ໜຸ່ມສາວຖາມວ່າ
ຄຳພີໄບເບິນຊ່ວຍເຮົາໄດ້ແນວໃດ? ຕອນ 2: ເຮັດໃຫ້ການອ່ານຄຳພີໄບເບິນເປັນເລື່ອງມ່ວນ
ໄວລຸ້ນຄົນໜຶ່ງຊື່ວິວບອກວ່າ “ການອ່ານຄຳພີໄບເບິນເບິ່ງຄືເປັນເລື່ອງໜ້າເບື່ອຖ້າເຈົ້າບໍ່ຮູ້ວິທີອ່ານແທ້ໆ.”
ເຈົ້າຢາກຮູ້ເຄັດລັບທີ່ເຮັດໃຫ້ການອ່ານຄຳພີໄບເບິນເປັນເລື່ອງມ່ວນບໍ? ບົດຄວາມນີ້ຊ່ວຍເຈົ້າໄດ້.
ເຮັດໃຫ້ຂໍ້ຄຳພີມີຊີວິດ
ພະຍາຍາມມີສ່ວນຮ່ວມກັບເລື່ອງທີ່ເຈົ້າໄດ້ອ່ານ. ລອງວິທີເຫຼົ່ານີ້ເບິ່ງ:
ເລືອກເລື່ອງໃນຄຳພີໄບເບິນທີ່ເຈົ້າຢາກຈະສຶກສາ. ເຈົ້າອາດເລືອກບາງເລື່ອງໃນຄຳພີໄບເບິນຫຼືເລືອກເລື່ອງຈາກປຶ້ມກ່ຽວກັບຊີວິດຂອງພະເຢຊູ ຫຼືເຈົ້າອາດຈະເລືອກເລື່ອງທີ່ມີຢູ່ໃນຫົວຂໍ້ການອ່ານຄຳພີໄບເບິນແບບລະຄອນເຊິ່ງມີຢູ່ໃນເວັບໄຊ jw.org.
ອ່ານເລື່ອງທີ່ເຈົ້າເລືອກ. ເຈົ້າຈະອ່ານດ້ວຍໂຕເອງ ຫຼືເຈົ້າຈະອ່ານອອກສຽງກັບໝູ່ຫຼືຄອບຄົວຂອງເຈົ້າກໍໄດ້. ເຈົ້າອາດເລືອກຄົນໜຶ່ງໃຫ້ອ່ານເປັນຜູ້ບັນຍາຍເຫດການ ສ່ວນຄົນອື່ນກໍອ່ານເປັນຕົວລະຄອນຕ່າງໆ.
ລອງໃຊ້ຄຳແນະນຳຕໍ່ໄປນີ້ຈັກໜຶ່ງຂໍ້ຫຼືຫຼາຍກວ່ານັ້ນ:
ແຕ້ມຮູບເຫດການທີ່ໄດ້ອ່ານ. ຫຼືແຕ້ມຮູບງ່າຍໆທີ່ອະທິບາຍເລື່ອງລາວເປັນສາກໆເພື່ອສະແດງລຳດັບເຫດການທີ່ເກີດຂຶ້ນ. ໃຊ້ຂໍ້ຄວາມສັ້ນໆເພື່ອອະທິບາຍສິ່ງທີ່ເກີດຂຶ້ນໃນແຕ່ລະສາກ.
ແຕ້ມແຜນພາບ. ຕົວຢ່າງເຊັ່ນ ເມື່ອເຈົ້າອ່ານກ່ຽວກັບບຸກຄົນທີ່ມີຄວາມເຊື່ອເຂັ້ມແຂງ ໃຫ້ເຊື່ອມໂຍງຄຸນລັກສະນະທີ່ດີຂອງບຸກຄົນນັ້ນກັບພອນທີ່ລາວໄດ້ຮັບຍ້ອນສິ່ງທີ່ລາວເຮັດ.
ລອງສົມມຸດວ່າເຈົ້າເປັນນັກຂ່າວ. ໃຫ້ລາຍງານເຫດການຈາກເລື່ອງທີ່ເຈົ້າອ່ານໃນຫຼາຍແງ່ມຸມ ແລະ “ສຳພາດ” ຄົນທີ່ເປັນຕົວຫຼັກແລະຄົນອື່ນໆທີ່ຢູ່ໃນເຫດການ.
ຖ້າມີໃຜໃນເຫດການນັ້ນທີ່ເຮັດການຕັດສິນໃຈບໍ່ສະຫຼາດ ລອງຈິນຕະນາການເຖິງຕອນຈົບອີກແບບໜຶ່ງ. ຕົວຢ່າງເຊັ່ນ ຕອນທີ່ເປໂຕປະຕິເສດພະເຢຊູ. (ມາຣະໂກ 14:66-72) ໃຫ້ລອງຄິດວ່າເປໂຕຈະຮັບມືກັບສະຖານະການແບບນັ້ນໃຫ້ດີຂຶ້ນໄດ້ແນວໃດ?
ຖ້າເຈົ້າມີຄວາມຄິດສ້າງສັນເປັນພິເສດ ລອງຂຽນບົດລະຄອນຂອງໂຕເຈົ້າເອງໂດຍໃຊ້ເຫດການທີ່ເຈົ້າອ່ານເປັນພື້ນຖານ. ລວມທັງຂຽນບົດຮຽນທີ່ໄດ້ຮັບຈາກເຫດການນັ້ນ.—ໂຣມ 15:4
ເຈົ້າເຮັດໃຫ້ຄຳພີໄບເບິນມີຊີວິດໄດ້!
ຄົ້ນຄວ້າໃຫ້ລະອຽດ!
ຖ້າເຈົ້າຄົ້ນຄວ້າຢ່າງລະອຽດ ເຈົ້າຈະພົບຄວາມຮູ້ທີ່ມີຄ່າໃນເຫດການນັ້ນ. ທີ່ຈິງ ບາງເທື່ອພຽງແຕ່ຄຳເວົ້າໜຶ່ງຫຼືສອງຄຳໃນຄຳພີໄບເບິນກໍສຳຄັນຫຼາຍ.
ຕົວຢ່າງເຊັ່ນ ໃຫ້ທຽບມັດທາຍ 28:7 ກັບມາຣະໂກ 16:7.
ເປັນຫຍັງມາຣະໂກໃຫ້ລາຍລະອຽດວ່າພະເຢຊູຈະປາກົດໂຕກັບພວກລູກສິດ “ແລະເປໂຕ”?
ຂໍ້ມູນ: ມາຣະໂກບໍ່ໄດ້ເຫັນເຫດການທີ່ເກີດຂຶ້ນຢູ່ຫັ້ນແທ້ໆ ມີຫຼັກຖານວ່າ ລາວໄດ້ຮັບຂໍ້ມູນມາຈາກເປໂຕ.
ຄວາມຮູ້ທີ່ມີຄ່າ: ເປັນຫຍັງເປໂຕຕ້ອງຮູ້ສຶກໄດ້ກຳລັງໃຈຫຼາຍເມື່ອໄດ້ຍິນວ່າພະເຢຊູຢາກພົບລາວອີກ? (ມາຣະໂກ 14:66-72) ພະເຢຊູສະແດງໃຫ້ເຫັນແນວໃດວ່າເພິ່ນເປັນໝູ່ແທ້ຂອງເປໂຕ? ເຈົ້າຈະຮຽນແບບພະເຢຊູແລະເປັນໝູ່ແທ້ກັບຄົນອື່ນໄດ້ແນວໃດ?
ເມື່ອເຈົ້າເຮັດໃຫ້ຂໍ້ຄຳພີທີ່ອ່ານມີຊີວິດແລະຄົ້ນຄວ້າຢ່າງລະອຽດ ການອ່ານຄຳພີໄບເບິນກໍຈະເປັນເລື່ອງທີ່ມ່ວນຫຼາຍ!
ເລື່ອງທີ່ເຈົ້າອາດຈະມັກ
ໜຸ່ມສາວຖາມວ່າ
ຄຳພີໄບເບິນຊ່ວຍເຮົາໄດ້ແນວໃດ? ຕອນ 1: ອ່ານຄຳພີໄບເບິນ
ຖ້າເຈົ້າຍ່າງຜ່ານຫີບສົມບັດເກົ່າແກ່ຫີບໜຶ່ງ ເຈົ້າຈະບໍ່ຢາກຮູ້ບໍວ່າມີຫຍັງຢູ່ໃນຫີບນັ້ນ? ຄຳພີໄບເບິນເປັນຄືຫີບສົມບັດ ເຊິ່ງເກັບສະຕິປັນຍາທີ່ມີຄ່າໄວ້ຢ່າງຫຼວງຫຼາຍ.
