ງໃຫຍ່ຢູ່ໂຮງພິມແຫ່ງໜຶ່ງ ນໍ້າໝຶກຟົ້ງຊະໃສ່ຝາແລະເພດານຂອງໂຮງພິມ ແລ້ວກໍເກີດເປັນວັດຈະນານຸກົມຫົວໜຶ່ງທີ່ສົມບູນແບບ. ເຈົ້າຈະເຊື່ອບໍ?”—ເກັນ
ເປັນຫຍັງຈຶ່ງເຊື່ອເລື່ອງພະເຈົ້າ?
ຄຳພີໄບເບິນບອກເຮົາໃຫ້ໃຊ້ “ຄວາມສາມາດໃນການຄິດຫາເຫດຜົນ.” (ໂລມ 12:1, ລ.ມ.) ເຮົາບໍ່ຄວນເຊື່ອພຽງຍ້ອນວ່າ
-
ຄວາມຮູ້ສຶກ (ຂ້ອຍຮູ້ສຶກວ່າຕ້ອງມີອັນໃດບາງຢ່າງທີ່ເໜືອທຳມະຊາດ)
-
ເຮັດຕາມຄົນອື່ນ (ໝູ່ເຊື່ອ ຂ້ອຍກໍເລີຍເຊື່ອນຳ)
-
ຖືກກົດດັນ (ພໍ່ແມ່ບັງຄັບໃຫ້ເຊື່ອ)
ແທນທີ່ຈະເປັນຍ້ອນເຫດຜົນທີ່ກ່າວມານີ້ ເຈົ້າຄວນເຊື່ອດ້ວຍຕົວເອງວ່າພະເຈົ້າມີແທ້.
“ຕອນທີ່ຮຽນເລື່ອງຮ່າງກາຍມະນຸດ ຂ້ອຍເຊື່ອເລີຍວ່າຕ້ອງມີພະເຈົ້າສ້າງ ເພາະອະໄວຍະວະແຕ່ລະສ່ວນເຮັດວຽກຕາມໜ້າທີ່ ແມ່ນແຕ່ສ່ວນທີ່ນ້ອຍທີ່ສຸດກໍມີໜ້າທີ່ຂອງມັນ ແລະບາງສ່ວນເຮັດວຽກໂດຍທີ່ເຮົາບໍ່ຮູ້ຕົວຊໍ້າ. ຮ່າງກາຍມະນຸດໜ້າງຶດແທ້ໆ!”—ເທເຣຊາ
“ເມື່ອເຫັນຕຶກສູງໆ ເຮືອລຳໃຫຍ່ໆ ຫຼືລົດໃຫຍ່ ຂ້ອຍກໍຈະຄິດວ່າ ‘ໃຜສ້າງສິ່ງນີ້?’ ຄົນທີ່ສ້າງລົດຕ້ອງສະຫຼາດແທ້ໆ ເພາະຊີ້ນສ່ວນນ້ອຍໆຕ້ອງເຮັດວຽກຖືກເປະໆ. ຖ້າຕ້ອງມີຄົນທີ່ສະຫຼາດສ້າງລົດ ດັ່ງນັ້ນກໍຕ້ອງມີຜູ້ທີ່ສ້າງມະນຸດຄືກັນ.”—ຣິຊາດ
“ແຮ່ງຮຽນວິຊາວິທະຍາສາດຂ້ອຍກໍແຮ່ງຮູ້ສຶກວ່າວິວັດທະນາການເປັນເລື່ອງທີ່ບໍ່ເປັນຕາເຊື່ອ. . . . ສຳລັບຂ້ອຍແລ້ວ ຖ້າຈະໃຫ້ເຊື່ອເລື່ອງນີ້ ເລື່ອງພະເຈົ້າສ້າງຍັງເປັນຕາໜ້າເຊື່ອຖືຫຼາຍກວ່າ.”—ແອນໂທນີ
ລອງຄິດເບິ່ງ
ທັງໆທີ່ມີການຄົ້ນຄວ້າມາຫຼາຍສິບປີ ແຕ່ນັກວິທະຍາສາດຍັງບໍ່ສາມາດຫາຄຳຕອບເລື່ອງວິວັດທະນາການທີ່ຈະໃຫ້ທຸກຄົນເຫັນດີນຳໄດ້. ຖ້າເຂົາເຈົ້າເຊິ່ງໜ້າຈະຮູ້ເລື່ອງນີ້ດີທີ່ສຸດກໍຍັງມີຄວາມເຫັນທີ່ບໍ່ກົງກັນ ແລ້ວມັນຜິດບໍຖ້າເຈົ້າຈະສົງໄສເລື່ອງວິວັດທະນາການ?
ເລື່ອງທີ່ເຈົ້າອາດຈະມັກ
ປຶ້ມແລະຈຸນລະສານ
ມີຜູ້ສ້າງສິ່ງທີ່ມີຊີວິດບໍ?
ສິ່ງທີ່ເຈົ້າເຊື່ອກ່ຽວກັບການເລີ່ມຕົ້ນຊີວິດເປັນເລື່ອງທີ່ສຳຄັນ
