ໜຸ່ມສາວຖາມວ່າ
ເປັນຫຍັງຂ້ອຍຕ້ອງອະທິດຖານ?
ການສຳຫຼວດໜຶ່ງລາຍງານວ່າ ມີໄວລຸ້ນ 80% ໃນອາເມຣິກາທີ່ອະທິດຖານ ແຕ່ມີພຽງເຄິ່ງໜຶ່ງເທົ່ານັ້ນທີ່ອະທິດຖານທຸກມື້. ບໍ່ແປກທີ່ເຂົາເຈົ້າບາງຄົນຈະສົງໄສວ່າ: ‘ການອະທິດຖານພຽງແຕ່ຊ່ວຍໃຫ້ຂ້ອຍຮູ້ສຶກດີຂຶ້ນ ຫຼືມີຫຍັງຫຼາຍກວ່ານັ້ນບໍ?’
ການອະທິດຖານແມ່ນຫຍັງ?
ການອະທິດຖານແມ່ນການເວົ້າລົມກັບພະເຈົ້າຜູ້ທີ່ສ້າງທຸກສິ່ງ. ລອງຄິດເບິ່ງແມ້ວ່ານີ້ມີຄວາມໝາຍສ່ຳໃດ! ພະເຢໂຫວາສູງສົ່ງກວ່າມະນຸດໃນທຸກໆດ້ານ ແຕ່ “ພະອົງບໍ່ໄດ້ຢູ່ໄກຈາກພວກເຮົາແຕ່ລະຄົນເລີຍ.” (ກິດຈະການ 17:27) ທີ່ຈິງ ໃນຄຳພີໄບເບິນມີຄຳເຊີນທີ່ໜ້າປະທັບໃຈທີ່ວ່າ: “ໃຫ້ເຂົ້າໄປໃກ້ຊິດກັບພະເຈົ້າ ແລ້ວພະອົງຈະເຂົ້າມາໃກ້ຊິດກັບພວກເຈົ້າ.”—ຢາໂກໂບ 4:8
ເຈົ້າຈະເຂົ້າມາໃກ້ຊິດກັບພະເຈົ້າໄດ້ແນວໃດ?
ວິທີໜຶ່ງແມ່ນການອະທິດຖານ ນີ້ເປັນວິທີທີ່ເຈົ້າເວົ້າກັບພະເຈົ້າ.
ອີກວິທີໜຶ່ງແມ່ນການຮຽນຄຳພີໄບເບິນ ນີ້ເປັນວິທີທີ່ພະເຈົ້າ “ເວົ້າ” ກັບເຈົ້າ.
ທັງການອະທິດຖານແລະການຮຽນຄຳພີໄບເບິນຈະຊ່ວຍເຈົ້າໃຫ້ເປັນໝູ່ສະໜິດກັບພະເຈົ້າ.
“ການເວົ້າລົມກັບພະເຢໂຫວາພະເຈົ້າອົງສູງສຸດຖືວ່າເປັນສິດທິພິເສດທີ່ຍິ່ງໃຫຍ່ທີ່ສຸດເທົ່າທີ່ມະນຸດຈະມີໄດ້.”—ເຈເຣມີ
“ການໄດ້ອະທິດຖານບອກຄວາມຮູ້ສຶກເລິກໆໃນໃຈຂອງຂ້ອຍໃຫ້ພະເຢໂຫວາຟັງ ເຮັດໃຫ້ຂ້ອຍຮູ້ສຶກໃກ້ຊິດກັບເພິ່ນຫຼາຍຂຶ້ນ.”—ມິແຣນດາ
ພະເຈົ້າຟັງຢູ່ບໍ?
ເຖິງວ່າເຈົ້າຈະເຊື່ອໃນພະເຈົ້າແລະອະທິດຖານເຖິງເພິ່ນ ບາງເທື່ອມັນກໍອາດຍາກທີ່ຈະຍອມຮັບວ່າເພິ່ນກຳລັງຟັງຢູ່ແທ້ໆ. ແຕ່ຄຳພີໄບເບິນເອີ້ນພະເຢໂຫວາວ່າເປັນ “ຜູ້ຟັງຄຳອະທິດຖານ.” (ຄຳເພງ 65:2, ລ.ມ.) ແລະຍັງໄດ້ເຊີນເຈົ້າໃຫ້ “ຝາກຄວາມອຸກໃຈທັງໝົດໄວ້ກັບພະອົງ.” ຍ້ອນຫຍັງ? “ເພາະພະອົງຫ່ວງໃຍພວກເຈົ້າ.”—1 ເປໂຕ 5:7
ລອງຄິດເບິ່ງ: ເຈົ້າໃຊ້ເວລາເວົ້າລົມກັບໝູ່ສະໜິດເປັນປະຈຳບໍ? ເຈົ້າສາມາດເຮັດແບບນີ້ກັບພະເຈົ້າໄດ້. ອະທິດຖານລົມກັບເພິ່ນເລື້ອຍໆແລະເວົ້າຊື່ຂອງເພິ່ນ ເຊິ່ງກໍຄືເຢໂຫວາ ຕອນທີ່ອະທິດຖານ. (ຄຳເພງ 86:5-7; 88:9) ທີ່ຈິງ ຄຳພີໄບເບິນເຊີນເຈົ້າໃຫ້ “ອະທິດຖານເປັນປະຈຳ.”—1 ເທຊະໂລນິກ 5:17
“ການອະທິດຖານເປັນການລົມກັນລະຫວ່າງຂ້ອຍກັບພະເຈົ້າຜູ້ເປັນພໍ່ໃນສະຫວັນ ນີ້ເປັນການເວົ້າລະບາຍຄວາມໃນໃຈຂອງຂ້ອຍ.”—ມົວເສດສ໌
“ຂ້ອຍບອກເລື່ອງໃນໃຈກັບພະເຢໂຫວາ ຄືກັບທີ່ຂ້ອຍບອກແມ່ຫຼືບອກໝູ່ສະໜິດຂອງຂ້ອຍ.”—ຄາເຣັນ
ຂ້ອຍຈະອະທິດຖານເລື່ອງຫຍັງໄດ້ແດ່?
ຄຳພີໄບເບິນບອກວ່າ: “ໃຫ້ຂໍທຸກສິ່ງຈາກພະເຈົ້າດ້ວຍການອະທິດຖານແລະການອ້ອນວອນ ແລະໃຫ້ຂອບໃຈພະອົງນຳ.”—ຟີລິບປອຍ 4:6
ນີ້ໝາຍຄວາມວ່າເຈົ້າຈະອະທິດຖານກ່ຽວກັບບັນຫາຂອງເຈົ້າໄດ້ແມ່ນບໍ? ແມ່ນແລ້ວ! ທີ່ຈິງ ຄຳພີໄບເບິນບອກວ່າ: “ມອບພາລະຂອງເຈົ້າໄວ້ກັບພະເຢໂຫວາເຖີ້ນ ແລ້ວເພິ່ນຈະຊ່ວຍເຈົ້າ.”—ຄຳເພງ 55:22, ລ.ມ.
ເມື່ອອະທິດຖານເຖິງພະເຈົ້າ ເຈົ້າບໍ່ຄວນເວົ້າເຖິງບັນຫາຂອງເຈົ້າເທົ່ານັ້ນ. ຜູ້ຍິງໄວລຸ້ນຊື່ຈັນເທວບອກວ່າ “ຖ້າຂ້ອຍມີແຕ່ຂໍໃຫ້ພະເຢໂຫວາຊ່ວຍ ເພິ່ນຄືຊິບໍ່ຢາກສະໜິດກັບຂ້ອຍປານໃດ. ຂ້ອຍຮູ້ສຶກວ່າເຮົາຄວນຈະຂອບໃຈພະເຢໂຫວາກ່ອນ ແລະເລື່ອງທີ່ຈະຂອບໃຈກໍໜ້າຈະມີຫຼາຍໆຢ່າງ.”
ລອງຄິດເບິ່ງ: ເຈົ້າຢາກຂອບໃຈເລື່ອງຫຍັງແດ່? ເຈົ້າລອງຄິດຈັກ 3 ເລື່ອງທີ່ຈະຂອບໃຈພະເຢໂຫວາໃນມື້ນີ້ໄດ້ບໍ?
“ແມ່ນແຕ່ບາງຢ່າງທີ່ເບິ່ງຄືທຳມະດາ ເຊັ່ນຕອນທີ່ເຮົາເຫັນດອກໄມ້ງາມໆ ເຮົາກໍສາມາດອະທິດຖານຂອບໃຈພະເຢໂຫວາໄດ້.”—ອານິຕາ
“ລອງຄິດເຖິງສິ່ງທີ່ພະເຈົ້າສ້າງທີ່ເຈົ້າຮູ້ສຶກປະທັບໃຈຫຼືຄິດເຖິງຂໍ້ຄຳພີທີ່ຖືກໃຈເຈົ້າ ແລ້ວກໍໃຫ້ຂອບໃຈພະເຢໂຫວາສຳລັບສິ່ງນັ້ນ.”—ໄບຣອັນ
ເລື່ອງທີ່ເຈົ້າອາດຈະມັກ
ຄຳສອນ
ພະເຈົ້າຟັງຄຳອະທິດຖານຂອງທຸກຄົນບໍ?
ຈະເປັນແນວໃດຖ້າຄົນໜຶ່ງອະທິດຖານແບບທີ່ເຫັນແກ່ຕົວ? ຖ້າຜົວຄົນໜຶ່ງເຮັດບໍ່ດີຕໍ່ເມຍຂອງລາວ ແລ້ວລາວອະທິດຖານຂໍພອນຈາກພະເຈົ້າ ພະອົງຈະຟັງບໍ?
ຫໍສັງເກດການ
ອະທິດຖານ—ເປັນຫຍັງ?
ການອະທິດຖານເປັນເລື່ອງໜຶ່ງໃນຄຳພີໄບເບິນທີ່ຫຼາຍຄົນສົນໃຈຢາກຮູ້. ແຕ່ເຮົາຈຳເປັນຕ້ອງອະທິດຖານແທ້ໆບໍ?
