ຈົດໝາຍເຖິງຄລິດສະຕຽນໃນເມືອງໂກໂລຊາຍ 4:1-18
4 ຄົນທີ່ເປັນນາຍ ໃຫ້ປະຕິບັດຕໍ່ທາດຢ່າງຖືກຕ້ອງແລະຍຸຕິທຳສະເໝີ. ໃຫ້ຈື່ໄວ້ວ່າພວກເຈົ້າກໍມີນາຍໃນສະຫວັນຄືກັນ.+
2 ໃຫ້ອະທິດຖານເລື້ອຍໆ+ ແລະຕື່ນໂຕໃນເລື່ອງນີ້ສະເໝີພ້ອມກັບຂອບໃຈພະເຈົ້າ.+
3 ຂໍໃຫ້ອະທິດຖານເພື່ອພວກເຮົານຳ+ ເພື່ອພະເຈົ້າຈະໄດ້ເປີດໂອກາດໃຫ້ພວກເຮົາປະກາດຄຳສອນຂອງເພິ່ນແລະເວົ້າເຖິງຄວາມລັບສັກສິດເລື່ອງພະຄລິດ. ທີ່ຈິງ ຂ້ອຍຖືກຂັງກໍຍ້ອນຄວາມລັບສັກສິດນີ້.+
4 ຂໍໃຫ້ອະທິດຖານເພື່ອຂ້ອຍຈະໄດ້ປະກາດຄວາມລັບນີ້ໃຫ້ຄົນເຂົ້າໃຈແຈ້ງໃນແບບທີ່ຂ້ອຍຄວນຈະເຮັດ.
5 ໃຫ້ພວກເຈົ້າໃຊ້ສະຕິປັນຍາເມື່ອຕິດຕໍ່ພົວພັນກັບຄົນນອກປະຊາຄົມຄລິດສະຕຽນ ແລະໃຫ້ພວກເຈົ້າໃຊ້ເວລາໃຫ້ເປັນປະໂຫຍດຫຼາຍທີ່ສຸດ.*+
6 ໃຫ້ຄຳເວົ້າຂອງພວກເຈົ້າເປັນຄຳເວົ້າທີ່ກະລຸນາສະເໝີຄືກັບອາຫານທີ່ປຸງດ້ວຍເກືອ+ ແລ້ວພວກເຈົ້າຈະຮູ້ວ່າຄວນຕອບແຕ່ລະຄົນແນວໃດ.+
7 ຕີຂີໂກ+ພີ່ນ້ອງທີ່ຂ້ອຍຮັກຈະເລົ່າເລື່ອງທັງໝົດຂອງຂ້ອຍໃຫ້ພວກເຈົ້າຟັງ. ລາວເປັນຜູ້ຮັບໃຊ້ທີ່ສັດຊື່ແລະເປັນທາດຂອງຜູ້ເປັນນາຍຮ່ວມກັບຂ້ອຍ.
8 ຂ້ອຍສົ່ງລາວໄປເພື່ອບອກໃຫ້ຮູ້ວ່າພວກເຮົາເປັນແນວໃດແດ່ແລະເພື່ອໃຫ້ກຳລັງໃຈພວກເຈົ້ານຳ.
9 ລາວຈະໄປກັບໂອເນຊີໂມ+ພີ່ນ້ອງທີ່ຮັກແລະສັດຊື່ຂອງຂ້ອຍເຊິ່ງເຄີຍຢູ່ກັບພວກເຈົ້າ. ສອງຄົນນີ້ຈະເລົ່າເລື່ອງທັງໝົດທີ່ເກີດຂຶ້ນຢູ່ນີ້ໃຫ້ພວກເຈົ້າຟັງ.
10 ອາຣິດຕາໂຂ+ທີ່ຖືກຂັງກັບຂ້ອຍຝາກຄວາມຄິດຮອດໄປຫາພວກເຈົ້າ. ມາຣະໂກເຊິ່ງເປັນລູກອ້າຍລູກນ້ອງຂອງບາຣະນາບາກໍຝາກຄວາມຄິດຮອດມາຄືກັນ+ (ພວກເຈົ້າເຄີຍໄດ້ຮັບຄຳແນະນຳໃຫ້ຕ້ອນຮັບມາຣະໂກ+ຕອນທີ່ລາວໄປຫາ.)
11 ແລະເຢຊູທີ່ມີອີກຊື່ໜຶ່ງວ່າຢູສະໂຕກໍຝາກຄວາມຄິດຮອດມານຳ. ເຂົາເຈົ້າເປັນຄົນທີ່ໄດ້ຮັບສິນຕັດ*ແລ້ວ. ມີແຕ່ເຂົາເຈົ້າເທົ່ານັ້ນທີ່ເປັນໝູ່ເຮັດວຽກກັບຂ້ອຍເພື່ອການປົກຄອງຂອງພະເຈົ້າ. ເຂົາເຈົ້ານິແຫຼະທີ່ໃຫ້ກຳລັງໃຈຂ້ອຍຫຼາຍ.
12 ເອປາຟາ+ທີ່ເຄີຍຢູ່ກັບພວກເຈົ້າແລະເປັນທາດຄົນໜຶ່ງຂອງພະຄລິດເຢຊູກໍຝາກຄວາມຄິດຮອດມານຳ. ລາວອະທິດຖານຢ່າງຈິງຈັງເພື່ອພວກເຈົ້າສະເໝີ ເພື່ອໃນທີ່ສຸດພວກເຈົ້າຈະເປັນຜູ້ໃຫຍ່ໃນທຸກດ້ານແລະຈະໝັ້ນໃຈວ່າພະເຈົ້າຈະເຮັດທຸກສິ່ງຕາມທີ່ເພິ່ນຕ້ອງການ.
13 ຂ້ອຍເປັນພະຍານຢືນຢັນໄດ້ວ່າລາວພະຍາຍາມເຮັດວຽກໜັກເພື່ອພວກເຈົ້າແລະເພື່ອຄົນທີ່ຢູ່ໃນເມືອງລາວດີເກອາກັບເມືອງເຮຍຣາໂປລີ.
14 ລູກາ+ເຊິ່ງເປັນທ່ານໝໍທີ່ພີ່ນ້ອງຮັກກໍຝາກຄວາມຄິດຮອດໄປຫາພວກເຈົ້າ. ເດມາກໍຝາກຄວາມຄິດຮອດໄປຫາຄືກັນ.+
15 ຂ້ອຍຂໍຝາກຄວາມຄິດຮອດໄປຫາພີ່ນ້ອງໃນເມືອງລາວດີເກອາ ແລະໄປຫານິມຟາກັບປະຊາຄົມທີ່ປະຊຸມກັນໃນເຮືອນຂອງລາວ.+
16 ເມື່ອອ່ານຈົດໝາຍສະບັບນີ້ແລ້ວ ຂໍສົ່ງຕໍ່ໃຫ້ປະຊາຄົມຢູ່ເມືອງລາວດີເກອາເພື່ອເຂົາເຈົ້າຈະໄດ້ອ່ານ+ ແລະໃຫ້ພວກເຈົ້າອ່ານຈົດໝາຍທີ່ຂ້ອຍສົ່ງໄປເມືອງລາວດີເກອານຳ.
17 ອີກເລື່ອງໜຶ່ງ ຂໍບອກອາຂີໂປວ່າ:+ “ໃຫ້ຕັ້ງໃຈເຮັດວຽກຮັບໃຊ້ທີ່ຜູ້ເປັນນາຍມອບໝາຍໃຫ້ນັ້ນໃຫ້ສຳເລັດ.”
18 ຂ້ອຍໂປໂລຂຽນຄຳທັກທາຍສ່ວນນີ້ດ້ວຍໂຕເອງ.+ ຂໍຢ່າລືມວ່າຂ້ອຍຖືກຂັງຢູ່.+ ຂໍໃຫ້ພວກເຈົ້າໄດ້ຮັບຄວາມກະລຸນາທີ່ຍິ່ງໃຫຍ່.
